A santa yeye e gi wi krakti te wi e kisi tesi, èn te wi e firi brokosaka
„Unu sa kisi krakti te a santa yeye kon na un tapu.”—TORI. 1:8.
1, 2. Sortu yepi Yesus ben pramisi den disipel fu en, èn fu san ede den ben o abi a yepi dati fanowdu?
YESUS ben sabi taki den disipel fu en ben o abi yepi fanowdu fu man du ala den sani di a ben taigi den fu du. Te wi e luku o bigi a preikiwroko ben de di den ben musu du, te wi e luku o tranga den gensman fu den ben de, èn te wi e luku fa densrefi ben swaki, dan a de krin taki den ben o abi yepi fanowdu fu wan moro makti sma. Sobun, syatu bifo Yesus go na hemel, a pramisi den disipel fu en a sani disi: „Unu sa kisi krakti te a santa yeye kon na un tapu, èn unu sa de kotoigi fu mi na ini Yerusalem, na ini heri Yudea nanga Samaria, èn te na den moro farawe presi fu grontapu.”—Tori. 1:8.
2 A pramisi dati bigin kon tru na a ten fu a Pinksterfesa fu a yari 33, di santa yeye gi den bakaman fu Yesus Krestes a krakti fu preiki a bun nyunsu na ini heri Yerusalem. Noti no ben man tapu a wroko dati (Tori. 4:20). „Ala dei te na a kaba fu a grontapu sistema”, den reti-ati bakaman fu Yesus, èn wi sosrefi, abi a krakti fu Gado en santa yeye tranga fanowdu.—Mat. 28:20.
3. San wi kan du nanga yepi fu a santa yeye fu Gado?
3 Yesus ben pramisi den disipel fu en taki ’den ben o kisi krakti te a santa yeye ben o kon na den tapu’. A de krin taki a santa yeye fu Gado kan gi sma deki-ati fu du sani, èn a kan gi den krakti. A kan gi wi a krakti fu tyari den frantwortu di wi abi leki Kresten, èn te a de fanowdu, a kan yepi wi tu fu kakafutu gi tesi di e miti wi.—Leisi Mika 3:8; Kolosesma 1:29.
4. San wi sa luku na ini na artikel disi, èn fu san ede?
4 Fa wi e kisi wini fu a krakti di wi e kisi fu a santa yeye? Fa a santa yeye kan abi krakti na wi tapu? Te wi e pruberi fu dini Gado nanga wi heri ati, dan wi sa kisi fu du nanga furu sani di kan meki wi trangayesi Yehovah. Dati kan kon fu di Satan e tesi wi, fu di wi e libi na ini a sistema fu en, èn fu di wi na sondu sma. A de prenspari taki wi e kakafutu gi den sani dati, fu man horidoro leki Kresten, fu man teki prati doronomo na a diniwroko, èn fu man tan abi wan bun matifasi nanga Yehovah. Meki wi go luku fa a santa yeye e yepi wi fu kakafutu gi tesi, èn fa a e yepi wi te wi weri èn te wi e firi brokosaka.
Wi e kisi krakti fu kakafutu gi tesi
5. Fa wi kan kisi krakti te wi e begi?
5 Yesus ben leri den bakaman fu en fu begi: „No meki wi kisi tesi, ma frulusu wi fu na ogriwan” (Mat. 6:13). Te reti-ati futuboi fu Yehovah e aksi en a sani disi, dan A no sa gowe libi den. Na wan tra okasi, Yesus ben taki dati „a Tata di de na hemel sa gi santa yeye na den sma di e aksi en” (Luk. 11:13). A de wan trowstu gi wi taki Yehovah e pramisi fu gi wi en santa yeye, so taki wi kan tan du san reti! Disi no wani taki dati Yehovah sa kibri wi so taki tesi no miti wi (1 Kor. 10:13). Ma te wi e kisi tesi, dan dati na a ten fu begi nanga moro faya.—Mat. 26:42.
6. San Yesus gebroiki fu gi piki tapu den tesi fu Satan?
6 Di Didibri ben e tesi Yesus, dan Yesus piki en nanga yepi fu Bijbeltekst. Yesus ben abi Gado Wortu krin na prakseri di a ben taki sani soleki: „Gado Buku taki . . . Agen Gado Buku taki . . . Gowe fu dya, Satan! Bika Gado Buku taki: ’Na Yehovah yu Gado, yu musu anbegi èn na en wawan yu musu dini.’” Fu di Yesus lobi Yehovah nanga a Wortu fu En, meki a ben man kakafutu gi den triki fu Satan, a sma di e tesi libisma (Mat. 4:1-10). Baka di Yesus tan kakafutu gi den tesi fu Satan, dan Satan gowe libi en.
