Kon krosibei na Gado

„Yehovah na mi Skapuman”

LUKU a prenki na tapu a bladzijde disi. Yu man frustan fa a pikin skapu e firi aladi a skapuman e hori en na en borsu? Na ini Psalm 23, Bijbel e gebroiki na eksempre fu wan skapuman nanga den skapu fu en fu prenki a lobi-ati fasi fa Yehovah e sorgu gi den anbegiman fu en. Yehovah wani taki wi abi wan korostu firi neleki a psalm skrifiman David, di ben taki nanga overtoigi: „Yehovah na mi Skapuman.”a​—Vers 1.

David, a skrifiman fu a psalm disi, ben de wan skapuman di a ben yongu. A ben sabi san skapu abi fanowdu èn a ben sabi den frantwortu fu wan skapuman. David di ben ondrofeni fa Yehovah sorgu bun gi en, ben skrifi a psalm disi di sma e kari „wan psalm di e gi wan korostu firi nanga deki-ati”. Yehovah, a nen fu Gado, skrifi na a bigin èn na a kaba fu a psalm (vers 1, 6). Den wortu fu a psalm e taki fu dri fasi fa Yehovah e sorgu gi a pipel fu en, neleki fa wan skapuman e sorgu gi den skapu fu en.​—Psalm 100:3.

Yehovah e tiri den skapu fu en. Skapu di no abi wan skapuman kan lasi makriki. Na a srefi fasi wi abi yepi fanowdu fu man feni a yoisti pasi na ini a libi (Yeremia 10:23). David e taki dati Yehovah e tyari en pipel go na „wei pe furu grasi e gro” èn na „presi pe furu watra e lon”. A e ’yepi den fu libi na wan reti fasi’ (vers 2, 3). Te wi e prakseri den sani disi, dan dati e gi wi a dyaranti taki wi kan frutrow na tapu Gado. Te wi e teki a tiri fu Gado di wi e kisi nanga yepi fu Bijbel, dan wi o du muiti fu libi na wan fasi di o meki wi de tevrede, di o gi wi krakti baka, èn di o gi wi a firi taki sani o waka bun.

Yehovah e kibri den skapu fu en. Skapu di no abi wan skapuman e frede èn den no man yepi densrefi. Yehovah e taigi en pipel taki den no abi fu frede awansi den e „waka na ini a lagipresi di dungru pikapika”, noso na den moro muilek momenti na ini den libi (vers 4). Yehovah e luku den ala ten èn a de klariklari fu yepi den. A kan gi den anbegiman fu en a koni nanga a krakti di den abi fanowdu fu man horidoro te den e kisi tesi.​—Filipisma 4:13; Yakobus 1:2-5.

Yehovah e gi den skapu fu en nyanyan. Skapu abi den skapuman fanowdu fu feni nyanyan gi den. A de fanowdu fu kon leri sabi Gado, èn na Gado wawan kan yepi wi fu kon sabi en (Mateyus 5:3). Koloku taki Yehovah e sorgu den anbegiman fu en na wan lobi-ati fasi fu di a e seti wan tafra nanga furu nyanyan gi den (vers 5). Bijbel nanga Bijbel publikâsi, soleki a tijdschrift di yu e leisi now, e yepi wi fu kon sabi san na a marki fu a libi èn den e yepi wi fu kon sabi tu san Gado abi na prakseri gi libisma.

David ben abi wan korostu firi fu di a ben sabi taki efu a ben tan abi wan bun matifasi nanga en Skapuman na hemel, dan Yehovah ben o sorgu en na wan lobi-ati fasi „en heri libi langa” (vers 6). Yu wani abi a srefi korostu firi dati? Efu dati de so, dan leri fa yu kan kon krosibei na Yehovah. Na so yu no o abi fu frede fu di yu o de na ini den anu fu a Bigi Skapuman, di e tiri den sma di e tai hori na en, di e kibri den, èn di e gi den nyanyan.​—Yesaya 40:11.

A bun fu leisi a pisi disi fu Bijbel na ini mei:

◼ Yob 38–Psalm 25

[Futuwortu]