Sma di lasi den trowpatna na ini dede—San den abi fanowdu? Fa yu kan yepi den?

Jeanne de na ini a kukru fu en di dungrudungru pikinso. Sondro fu denki a e poti preti nanga spun na tapu a tafra. A musu nyan wan sani tu. Wantronso, en ai e fadon tapu den tu preti na en fesi . . . dan a e bigin krei. A poti tu preti na tapu tafra, fu di na so a gwenti du! Na tu yari kaba taki en lobi masra dede.

DEN sma di no ondrofeni a sani disi, no man frustan o furu wan sma e sari te a lasi en trowpatna na ini dede. Fu taki en leti, a e teki ten fu wan sma bribi taki so wan hati sani pasa. Beryl, di abi 72 yari, no ben man bribi taki en masra kon dede. A e taki: „A sani disi no ben kan de tru. Mi no ben man bribi taki a no ben o waka kon na ini na oso moro.”

Son leisi, sma di lasi wan futu noso wan anu e feni taki den e firi na anu noso a futu dati ete. Na so a de tu taki sma di e sari taki den lasi den trowpatna na ini dede, e denki son leisi taki den si den trowpatna na mindri wan ipi sma. Son leisi den e kon si wantronso taki den e taigi den trowpatna wan sani, aladi a sma no de drape moro!

Nofo tron mati nanga famiriman no sabi san den musu du te wan lobiwan fu den lasi en trowpatna na ini dede. Yu sabi wan sma di lasi en trowpatna na ini dede? We, fa yu kan yepi so wan sma? San yu musu sabi fu man yepi den sma disi di e sari srefisrefi? Fa yu kan yepi so wan sma so taki safrisafri a e kisi prisiri baka na ini a libi?

Sani di wi no musu du

Mati nanga famiriman kande e broko den ede nanga a lobiwan fu den di e sari srefisrefi. Fu di den wani yepi so wan sma, meki den e pruberi fu no meki a sma sari fu wan langa pisi ten. Ma wan ondrosuku ben hori, pe den ben poti aksi gi sowan 700 sma di lasi den trowpatna na ini dede, èn den kon si disi: „Wan spesrutu pisi ten no de o langa wan sma musu sari.” Fu dati ede, na presi fu pruberi fu no meki a sma sari moro, wi musu gi a sma na okasi fu sari o langa a wani.—Genesis 37:34, 35; Yob 10:1.

Aladi a kan fiti fu yepi seti sani gi a beri, toku yu no musu denki taki yu musu sorgu gi ala sani di abi fu du nanga a beri. Paul, di abi 49 yari èn di lasi en wefi na ini dede, e taki: „Mi ben feni en moi taki den wan di ben yepi mi seti sani gi a beri, ben gi mi na okasi fu teki bosroiti na ini sani di ben de prenspari gi mi. Mi ben feni en prenspari taki ala sani waka bun na a beri fu mi wefi. Mi ben feni taki disi ben de a lasti sani di mi ben kan du fu gi en grani.”

A no de fu taki dati furu sma de nanga tangi te trawan e yepi den. Eileen, di abi 68 yari èn di lasi en masra na ini dede, e taki: „A ben muilek gi mi fu seti sani gi a beri èn fu seti den papira di abi fu du nanga dati, fu di mi no ben man denki krin. Koloku taki mi manpikin nanga en wefi ben yepi mi nanga furu sani.”

Boiti dati, no frede fu taki fu a lobiwan di dede. Beryl, di wi ben taki fu en kaba, e taki: „Den mati fu mi ben yepi mi trutru. Ma mi si taki furu fu den no ben wani taki fu mi masra John. A ben de neleki noiti a ben de na libi, èn a sani dati ben hati mi trutru.” A kan taki baka wan pisi ten, sma di lasi den trowpatna na ini dede wani taki fri fu den patna di no de moro. Yu kan memre wan moi sani fu a sma di no de moro, noso wan lafutori fu a sma? We, yu kan pruberi fu fruteri dati na a patna di de na libi ete. No frede fu taki fu dati. Te yu e si taki a sma no abi trobi nanga dati, dan fruteri san yu ben warderi fu a sma noso san yu e misi fu a sma. Disi kan yepi a trowpatna di e sari, fu si taki trawan e sari tu.—Romesma 12:15.

