Oiti yu firi leki nowan sma lobi yu?

SON LEISI sma no wani bemui nanga trawan di de fu wan tra ras noso wan tra kondre. A kan de so tu taki den no wani bemui nanga sma di e taki tra fasi leki den, noso di e du sani na wan tra fasi. Oiti yu firi leki nowan sma lobi yu?—a

Meki wi go taki fu wan man di ben e firi leki nowan sma ben lobi en. A man ben nen Mefiboset. Meki wi go luku suma na en èn fu san ede a ben firi so. Efu oiti yu firi leki nowan sma lobi yu, dan yu kan leri furu fu Mefiboset.

Mefiboset ben de a manpikin fu Yonatan, a bun mati fu David. Fosi Yonatan lasi en libi na ini wan feti, a ben taigi David: ’Du bun gi den pikin fu mi.’ Ne David tron kownu. Furu yari baka dati a memre den wortu fu Yonatan èn Mefiboset ben de na libi ete. Di a ben pikin, a ben kisi wan hebi mankeri. Baka dati a no ben man waka bun moro. Yu e frustan fu san ede a ben e firi leki sma no lobi en?—

David ben wani du bun gi a manpikin fu Yonatan. Dati meki David seti sani so taki Mefiboset ben kan abi wan oso krosibei fu Yerusalem èn a ben kisi wan sidonpresi tu na a nyanyan tafra fu David. David ben sorgu tu taki wan man di ben nen Siba, makandra nanga den pikin èn den futuboi fu en, ben tron futuboi fu Mefiboset. David ben yepi a manpikin fu Yonatan trutru! Yu sabi san ben pasa baka dati?—

David ben kon abi problema na ini en osofamiri. Absalom, wan fu den manpikin fu David, bigin gens en èn a pruberi fu tron kownu. David ben musu lowe gowe fu no lasi en libi. Di furu tra sma lowe gowe makandra nanga David, dan Mefiboset ben wani go tu. Den mati disi fu David ben sabi taki na David ben abi a reti fu de kownu. Ma Mefiboset no ben man lowe gowe makandra nanga David, fu di a no ben man waka bun.

Baka dati, Siba taigi David taki Mefiboset ben tan na baka fu di a ben wani tron kownu. David ben bribi a lei dati! Dati meki a gi Siba ala den gudu fu Mefiboset. Syatu baka dati, David wini Absalom na ini a feti èn a kon baka na Yerusalem. Now David ben kan arki san Mefiboset ben abi fu taki. David bosroiti taki Mefiboset ben musu prati den gudu fu en nanga Siba. San yu denki taki Mefiboset du?—

A no ben kragi taki David no teki wan bun bosroiti. Mefiboset ben sabi taki efu a kownu ben wani tiri a kondre bun, dan dyugudyugu no ben musu de. Dati meki Mefiboset taki dati Siba ben kan hori ala den gudu. San ben prenspari gi Mefiboset na taki David, a futuboi fu Yehovah, ben de baka na ini Yerusalem leki kownu.

Furu hati sani ben miti Mefiboset. Nofo tron a ben e firi leki nowan sma lobi en. Ma Yehovah ben lobi en èn a sorgu gi en. San wi kan leri fu a tori disi?— Srefi te wi e du san reti, son sma kan fruteri lei fu wi. Yesus ben taki: „Efu grontapu e teige unu, dan sabi taki den ben teige mi bifo den ben teige unu.” Sma ben kiri Yesus srefi! Wi kan de seiker taki efu wi e du san reti, dan a tru Gado, Yehovah, o lobi wi èn en Manpikin, Yesus, o lobi wi tu.