Un musu de srekasreka!

„Un musu de srekasreka tu, bika a Manpikin fu libisma o kon na wan yuru di unu no ben prakseri.”​—MAT. 24:44.

1, 2. (a) Soleki fa Bijbel profeititori e sori, dan sortu sani o pasa di wi kan agersi nanga wan tigri di e suku fu kiri sma? (b) San wi musu du fu man de srekasreka te Krestes e kon fu strafu a grontapu fu Satan?

FURU yari langa, wan pôpi man ben e hori show gi sma nanga den bigi tigri fu en di ben leri fu gi yesi na en. A man disi ben taki: „Te wan meti e frutrow yu, dan yu e firi leki yu kisi a moro bigi kado di yu ben kan kisi oiti.” Ma tapu 3 oktober 2003, wan sani pasa di a no ben fruwakti. Wan fu den tigri fu en beti en, aladi a no ben sabi fu san ede. A tigri dati ben de wan wetiwan fu 172 kilo. Fu taki en leti, a man no ben fruwakti srefisrefi taki a sani disi ben o pasa nanga en, èn fu dati ede a no ben de srekasreka.

² A moi fu sabi taki Bijbel e sori taki wan „ogri meti” o kiri wan sma, èn wi musu de srekasreka. (Leisi Openbaring 17:15-18.) Suma na ogri meti o kiri? Fu di sani o kenki wantronso, meki wan prati o kon na ini a grontapu fu Didibri. A redi ogri meti e prenki den Verenigde Naties, èn „den tin tutu” e prenki ala den politiek tirimakti. Den seti disi o kisi bita-ati gi a huru-uma, Babilon a Bigiwan, di e prenki a grontapumakti fu falsi anbegi, èn den o pori en na wan ogri-ati fasi. O ten disi o pasa? Wi no sabi a dei noso a yuru (Mat. 24:36). Ma wi sabi taki a o pasa na wan ten di wi no ben fruwakti èn wi sabi tu taki a ten kon syatu (Mat. 24:44; 1 Kor. 7:29). Dati meki a de tumusi prenspari taki wi de srekasreka. Na so wi o kisi frulusu te na ogri meti o kon fu pori Babilon a Bigiwan, èn te Krestes o kon fu strafu a grontapu fu Satan! (Luk. 21:28) Wan sani di o yepi wi fu de srekasreka, na te wi e teki leri fu den reti-ati futuboi fu Gado di ben de srekasreka, so taki den ben man si a kontru fu den pramisi fu en. Wi sa teki leri fu den ondrofenitori disi di pasa trutru?

De srekasreka neleki Noa

3. Sortu situwâsi ben e meki en muilek gi Noa fu anbegi Gado nanga en heri ati?

³ Aladi a situwâsi na grontapu ben takru srefisrefi di Noa ben de na libi, toku a ben de srekasreka fu si a kontru fu a pramisi fu Gado. Prakseri den tesi di ben miti Noa, di trangayesi engel di ben teki libisma skin, kon libi nanga den moi uma fu grontapu! Fu di a no ben fiti taki engel ben e libi nanga libisma, meki den ben e kisi pikin di ben bigi srefisrefi èn di ben e gebroiki a bigi krakti fu den fu pina trawan. Bijbel e kari den pikin disi „tranga man” (Gen. 6:4). Prakseri den ogri-ati sani di pasa fu di den bigi hipsi man disi ben e tyari bruya kon na iniwan presi pe den ben e go. A sani dati meki taki ogridu kon lai na heri grontapu, èn te fu kaba, libisma bigin denki èn handri na wan fasi di no ben fiti kwetikweti. Dati meki, a Moro Hei Masra Yehovah poti wan ten fu pori den ogri sma dati.​—Leisi Genesis 6:3, 5, 11, 12.a

4, 5. Fa a situwâsi na ini a ten disi de leki a di fu a ten fu Noa?

⁴ Yesus ben taki dati a situwâsi na ini a ten disi ben o de a srefi leki a di fu a ten fu Noa (Mat. 24:37). Fu eksempre, wi e si tu taki ogri yeye abi krakti tapu sma (Openb. 12:7-9, 12). Na ini a ten fu Noa, den ogri yeye disi ben teki libisma skin. Aladi den no man teki libisma skin moro, toku den e pruberi fu abi krakti tapu yonguwan nanga owruwan. Sondro fu sma sabi, den ogri-ati engel disi e kisi prisiri fu den fisti èn takru sani di den sma di den man kori e du.​—Ef. 6:11, 12.