Te yu e yepi a sma, dan luku bun fu no gi en tumusi furu rai. No dwengi a sma di e sari fu teki wan bosroiti tumusi gaw.a Na presi fu dati, gebroiki a koni fu man si sani krin, èn aksi yusrefi: ’Sortu bun sani mi kan du fu yepi wan mati, noso famiriman na ini a tumusi muilek situwâsi disi na ini en libi?’

San yu kan du?

Na ini den dei baka a dede fu wan lobiwan, a tra patna ben o feni en bun kande fu kisi yepi. Yu kan bori gi en, yu kan gi den famiriman di kon luku en wan presi fu tan, noso yu kan tan nanga a sma di e sari?

Yu musu frustan tu taki mansma nanga umasma abi difrenti fasi fa den e handri te den e sari èn te den e firi taki den de den wawan. Fu eksempre, na ini son kondre moro leki afu fu den mansma di lasi den wefi na ini dede, e trow baka na ini 18 mun baka dati. A sani disi nofo tron no e pasa nanga umasma di lasi den masra na ini dede. San e meki taki mansma nanga umasma e handri na difrenti fasi?

Tra fasi leki san furu sma e bribi, dan a no de so ala ten taki mansma e trow baka soso fu di den wani wan sma sorgu gi den, noso fu di den wani plisi den seks firi fu den. Fu di furu mansma di trow e taki fri soso nanga den wefi, meki den e firi densrefi den wawan èn den e sari srefisrefi te den wefi dede. Na a tra sei, umasma di lasi den masra na ini dede, man feni trowstu moro makriki, aladi a de so son leisi taki den mati fu den masra e frigiti den. Fu dati ede, furu mansma di lasi den wefi na ini dede, e denki taki a wan-enkri fasi fu no firi den wawan moro, na fu trow baka, aladi a kan de tumusi gaw fu bigin wan nyun libi nanga wan tra sma. Dati meki, umasma di lasi den masra na ini dede sabi moro bun fa fu handri te den e sari fu di den de den wawan.

Awansi yu mati noso famiriman na wan mansma noso wan umasma di lasi en trowpatna na ini dede, san yu kan du fu yepi en so taki a no firi en wawan moro? Helen, di abi 49 yari èn di lasi en masra na ini dede, e taki: „Furu sma wani yepi, ma den no e pruberi fu du dati trutru. Nofo tron den e taki ’Efu wan sani de di mi kan du, dan yu sa taigi mi.’ Ma mi ben warderi en te son sma ben taki: ’Mi e go na wenkri, yu wani kon nanga mi?’” Paul, di en wefi dede fu kanker, e fruteri fu san ede a ben e warderi en taki sma ben kari en kon na den oso. A e taki: „Son leisi, yu no e firi fu de makandra nanga sma noso fu taki fu a situwâsi fu yu. Ma te yu de nanga trawan wan bakadina, dan yu e firi moro bun. Yu no e firi taki yu de yu wawan. Yu sabi taki sma trutru e broko den ede nanga yu, èn dati e meki en moro makriki.”b

Den e warderi en te yu e sori taki yu e firi gi den

Helen ben feni taki di furu fu den famiriman fu en ben go du den aladei sani baka, dan a ben firi taki a ben abi trowstu fanowdu. A e taki: „Mati nanga famiriman e yepi yu furu na a bigin, ma dan den e go du den aladei sani baka leki fa den ben gwenti. Ma gi yu sani no e waka so.” Fu di trutru mati e frustan dati, meki den de klariklari fu tan yepi den sma disi.

Kande wan sma di lasi en trowpatna na ini dede, abi wan sma fanowdu di musu de nanga en tapu wan spesrutu dei, kande a trowdei fu en, noso a dei di a trowpatna dede. Eileen, di wi ben taki fu en na fesi, e taki dati en manpikin e yepi en fu no firi taki a de en wawan tapu a dei di a ben trow. A e taki: „Ibri yari mi manpikin Kevin e tyari mi go na wan presi a dei dati. Mi e nyan nanga en, èn a de wan spesrutu dei te wi de nanga makandra.” Yu kan skrifi den sortu dei disi na tapu wan kalender te a kan muilek gi so wan sma? Yu kan seti sani so taki yu srefi noso trawan kan de nanga a sma dati tapu den sortu dei dati te a sma abi en muilek.—Odo 17:17.