7. Fa Bijbel e yepi wi fu kakafutu gi tesi?
7 Efu Yesus ben e frutrow tapu Gado Wortu fu man kakafutu gi den tesi fu Didibri, dan a no de fu taki dati wi musu du dati tu! Iya, fu man kakafutu gi Didibri nanga den bakaman fu en, dan wi musu abi a fasti bosroiti fu kon sabi den markitiki fu Gado bun, èn wi musu hori wisrefi finifini na den. Furu sma di studeri Bijbel kisi warderi gi a koni nanga a regtfardikifasi fu Gado, èn na so den bigin hori densrefi na Bijbel gronprakseri. Fu tru, „a wortu fu Gado” e gi wi krakti di e yepi wi fu si krin „san na ati e denki èn san a abi na prakseri” (Hebr. 4:12). O moro wan sma e leisi Gado Wortu èn e denki dipi fu den sani di a leri, o moro a sa kon frustan taki ’Yehovah na wan Gado di e taki tru ala ten’ (Dan. 9:13). Fu di dati de so, meki a bun te wi e denki dipi fu Bijbeltekst di abi fu du nanga den swakifasi fu wi.
8. Fa wi kan kisi a santa yeye?
8 Soleki fa wi si, dan Yesus ben man kakafutu gi tesi fu di a ben sabi den Santa Buku fu Bijbel. Ma wan tra reide fu san ede a ben man kakafutu gi tesi, na fu di a ben „furu nanga santa yeye” (Luk. 4:1). Fu man abi a srefi krakti dati èn fu man handri neleki en, dan wi musu kon krosibei na Yehovah. Fu dati ede, wi musu kisi wini dorodoro fu ala den sani di Yehovah seti gi wi so taki wi kan kisi a santa yeye fu en (Yak. 4:7, 8). Iya, wi musu studeri Bijbel, wi musu begi, èn wi musu abi demakandra nanga wi Kresten brada nanga sisa. Furu sma kon si tu taki a e tyari wini kon gi den te den abi furu fu du na ini a Kresten diniwroko. Disi e yepi den fu tan poti prakseri na sani di e tranga a bribi fu den.
9, 10. (a) Sortu tesi e miti Kresten na ini a kontren fu yu? (b) Te yu e denki dipi fu sani èn te yu e begi, dan fa dati kan yepi yu fu kakafutu gi tesi awinsi yu weri?
9 Gi sortu tesi yu musu kakafutu? Oiti yu prakseri fu skèin wan sma aladi yu trow kaba? Efu yu no trow, dan oiti yu kisi a firi fu freiri nanga wan sma di no de na bribi? Te wi leki Kresten e luku telefisi noso te wi de tapu Internet, dan wantronso wi kan kisi tesi fu luku sani di no fiti. A sani dati pasa nanga yu? Efu dati de so, dan san yu du? A ben o bun fu denki dipi fa wan fowtu di yu e meki, kan abi leki bakapisi taki yu e du wan seryusu sondu (Yak. 1:14, 15). Prakseri fa a o hati Yehovah, a gemeente, nanga yu famiriman te yu du wan seryusu sondu. Ma te yu e hori yusrefi na den gronprakseri fu Gado, dan yu sa abi wan krin konsensi. (Leisi Psalm 119:37; Odo 22:3.) Te yu e kisi den sortu tesi dati, dan abi a fasti bosroiti fu begi Gado fu gi yu a krakti fu kakafutu gi tesi.
10 Wan tra sani de di wi musu hori na prakseri te a abi fu du nanga a fasi fa Didibri e tesi wi. Baka di Yesus ben faste 40 dei na ini a sabana, dan Satan go na en. A no de fu taki dati Didibri ben denki taki dati ben de a „moro bun ten” fu tesi Yesus (Luk. 4:13). Satan e suku a moro bun ten fu tesi wi. Fu dati ede, a de tumusi prenspari taki wi tan abi wan tranga bribi. Nofo tron Satan e tesi wan sma te a e si pe a sma swaki. Sobun, te wi weri noso te wi e firi brokosaka, dan wi musu abi wan moro fasti bosroiti fu begi Yehovah fu kibri wi èn fu gi wi en santa yeye.—2 Kor. 12:8-10.
Wi e kisi krakti te wi weri èn te wi e firi brokosaka
11, 12. (a) Fu san ede furu sma e firi brokosaka na ini a ten disi? (b) San kan gi wi a krakti fu horidoro te wi e firi brokosaka?