⁵ Gado Wortu e taki dati Didibri na „wan kiriman”, èn taki a „man kiri sma” (Yoh. 8:44; Hebr. 2:14). Disi no wani taki dati a man kiri iniwan sma di a wani kiri. Ma na ogri yeye disi e gi sma deki-ati fu kori trawan. A abi krakti tapu na ati nanga a denki fu sma, so taki den e prakseri fu kiri trawan. Fu di a de so taki so furu ogri e pasa na ala sei, dan yu denki taki Yehovah no sa handri neleki fa a ben du dati na ini a ten fu Noa?

6, 7. Fa Noa nanga en osofamiri sori taki den ben abi wan tranga bribi èn taki den ben abi frede gi Gado?

⁶ Bakaten, Noa kon sabi taki Gado ben bosroiti fu tyari wan frudu kon na grontapu fu pori ala libisani (Gen. 6:13, 17). Yehovah taigi Noa fu bow wan ark di ben musu gersi wan bigi kisi. Noa nanga en osofamiri bigin du a wroko dati. San yepi den fu gi yesi na Gado èn fu de srekasreka di a ten ben doro taki Gado strafu grontapu?

⁷ Fu di Noa nanga en osofamiri ben abi tranga bribi èn fu di den ben abi frede gi Gado, meki den du san Gado ben taigi den (Gen. 6:22; Hebr. 11:7). Leki famiri-edeman, Noa tan abi wan bun matifasi nanga Gado èn a no ben abi noti fu du nanga a kruktudu fu a grontapu dati fu owruten (Gen. 6:9). A ben sabi taki en osofamiri ben musu luku bun fu no teki den fasi abra fu den trangayesi sma na den lontu di ben lobi du ogri. A ben de prenspari taki den no ben e poti ala den prakseri na den aladei afersi fu a libi. Gado ben gi den wan wroko fu du, èn a ben de tumusi prenspari taki a heri osofamiri ben e poti a wroko dati na a fosi presi na ini den libi.​—Leisi Genesis 6:14, 18.

Noa nanga en osofamiri ben de srekasreka

8. Sortu sani e sori taki den memre fu Noa en osofamiri ben e anbegi Gado nanga den heri ati?

⁸ Bijbel e poti furu prakseri na a famiri-edeman Noa, ma Noa en wefi, den manpikin fu en, nanga den wefi fu den, ben e anbegi Yehovah tu. A profeiti Esekièl ben sori taki a sani disi tru. Esekièl ben taki dati efu Noa ben e libi na ini a srefi ten leki en, dan en pikin no ben o kisi frulusu leki bakapisi fu a regtfardikifasi fu a papa fu den. Den ben bigi nofo fu bosroiti efu den ben o gi yesi na Gado. Fu dati ede, ibriwan fu den ben sori taki den ben lobi Gado nanga den pasi fu en (Esek. 14:19, 20). Noa en osofamiri ben du san a ben e taigi den, den ben e anbegi a srefi Gado leki en, èn den no gi pasi taki trawan tapu den fu du a wroko di Gado ben gi den fu du.

9. Sortu eksempre wi abi na ini a ten disi fu sma di abi bribi neleki Noa?

⁹ A e gi wi deki-ati trutru fu si taki na ini na organisâsi fu wi di de na heri grontapu, famiri-edeman e du ala san den man fu de leki Noa! Den sabi taki awinsi den man sorgu taki na osofamiri fu den kisi nyanyan, krosi fu weri, wan tanpresi, nanga skoroleri, toku dati a no ala. Den musu sorgu tu taki na osofamiri fu den e kisi leri fu Gado. Te den e du den sani disi, dan den sa de srekasreka gi den sani di Yehovah o du heri esi.

10, 11. (a) Di Noa nanga en osofamiri ben de na ini na ark, dan fa den ben musu fu firi? (b) Sortu sani wi musu aksi wisrefi?

¹⁰ Kande Noa, en wefi, en manpikin, nanga den wefi fu den ben wroko sowan 50 yari langa fu bow na ark. Di den ben e du a wroko disi, dan a kan taki den ben go-kon na ini na ark hondrohondro leisi. Den ben sorgu taki a no ben e leki, den ben lai nyanyan na ini, èn den tyari den meti go na inisei. Prakseri fa sani ben waka. Tapu a di fu 17 dei fu a yari 2370 bifo Krestes, a bigi dei ben doro, èn den go na ini na ark. Yehovah tapu a doro èn alen bigin fadon. Disi no ben de wan bigi alen leki den wan di wi sabi. A ben de neleki wan bigi se ben e fadon komoto na hemel kon na tapu na ark (Gen. 7:11, 16). Sma na dorosei fu na ark ben e dede, aladi den wan na inisei ben e kisi frulusu. Fa yu denki taki Noa nanga en osofamiri ben e firi? A no de fu taki dati den ben de nanga bigi tangi taki Gado ben frulusu den. Ma a ben musu fu de so taki den ben e denki: ’Wi breiti srefisrefi taki wi waka nanga a tru Gado èn taki wi ben de srekasreka!’ (Gen. 6:9) Yu e si kaba fa yu ati sa furu nanga warderi te yu pasa Armagedon?

