A de fanowdu taki pikin leri sabi Gado?

„Wi abi nofo bribi fu abi bita-ati gi makandra, ma wi no abi nofo bribi fu lobi makandra.”​—JONATHAN SWIFT, INGRISI SKRIFIMAN.

SWIFT ben taki a sani dati na ini a di fu 18 yarihondro, ma furu sma na ini a ten disi ben o agri nanga en. Fu taki en leti, son sma feni taki papa nanga mama no abi a reti fu gi den pikin fu den leri fu Gado. Den feni taki te pikin kweki na ini wan osofamiri pe sma e bribi na ini wan gado, dan sani no sa waka so bun nanga den.

San yu e denki? Nanga sortuwan fu den sani di e kon now yu e agri?

● Papa nanga mama no musu kisi okasi fu gi den pikin fu den leri fu Gado.

● Papa nanga mama musu wakti teleki den pikin fu den kon bigi, fosi den bigin taki Gado tori nanga den.

● Te pikin yongu ete, dan papa nanga mama musu leri den pikin sani fu Gado di densrefi e bribi. Ma te den pikin fu den e kon bigi, dan papa nanga mama musu gi den deki-ati fu ondrosuku den tori dati gi densrefi.

● Pikin musu teki a bribi fu den papa nanga mama, sondro fu ondrosuku sani gi densrefi.

A e tyari takru bakapisi gi pikin te den e kon sabi sani fu Gado?

Nowan papa noso mama di lobi en pikin wani du ogri nanga en. Ma sma abi leti fu taki dati pikin no musu leri sabi Gado? Someni tenti yari kaba, sabiman ondrosuku finifini sortu krakti a bribi fu wan papa noso mama abi tapu den pikin fu den. San den kon si?

Sabiman kon si taki a no e tyari takru bakapisi kon gi pikin te den e kon sabi sani fu Gado. Na presi fu dati, a kan yepi den fu gro kon tron wan bun sma. Na ini 2008, sabiman tyari wan raportu kon na doro na ini a tijdschrift Social Science Research.a A raportu ben e taki: „Wi kon si taki papa, mama, nanga pikin kon moro krosibei fu makandra fu di den e anbegi wan gado.” A raportu disi ben taki tu: „Soleki fa a sori, dan furu pikin kweki nanga a bribi taki wan gado de di den abi fanowdu. A sani disi prenspari srefisrefi gi den èn gi na osofamiri.” Luku fa a prakseri dati e kruderi nanga san Yesus Krestes ben taki: „Koloku fu den sma di sabi taki den abi Gado fanowdu.”​—Mateyus 5:3.

Fa a de nanga a denki taki pikin musu gro kon bigi, fosi den e kisi leri fu Gado èn fu Gado tori? A denki dati no e kruderi nanga a tori disi: A frustan fu wan pikin de leki wan leigi emre di sma musu furu ete. Iya, papa nanga mama musu teki wan bosroiti. Den srefi kan furu na „emre” dati nanga den gronprakseri nanga den bribi di den e si leki den yoistiwan. Noso den kan gi pasi taki tra sma e furu na ati nanga a frustan fu den pikin nanga ala sortu sani.

San o yepi den?

Den sani di miti libisma na ini den ten di pasa, e sori taki na anbegi di sma e anbegi Gado, kan meki taki den denki takru fu trawan èn den kan kisi bita-ati. Sobun, fa papa nanga mama kan sorgu taki sani e waka tra fasi soleki fa Jonathan Swift ben taki? Fa den kan leri den pikin gronprakseri di kan yepi den fu lobi trawan?

A sani di o yepi den, na a piki tapu den dri aksi disi: (1) San pikin musu kon sabi? (2) Suma musu leri pikin den sani dati? (3) San na den moro bun fasi fu leri pikin den sani dati?

[Futuwortu]