Aksi fu leisiman
Soleki fa wi sabi, dan Yehovah no wani taki sma anbegi popki. Ma fu san ede a no strafu Aron di a meki a gowtu pikin kaw?
Di Aron ben meki a gowtu pikin kaw, soleki fa Exodus kapitel 32 e sori, dan a pasa a wet fu Gado di e taki dati sma no musu anbegi popki (Ex. 20:3-5). Leki bakapisi fu dati, ’Yehovah ben wani kiri Aron fu di en ati ben bron srefisrefi nanga en. Ma na a ten dati Moses begi Gado gi Aron sosrefi’ (Deut. 9:19, 20). Di a reti-ati man Moses begi gi Aron, dan a de so taki a begi fu en ben abi „furu krakti”? (Yak. 5:16) Iya, soleki fa a sori, dan Yehovah piki a begi fu Moses èn a begi dati meki taki a no strafu Aron. Ma ete tu reide de fu san ede Yehovah no ben strafu Aron.
Wán reide, na taki Aron ben de wan sma di ben gwenti gi yesi na Gado. Di Moses ben kisi a wroko fu go na Farao èn fu tyari den Israelsma komoto na ini Egepte, dan Yehovah ben gi Aron a frantwortu fu go nanga Moses èn fu taki gi en (Ex. 4:10-16). Den tu man disi go na fesi Farao furu tron soleki fa Yehovah ben taigi den fu du, èn den du dati aladi Farao ben e weigri fu gi yesi na den. Sobun, di Aron ben de na ini Egepte, a kon abi wan bun nen na Yehovah fu di a ben e tan gi yesi na En.—Ex. 4:21.
Luku sosrefi fa a du kon taki Aron meki a gowtu pikin kaw. Moses ben de na tapu Sinaibergi 40 dei langa. Di „a pipel si taki Moses tan langa na tapu a bergi”, dan den kisi Aron so fara taki a meki wan falsi gado gi den. Aron du san den ben aksi fu en, èn a meki wan gowtu pikin kaw (Ex. 32:1-6). Ma den sani di Aron du bakaten, e sori taki a no ben feni en bun taki den sma ben e anbegi a popki. Soleki fa a sori, dan a ben brokokindi fu di sma ben dwengi en fu meki a popki. Fu eksempre, di Moses krutu na afersi di ben abi fu du nanga a falsi anbegi, dan ala den manpikin fu Leifi, sosrefi Aron, teki a sei fu Yehovah. Den kiri dri dusun falsi anbegiman di ben de frantwortu gi a falsi anbegi.—Ex. 32:25-29.
Baka dati, Moses taigi a pipel: „Unu du wan bigi sondu” (Ex. 32:30). Sobun, a no Aron wawan ben abi fowtu ini a tori disi. Yehovah sori sari-ati gi en, èn gi a pipel.
Baka a tori fu a gowtu pikin kaw, Yehovah gi a komando taki Aron ben musu tron granpriester. Gado ben taigi Moses: „Weri den santa krosi gi Aron èn salfu en meki a kon santa, so taki a kan wroko leki priester gi mi” (Ex. 40:12, 13). Disi e sori taki Yehovah ben gi Aron pardon fu a swakifasi fu en. Fu taki en leti, Aron no ben de wan man di ben e opo ensrefi teige Gado èn di ben e anbegi falsi Gado, ma a ben de wan man di ben e horibaka gi a tru anbegi.