¹¹ Noti no kan tapu na Almaktiwan fu tyari wan kaba kon na a sistema disi fu Satan, soleki fa a pramisi. Aksi yusrefi a sani disi: ’Mi abi a tranga overtoigi taki ala den pramisi fu Gado o kon tru dorodoro èn na a yoisti ten?’ Efu dati de so, dan tan hori „a dei fu Yehovah” na prakseri, so taki yu kan de srekasreka gi a dei disi di e kon heri esi.​—2 Petr. 3:12.

Moses ben tan na ai

12. Sortu sani ben kan puru Moses en prakseri fu den sani di Gado ben pramisi?

¹² Meki wi poti prakseri na wan tra eksempre. Te yu e luku en bun, dan Moses ben abi wan kefalek hei posisi na ini Egepte. Fu di na umapikin fu Farao ben teki Moses leki en eigi pikin, meki wi kan fruwakti taki sma ben abi bigi lespeki gi en. Wi kan fruwakti tu taki a ben e nyan den moro switi nyanyan, a ben e weri den moro moi krosi, èn a ben e libi na wan tumusi moi presi. A ben leri furu difrenti sani. (Leisi Tori fu den Apostel 7:20-22.) Kande a ben o kisi wan bigi famiri gudu.

13. Fa Moses tan hori den pramisi fu Gado na prakseri?

¹³ Soleki fa a sori, dan Moses ben kisi leri frukufruku kaba fu en papa nanga mama, èn na so a ben man si taki a falsi anbegi fu den Egeptesma ben de fu soso (Ex. 32:8). A skoroleri fu Egepte nanga a gudu libi fu a kownu-oso, no meki taki Moses drai baka gi a tru anbegi. A ben musu de so taki a ben denki dipi fu den sani di Gado ben pramisi den afo fu en, èn a ben e angri trutru fu du a wani fu Gado. Fu taki en leti, Moses ben taigi den manpikin fu Israel: „Yehovah . . . a Gado fu Abraham, a Gado fu Isak, nanga a Gado fu Yakob seni mi kon na unu.”​—Leisi Exodus 3:15-17.

14. Na ini sortu situwâsi Moses ben musu sori bribi nanga deki-ati?

¹⁴ Tra fasi leki den popki di ben e prenki den gado fu Egepte di no ben abi libi, Moses ben e si Yehovah, a tru Gado, leki wan libilibi Gado. A ben e libi neleki a ben man si „a Sma di wi no man si nanga ai”. Moses ben e bribi taki Gado ben o frulusu a pipel fu en, ma a no ben sabi o ten dati ben o pasa (Hebr. 11:24, 25, 27). Moses ben wani trutru taki den Hebrewsma kon fri. Wi kan si dati te wi e luku fa a opo feti gi wan srafu fu Israel di ben e kisi hebi fonfon (Ex. 2:11, 12). Ma a ten no ben doro ete gi Yehovah fu fri a pipel. Fu dati ede, Moses ben musu libi leki wan loweman na ini wan farawe kondre. A no de fu taki dati a ben muilek gi en fu gowe libi a switi libi di a ben abi na ini a kownu-oso fu Egepte, fu go tan na ini a gran sabana. Ma toku Moses ben de srekasreka, fu di a du iniwan sani di Yehovah ben taigi en fu du. Na so Gado ben kan gebroiki en fu tyari frulusu kon gi den Israelsma, baka di a ben libi 40 yari langa na ini Midian. Moses drai go baka na Egepte, soleki fa Gado ben taigi en fu du. A ten ben doro gi Moses fu du wan wroko di Gado ben o gi en èn a ben o musu du a wroko dati na a fasi fa Gado ben wani (Ex. 3:2, 7, 8, 10). Di Moses, „a moro safri-ati sma na heri grontapu” drai go baka na Egepte, dan a ben abi bribi nanga deki-ati fanowdu fu go na fesi Farao (Num. 12:3). A no du dati wán leisi nomo, ma a go ibri tron baka na Farao fu taigi en sortu strafu ben o kon tapu a pipel, aladi a no ben sabi omeni leisi a ben o abi fu go baka na fesi Farao.

