„O langa mi musu bari fu yu yepi mi?”
„Mi no wani abi pen moro!”, na so Jayne ben e krei. Na uma disi ben abi kanker, èn a ben e panya na ini en heri skin. Den famiriman nanga mati fu en ben winsi taki den ben man puru a siki gi en èn a pen di a ben abi! Den begi Gado fu yepi en. Gado ben o arki? Gado e broko en ede nanga en?
GADO sabi na ini sortu situwâsi libisma de. A Wortu fu en, Bijbel, e taki: „Ala den sani di Gado meki, e tan geme èn te now ete den alamala abi pen” (Romesma 8:22). Gado sabi taki neleki Jayne, tra hondrohondro milyun sma de di e pina ibri dei, kande fu di den abi pen, fu di den e sari srefisrefi, noso fu di den abi bigi broko-ede. Gado e si den 800 milyun sma di e go sribi ibri neti nanga angri-bere. Noso den milyunmilyun sma di e pina fu di wan famiriman e du ogri nanga den. Yu abi sosrefi den furu papa nanga mama di e broko den ede nanga a ten di e kon èn nanga a tanbun fu den pikin fu den. Yu aksi yusrefi wan leisi efu Gado o tyari wan lusu kon gi ala den problema disi? A no de fu taki dati, efu wi leki libisma wani yepi den lobiwan fu wi, dan Gado ben o wani yepi libisma di ensrefi meki, a no so?
Efu yu aksi yusrefi den sortu aksi dati, dan yu a no a wan-enkri sma di du dati. Moro leki 2600 yari pasa, Habakuk, wan futuboi fu Gado, ben e firi soleki fa furu sma na ini a ten disi e firi. A man disi ben aksi Gado: „O Yehovah, o langa mi musu bari, fosi yu arki mi? O langa mi musu bari fu yu yepi mi? O langa yu o meki sma du ogri nanga mi, fosi yu frulusu mi? Fu san ede yu e meki mi si takrudu? Fu san ede yu e tan luku nomo fa sma e du ogri? Fu san ede mi musu si fa sma e fufuru sani èn fa den e pina trawan? Fu san ede sma e meki trobi nanga makandra? Fu san ede den e strei nanga makandra?” (Habakuk 1:2, 3) Habakuk, di ben de wan Hebrew profeiti, ben si den kefalek ogri sani di sma ben e du nanga trawan sondro fu abi reide gi dati. Na ini a ten disi, den sortu sani dati de fu yere ibri dei na nyunsu, èn sma di trutru abi firi gi trawan e broko den ede nanga den sani disi.
A de so taki Gado no ben poti prakseri na den sani di ben gi Habakuk broko-ede? Nôno, Gado ben arki Habakuk. Baka dati, Gado trowstu en èn a gi a man disi di ben e sari, deki-ati. Yehovah Gado tranga a bribi fu Habakuk nanga a pramisi taki A o tyari wan kaba kon na a pina di sma ben e pina. A boskopu fu Gado di e gi sma howpu kan gi yu deki-ati tu, neleki fa a ben gi Jayne nanga en osofamiri deki-ati. Na ini den artikel di e kon wi o go luku den aksi disi: Fu san ede wi kan de seiker taki Gado trutru e broko en ede nanga wi? San Gado o du fu tyari wan kaba kon na a pina di libisma e pina, èn o ten a o du dati?