11 Fu di wi na sondu libisma, meki wi e firi brokosaka son leisi. Disi de so spesrutu na ini a ten disi di e gi sma furu broko-ede. A kan taki a ten di wi e libi na ini, na a moro muilek ten di libisma oiti ondrofeni (2 Tim. 3:1-5). O moro Armagedon e kon krosibei, o moro na ekonomia na grontapu e go na baka, o moro broko-ede wi e kisi, èn o moro problema e opo kon. Fu dati ede a no musu fruwondru wi taki a e kon moro muilek gi son sma fu sorgu gi na osofamiri fu den. Den sma disi weri, den e firi leki wan lo hebi de na den tapu, èn den e firi leki den no man moro. Efu na so yu e firi, dan san kan yepi yu nanga den problema fu yu?
12 Hori na prakseri taki Yesus gi den disipel fu en a dyaranti taki a ben o gi den wan yepiman, namku a santa yeye fu Gado. (Leisi Yohanes 14:16, 17.) Dati na a moro bigi krakti na hemel èn na grontapu. Nanga yepi fu a santa yeye, Yehovah kan gi wi krakti ’moro leki san wi e aksi en’, so taki wi kan horidoro awinsi sortu tesi wi e kisi (Ef. 3:20). Na apostel Paulus ben taki dati te wi e frutrow na tapu a santa yeye, dan wi sa kisi „krakti di bigi pasa marki”, awinsi „wi e kisi kwinsi na ala fasi” (2 Kor. 4:7, 8). Yehovah no pramisi wi taki a o puru den problema na pasi, ma a e gi wi a dyaranti taki a sa gi wi krakti nanga yepi fu a yeye fu en, so taki wi kan pasa den tesi dati.—Fil. 4:13.
13. (a) Fa wan yongu sisa kisi krakti fu horidoro na ini wan muilek situwâsi? (b) Yu sabi tra sma di e horidoro na ini muilek situwâsi?
13 Luku na eksempre fu Stephanie, wan gewoon pionier di abi 19 yari. Di a ben abi 12 yari, brudu naki en, èn datra kon si taki wan sani ben e gro na ini en ede. Sensi a ten dati, a du tu oparâsi, a kisi wan tra sortu datrayepi, èn ete tu leisi brudu naki en. A sani disi meki taki a kruktu-anusei fu en skin ben kon lan pikinso, èn a no ben man si bun tu. Stephanie musu gebroiki en krakti gi sani di prenspari gi en, èn dati na sani soleki Kresten konmakandra èn a preikiwroko. Toku a e firi taki Yehovah e gi en a krakti fu horidoro na difrenti fasi. Den Bijbel publikâsi di abi ondrofenitori fu tra Kresten gi en deki-ati di a ben e firi brokosaka. Brada nanga sisa seni brifi gi en fu gi en deki-ati, èn na den konmakandra den taki nanga en fu gi en deki-ati. Sma di wani sabi moro fu Bijbel sori warderi tu gi den sani di Stephanie e leri den, èn fu dati ede den e go na en oso so taki a kan studeri Bijbel nanga den. Stephanie e taki Yehovah tangi gi ala den sani disi. A Bijbeltekst di a lobi na Psalm 41:3, èn a e bribi taki a psalm dati kon tru na ini a situwâsi fu en.
14. San wi no musu du te wi e firi brokosaka, èn fu san ede?
14 Te wi weri, noso te wi abi broko-ede, dan noiti wi musu denki taki wi sa firi frulekti te wi no e teki prati so furu moro na a diniwroko. Dati na a moro don sani di wi ben kan du. Fu san ede? Fu di na te wi e studeri Bijbel, te wi e studeri nanga wi osofamiri, te wi e teki prati na a preikiwroko, èn te wi e go na den gemeente konmakandra, dan wi sa kisi krakti fu a santa yeye. A Kresten diniwroko ala ten e gi wi krakti baka. (Leisi Mateyus 11:28, 29.) A pasa furu leisi taki brada nanga sisa kon na den gemeente konmakandra aladi den weri, ma te a ten doro fu go na oso, dan a gersi leki den kisi nyun krakti baka!
15. (a) A de so taki Yehovah pramisi Kresten taki a libi fu den sa de sondro problema? Fruklari dati nanga yepi fu Bijbel. (b) San Gado pramisi wi, èn sortu aksi e opo kon?