Son sma kon si taki fu di densrefi lasi wan trowpatna na ini dede, meki den kan trowstu trawan. Annie, di lasi en masra na ini dede aiti yari kaba, e taki fa a abi demakandra nanga wan tra uma di lasi en masra na ini dede. A e taki: „A fasti bosroiti di na uma disi ben abi, ben abi furu krakti tapu mi èn a gi mi deki-ati fu tan go doro.”

Iya, te den sma di lasi den trowpatna na ini dede, pasa a pisi ten di den ben e sari srefisrefi, dan densrefi kan trowstu trawan èn gi den howpu. Bijbel e taki fu tu uma di ben lasi den masra na ini dede, dati ben de a yongu uma Rut nanga Naomi, a mama fu en masra. Den uma disi ben kisi wini fu di den horibaka gi makandra. A heri moi tori dati e sori taki a fasi fa den uma disi ben broko den ede nanga makandra, yepi den fu no sari moro èn fu sabi fa fu handri na ini muilek situwâsi di den ben ondrofeni.—Rut 1:15-17; 3:1; 4:14, 15.

Wan ten fu kisi densrefi baka

Fu man bigin abi prisiri na ini a libi baka, dan wan sma di lasi en trowpatna na ini dede musu abi wan yoisti fasi fu si sani te a abi fu du nanga a memre di a e memre a lobiwan fu en èn a sorgu di a musu sorgu now gi ensrefi. A koni Kownu Salomo ben taki dati „wan ten de fu krei”. Ma a ben taki tu dati wan ten musu de tu fu „kon betre”, noso fu kisi yusrefi baka.—Preikiman 3:3, 4.

Paul, di wi ben taki fu en kaba, e sori o muilek a de fu no tan prakseri a ten di pasa. A e taki: „Mi nanga mi wefi ben gro kon bigi leki tu yongu bon di frekti kon na wán. Ma di wan fu den bon dede, èn den puru en, dan yu e si na a tra bon taki a e misi wan pisi. Mi no ben gwenti en taki mi ben de mi wawan.” Son sma e weigri fu teki a situwâsi fu den leki fa a de now, fu di den no wani sori taki den frigiti den trowpatna di dede. Trawan e feni taki den no kan abi prisiri fu di dati kan sori taki den frigiti den trowpatna. Fu dati ede den no wani abi demakandra nanga tra sma. Fa wi kan yepi den sma disi na wan switi fasi fu kisi densrefi baka, so taki den kan go doro nanga a libi fu den?

A fosi sani di kan yepi den, na taki a sma kan fruteri fa a e firi. Herbert, di lasi en wefi na ini dede siksi yari kaba, e taki: „A sani di mi ben warderi trutru, na te fisitiman ben sidon pî e arki te mi ben taki fu sani fu fositen, noso fu sani di ben gi mi broko-ede na a momenti dati. Mi sabi heri bun taki trawan no ben feni en switi ala ten fu de makandra nanga mi, ma toku mi e warderi a fasi fa den sori taki den e firi gi mi.” A ben naki Paul en ati trutru, di wan lepi mati fu en ben aksi en wan tu leisi fa a ben e firi. Paul e taki: „Mi ben warderi en taki a ben handri na so wan switi fasi nanga mi èn nofo tron mi ben fruteri en fa mi ben e firi na a momenti dati.”—Odo 18:24.

Wan sma di lasi wan lobiwan na ini dede, kan taki fu den firi fu en, soleki sani di e hati en, sani di e trobi en, noso sani di e gi en atibron. Disi na wan prenspari fasi fa a sma e bigin teki a situwâsi fu en leki fa a de now. Fu eksempre, Kownu David ben taki san de na tapu en ati, èn a ben fruteri dati na a moro bun sma pe a ben kan go lekti en ati, dati na Yehovah Gado. Disi ben meki taki David kisi a krakti fu „opo” èn teki a situwâsi fu en leki fa a ben de na a ten dati. Iya, a ben musu bribi a sari sani taki a yongu manpikin fu en dede.—2 Samuel 12:19-23.