15. San meki taki Moses tan suku okasi fu gi grani na en hemel Tata, aladi a ben e kisi fu du nanga problema?

¹⁵ Na ini den fotenti yari baka dati, namku fu 1513 bifo Krestes te go miti 1473 bifo Krestes, difrenti sari sani miti Moses. Toku a ben e suku okasi fu gi grani na Yehovah èn a ben e gi den Israelsma deki-ati fayafaya fu du dati tu (Deut. 31:1-8). Fu san ede? Fu di a ben e horibaka fayafaya gi a nen fu Yehovah èn gi a reti di a abi fu tiri ala sani. Gi en den sani dati ben prenspari moro leki den grani di a ben kan kisi (Ex. 32:10-13; Num. 14:11-16). Aladi problema e miti wi, toku wi musu tan horibaka gi a tiri fu Gado, èn wi musu abi na overtoigi taki a fasi fa a e du sani na a moro koni fasi, a moro reti fasi, èn a moro bun fasi (Yes. 55:8-11; Yer. 10:23). Na so yu e denki tu?

Tan na ai!

16, 17. Fu san ede Markus 13:35-37 prenspari gi yu?

¹⁶ „Tan luku, tan na ai, bika unu no sabi o ten a reti ten de” (Mark. 13:33). Yesus ben gi wi a warskow dati di a ben e taki fu a marki di abi fu du nanga a kaba fu na ogri sistema disi. Prakseri den lasti wortu fu a prenspari profeititori fu Yesus di Markus ben skrifi. A ben taki: „Tan na ai, bika unu no sabi o ten a masra fu na oso o kon, efu a o kon na neti, lati neti, mindrineti, noso musudei; no meki a de so taki te a kon wantronso, a e si unu e sribi. Iya, san mi e taigi unu, mi e taigi ala sma: Tan na ai.”​—Mark. 13:35-37.

¹⁷ A warskow di Yesus gi wi e poti wi na prakseri. A ben taki fu fo pisi fu a neti te waktiman ben e koti wakti. A lasti pisi ben o de wan muilek pisi fu tan na ai, fu di a ben teki fu dri yuru mamanten te go miti son-opo. Sma di sabi fa fu feti orloku, e taki dati a pisi ten dati na a moro bun ten fu go feti nanga wan feanti. Nofo tron a de so taki na a pisi ten dati a feanti e „sribi”. Na so a de tu taki te grontapu de na ini wan dipi sribi na agersi fasi, dan dati kan meki en moro muilek gi wi fu tan na ai. Wi e tweifri taki wi musu „tan luku” èn taki wi musu „tan na ai” gi a kaba di o kon èn gi a frulusu di wi o kisi?

18. Sortu bigi grani wi leki Yehovah Kotoigi abi?

¹⁸ A man na a bigin fu na artikel no dede di a tigri beti en. Ma Bijbel profeititori e sori krin taki falsi bribi nanga a grontapu sistema disi no o man wai pasi gi a kaba di o kon (Openb. 18:4-8). Meki a de so taki ala den futuboi fu Gado, yonguwan nanga owruwan, e frustan o prenspari a de fu teki na eksempre fu Noa nanga en osofamiri. Iya, meki wi du ala san wi man fu de srekasreka gi a dei fu Yehovah. Wi e libi na ini wan grontapu di e gi Gado porinen èn pe sma e leri trawan sani di no e kruderi nanga Bijbel. Boiti dati, sma e leri trawan tu fu bribi taki Gado no e broko en ede nanga libisma, èn taki Gado no de. Ala den sma disi e spotu Gado nanga den sani di den e taki. Ma wi no kan gi pasi taki den sani disi abi krakti na wi tapu. Meki wi hori den eksempre di wi luku bun na prakseri, èn meki wi tan suku okasi fu opo taki gi Yehovah èn fu gi glori na en leki „a Gado fu ala gado”. Iya, en na a „Gado di bigi srefisrefi, a tranga, èn sma musu abi bigi lespeki gi en”.​—Deut. 10:17.

[Futuwortu]

Yu e memre disi ete?

• Fu san ede Noa ben musu sorgu taki en osofamiri ben e tan abi wan bun matifasi nanga Gado?

• Fa a ten di wi e libi na ini de a srefi leki a ten fu Noa?

• Fu san ede Moses tan poti prakseri na den pramisi fu Yehovah, aladi sari sani miti en?

• Sortu Bijbel profeititori e gi yu deki-ati fu tan na ai?

[Prenki na tapu bladzijde 25]

Noa nanga en osofamiri tan poti prakseri na a wroko di Yehovah ben gi den fu du

[Prenki na tapu bladzijde 26]

Den pramisi fu Gado di ben o kon tru seiker, yepi Moses fu tan na ai