15 A no de fu taki dati a no makriki ala ten fu de wan Kresten. Wan Kresten musu meki muiti fu tan gi yesi na Gado (Mat. 16:24-26; Luk. 13:24). Toku nanga yepi fu a santa yeye, Yehovah kan gi krakti na den wan di weri. A profeiti Yesaya ben skrifi: „Den wan di no abi krakti a e meki kon tranga srefisrefi. Den boi o kon weri èn den o lasi krakti, èn den yonkuman o stotu den futu, ma den wan di e frutrow na tapu Yehovah o kisi krakti baka. Den o frei hei neleki den abi frei fu aka. Den o lon, ma den no o kon weri. Den o waka, ma den no o lasi krakti” (Yes. 40:29-31). Fu di dati de so, meki a bun fu aksi wisrefi a sani disi: San e meki trutru taki Kresten e kon si a diniwroko fu den leki wan hebi?
16. San wi kan du fu sorgu taki wi no e kon weri tumusi, èn taki wi no e firi brokosaka?
16 A Wortu fu Yehovah e gi wi a rai fu „kon sabi san na den moro prenspari sani” (Fil. 1:10). Na apostel Paulus ben agersi a Kresten libi leki wan langa streilon, èn nanga yepi fu santa yeye a gi wi a rai disi: „Meki wi sosrefi puru ala hebi na wi tapu . . . , èn meki wi horidoro te wi e lon a streilon di de na wi fesi” (Hebr. 12:1). San a ben wani taigi wi, na taki wi no musu suku fu du sani di no de prenspari, di e aksi tumusi furu fu wi, èn di e meki wi kon weri. Kande sonwan fu wi e pruberi fu du tumusi furu sani, aladi wi abi furu fu du kaba. Sobun, efu yu weri furu tron èn efu yu feni taki yu abi tumusi furu fu du, dan a ben o bun fu luku efu a grontapuwroko fu yu no e aksi tumusi furu fu yu. Kande yu musu luku tu efu yu e go nanga fakansi tumusi furu, efu yu e gebroiki tumusi furu ten fu du sport, noso fu du tra sani. Te wi alamala e hori na prakseri taki wi no man du ala sani, èn te wi no e fruwakti tumusi furu fu wisrefi, dan wi no sa teki tumusi furu frantwortu na wi tapu.
17. Fu san ede son Kresten ben kan firi brokosaka, ma sortu dyaranti Yehovah e gi wi?
17 A kan taki sonwan fu wi e firi brokosaka pikinso fu di a kaba fu a sistema disi no kon ete (Odo 13:12). Ma iniwan sma di e firi so, kan kisi deki-ati fu den wortu di skrifi na Habakuk 2:3: „A fisyun o kon tru na wan spesrutu ten. A e hasti ensrefi fu doro na a kaba èn a no de wan leitori. Un musu tan fruwakti en awinsi a no pasa ete, bika a o kon tru nomonomo. A no o kon lati.” Yehovah e gi wi a dyaranti taki a kaba fu a sistema sa kon na a yoisti ten!
18. (a) Sortu pramisi e gi yu deki-ati? (b) Fa wi sa kisi wini fu a tra artikel?
18 A no de fu taki dati den reti-ati futuboi fu Yehovah e angri gi a dei te den no sa weri moro èn te den no sa firi brokosaka moro, èn te ala sma di de na libi sa ’abi krakti neleki di den ben yongu’ (Yob 33:25). Nownow kaba a santa yeye kan gi wi krakti nanga deki-ati te wi e teki prati na sani di e tranga a bribi fu wi (2 Kor. 4:16; Ef. 3:16). No gi pasi taki yu e misi den têgo blesi, soso fu di yu weri. Te fu kaba wi no sa kisi nowan enkri tesi moro, iya, wi no sa angri fu du sani di no fiti, wi no sa weri, èn wi no sa firi broko saka. Kande wan kaba no e kon na den sani dati nownow, ma dati o pasa na ini a nyun grontapu fu Gado. Na ini a tra artikel wi sa luku fa a santa yeye e gi Kresten krakti fu kakafutu gi frufolgu èn gi speri di e dwengi den fu du san no bun, èn fa a e yepi den fu horidoro te den e kisi tra problema.
San yu ben sa piki?
• Te wi e leisi Bijbel, dan fa dati e gi wi krakti?
• Te wi e begi èn e denki dipi fu sani di wi e leri, dan fa dati e gi wi krakti?
• San yu kan du fu sorgu taki yu no e lasi-ati?
[Prenki na tapu bladzijde 24]
Den Kresten konmakandra kan tranga a bribi fu wi