Aladi a kan muilek na a bigin, toku so wan sma di e sari srefisrefi musu go du den sani baka fu na aladei libi. Yu kan kari en fu go du wan tu sani, soleki fu go na wenkri noso fu go koiri? Yu kan aksi a mati fu yu fu yepi yu du wan tu sani? Disi na wan tra fasi, fa wi kan yepi sma fu no hori densrefi aparti. Fu eksempre, a sma kan yepi yu fu luku den pikin fu yu noso fu sori yu fa fu meki wan spesrutu nyanyan? A sma kan yepi yu fu meki wan tu sani na a oso? Boiti taki disi e gi a sma deki-ati fu opo du wan tu sani, a e gi en a dyaranti tu taki trawan abi en fanowdu.

Te so wan sma di e sari e fruteri trawan baka fa a e firi, dan dati kan yepi en safrisafri fu kon abi prisiri baka na ini a libi èn kande a kan poti wan tu tra marki srefi na ini en libi. Na so a ben de nanga Yonette, wan mama di abi 44 yari èn di lasi en masra na ini dede. A e taki: „A ben muilek srefisrefi fu du sani fu na aladei libi baka! A no ben makriki fu du aladei wroko, fu seti moni tori, èn fu sorgu gi den dri pikin.” Ma baka wan pisi ten, Yonette leri fa fu seti en libi baka èn fa fu taki moro bun nanga den pikin fu en. A leri sosrefi fu teki a yepi fu den bun mati fu en.

„A libi tan de wan warti kado”

Mati nanga famiriman di trutru wani yepi den sma disi, musu si sani na a yoisti fasi. A kan teki wan tu mun, noso yari srefi, taki a sma e firi tra fasi. Kande a e prisiri fu wan pisi ten, aladi a tiri èn firi brokosaka wan tra ten. A tru taki den sani di e ’moro en’, kan hebi gi en.—1 Kownu 8:38, 39.

Na ini den muilek pisi ten dati, a sma kan abi deki-ati fanowdu so taki a no e hari ensrefi puru fu a situwâsi di a de na ini now èn fu no hori ensrefi aparti. Furu sma di lasi den trowpatna na ini dede, ben man go doro nanga den libi fu di den kisi yepi na a fasi dati. Claude, wan evangelie preikiman na ini Afrika di abi 60 yari èn di lasi en wefi na ini dede, e taki: „A libi tan de wan warti kado, srefi efu yu sari srefisrefi taki yu lasi yu trowpatna na ini dede.”

A libi no de a srefi baka te wan sma en trowpatna dede. Ma toku, den sma disi di lasi den lobiwan na ini dede, kan du furu ete fu yepi trawan.—Preikiman 11:7, 8.

[Futuwortu]

[Prenspari pisi na tapu bladzijde 11]

Trutru mati de klariklari fu tan gi yepi

[Faki/​Prenki na tapu bladzijde 12]

Yu musu hori wan tu sani fu yu trowpatna di dede?

Helen, di lasi en masra na ini dede wan tu yari pasa, e taki: „Mi ben hori furu fu den sani fu mi masra. Mi feni taki den sani dati e memre mi na prisiri momenti. Mi no ben wani trowe den sani dati wantewante fu di a fasi fa yu e firi kan kenki baka wan pisi.”

Tra fasi leki dati, Claude, di lasi en wefi na ini dede moro leki feifi yari pasa, e taki: „Efu a de na mi, dan mi no abi den sani fu en fanowdu fu no frigiti en. Mi e feni taki fu di mi trowe den sani fu en, meki dati yepi mi fu teki a situwâsi fu mi soleki fa a de now èn a meki en moro makriki gi mi fu no sari moro.”

Den sani di skrifi na tapusei e sori fa sma e denki na difrenti fasi te a abi fu du nanga den sani fu a sma di dede. Fu dati ede, te a abi fu du nanga a tori disi, dan koni mati nanga famiriman no o pruberi fu dwengi a sma fu si sani soleki fa den e si sani.—Galasiasma 6:2, 5.

[Prenki na tapu bladzijde 9]

Na tapu sortu spesrutu dei yu kan yepi sma di lasi den trowpatna na ini dede?

[Prenki na tapu bladzijde 9]

No frigiti fu gi den wan kari fu go du wan sani

[Prenki na tapu bladzijde 10]

Kari den sma di lasi wan trowpatna na ini dede, fu yepi yu nanga wan tu sani noso fu abi prisiriten nanga yu