Gado ben lobi en èn den mati fu en ben lobi en tu

NOWAN sma na ini a ten disi sabi a nen fu en. Now sma sabi nomo taki en papa ben nen Yefta. Meki wi go luku na ini Bijbel fu leri moro fu den tu sma disi. Wi o kon si taki Gado ben lobi na umapikin fu Yefta èn den mati fu en ben lobi en tu.

Wi kan leisi a tori fu Yefta nanga en umapikin na ini a Bijbel buku Krutuman kapitel 11. Fu di Yefta ben de wan futuboi fu Gado di ben gi yesi na en, meki a musu de so, taki doronomo a ben taki fu den buku fu Bijbel nanga en umapikin.

Yefta ben libi fosi a ten di den Israelsma, di ben de a pipel fu Gado, ben aksi En fu kisi wan libisma kownu fu tiri den. Yefta ben de wan tranga man di ben sabi feti. Fu dati ede den Israelsma ben aksi en fu teki fesi te den ben o go feti nanga den Amonsma, wan pipel di ben libi krosibei fu den èn di ben e feti nanga den Israelsma.

Yefta ben wani taki Gado yepi en fu wini den Amonsma, èn fu dati ede a ben meki wan pramisi. Yefta ben taki dati efu Yehovah ben o meki a wini a feti èn a ben o drai kon baka na oso, dan a ben o gi Yehovah a fosi sma di ben o komoto na ini en oso fu kon miti en. A sma dati ben o dini en heri libi langa na ini a tabernakel fu Gado, noso a presi pe a pipel ben e anbegi Gado na ini a ten dati. Yu sabi suma ben de a fosi sma di kon miti Yefta?—a

Iya, na a umapikin fu Yefta! Yefta ben sari srefisrefi. A ben abi wán pikin nomo. Ma a ben pramisi Yehovah wan sani èn a ben musu hori ensrefi na san a pramisi. Wantewante en umapikin ben taki: „Mi papa, efu yu opo yu mofo pramisi Yehovah wan sani, dan yu musu du nanga mi soleki fa yu pramisi en”. Baka dati, a aksi efu a ben kan de en wawan tu mun langa na den bergi, pe a ben o krei. Fu san ede a ben sari? Fu di a ben hori ensrefi na san en papa ben pramisi, meki a no ben o man trow èn meki pikin. Toku na umapikin fu Yefta no ben si den sani di a wani leki den moro prenspari sani. A ben wani gi yesi na en papa èn sosrefi na Yehovah. Yu denki taki Yehovah nanga en papa ben breiti nanga en?—

Fu dati ede, Yefta gi en umapikin primisi fu gowe tu mun langa nanga den mati fu en. Di a drai kon baka, en papa du san a pramisi fu di a seni en go na a tabernakel fu Gado na Silo. Drape a tan en heri libi langa. Ibri yari, den yongu uma fu Israel ben gwenti go na Silo pe den ben e gi na umapikin fu Yefta deki-ati.

Yu sabi yonguwan di e gi yesi na den papa nanga mama èn di lobi Yehovah?— A ben o bun fu kon sabi den pikin dati moro bun èn fu tron mati fu den. Te yu e teki na eksempre fu na umapikin fu Yefta èn yu e tan gi yesi, dan yu o abi bun mati tu. Yu o meki yu papa nanga mama breiti èn Yehovah o lobi yu tu.