Kon krosibei na Gado
„A suku fu du sani fu meki Yehovah en Gado feni en bun”
„MI BEN firi leki mi no warti noti”, na so wan man ben taki di ben gro kon bigi na ini wan osofamiri di ben e dini Gado. Di a bigin du sani fu drai en libi, a ben e frede taki Gado noiti no ben o gi en pardon. Ma a man disi di ben sondu èn di ben abi berow kisi trowstu fu a Bijbel tori di e taki fu Manase. A tori disi skrifi na ini 2 Kroniki 33:1-17. Efu wan leisi yu firi leki yu no warti fu di yu ben du wan sondu, dan yu tu kan kisi trowstu fu na eksempre fu Manase.
Manase ben gro kon bigi na ini wan osofamiri di ben e anbegi Gado. En papa Heskia, ben de wan fu den moro bun kownu fu Yuda. Manase gebore sowan dri yari baka di Gado ben meki wan wondru pasa fu meki en papa libi moro langa (2 Kownu 20:1-11). A no de fu taki dati Heskia ben si a manpikin disi leki wan presenti fu Gado di sori sari-ati gi en, èn a ben e pruberi fu leri en manpikin fu lobi a tru anbegi. Ma a no ala ten pikin di abi papa nanga mama di e anbegi Gado, o teki na eksempre fu den. Na so a ben de nanga Manase.
Manase no ben abi moro leki 12 yari di en papa dede. A de wan sari sani taki Manase „du sani di Yehovah no feni bun” (vers 1, 2). A de so taki den raiman di no ben abi lespeki gi a tru anbegi, ben abi krakti tapu a yongu kownu disi? Bijbel no e sori efu na dati ben pasa. Ma san Bijbel e taigi wi na taki Manase ben go so fara taki a ben e du tegu sani fu di a ben du afkodrei nanga ogridu. A ben bow altari gi falsi gado, a ben gi en eigi manpikin leki ofrandi, a ben e bonu, èn a ben poti wan popki na ini a tempel fu Yehovah na ini Yerusalem. A tranga-ede Manase ben weigri fu gi yesi na den warskow di a ben kisi ibri tron baka fu Yehovah, a Gado di ben meki taki wan wondru pasa so taki a ben man gebore.—Vers 3-10.
Te fu kaba, Yehovah gi pasi taki sma bui Manase tyari go na Babilon. Di Manase ben de drape na ini katibo, a ben abi na okasi fu denki fu den sani di a ben du. A de so taki now a ben si taki den falsi gado di no abi makti nanga libi no ben man kibri en? A ben denki fu den sani di en papa ben leri en fu Gado, di a ben de wan pikin? Awansi fa a no fa, Manase ben kenki a fasi fa a ben e tyari ensrefi. A tori e taki: „A suku fu du sani fu meki Yehovah en Gado feni en bun. A du ala san a ben man fu sori taki a ben saka ensrefi . . . Manase tan begi Gado” (vers 12, 13). Ma so wan man di ben du bigi sondu, trutru ben kan kisi pardon fu Gado?
Yehovah ben breiti srefisrefi di Manase sori trutru berow. Gado ben arki den begi fu en di Manase aksi en fu abi sari-ati nanga en, „èn a meki Manase drai go na Yerusalem pe a bigin tiri baka leki kownu” (vers 13). Fu sori taki a abi berow, Manase ben du san a man fu meki sani kon bun baka. A ben puru den falsi gado na ini a kondre èn a ben gi a pipel fu en deki-ati „fu dini Yehovah”.—Vers 15-17.
Efu yu e firi leki yu no warti fu kisi pardon fu Gado fu den sondu di yu ben du, dan meki na eksempre fu Manase gi yu deki-ati. A tori disi na wan pisi fu Gado Wortu di skrifi nanga yepi fu santa yeye (Romesma 15:4). A de krin fu si taki Yehovah wani wi fu sabi taki a de „klariklari fu gi sma pardon” (Psalm 86:5). A sani di de prenspari gi en, a no a sondu di wan sma du, ma na fa en ati de. Te wan sma di sondu e begi nanga en heri ati fu sori berow, te a e drai baka gi a fowtu fasi fa a ben e tyari ensrefi, èn te a e du ala san a man fu du san reti, dan ’a suku fu du sani fu meki Yehovah feni en bun’, neleki fa Manase ben du dati.—Yesaya 1:18; 55:6, 7.
A bun fu leisi a pisi disi fu Bijbel na ini yanuari: