San pikin musu kon sabi?

„Na Gado srefi ben meki sma skrifi ala den sani di de na ini Gado Buku. Den sani disi bun fu gi leri, fu gi rai, fu poti sani kon reti èn fu gi piri-ai na wan reti fasi.”​—2 TIMOTEYUS 3:16.

PIKIN musu leri sabi den tru tori fu Gado. Fa den kan kon sabi den tru tori dati? Den tori dati skrifi na ini Bijbel, a moro prenspari buku na grontapu di e taki fu Gado.

Bijbel de leki wan brifi fu Gado. Na ini a brifi dati, Gado e meki wi kon sabi san na den fasi fu en, èn a e leri ala den pikin fu en, yonguwan nanga owruwan, fa den musu tyari densrefi. Luku wan tu fu den sani di skrifi na ini Bijbel, èn luku san yongu pikin srefi kan leri fu den tori dati.

San Gado wani taki wi musu kon sabi fu en?

◼ Bijbel e taki: „Na so sma o sabi taki yu di nen Yehovah, yu wawan na a Moro Heiwan fu heri grontapu.”​—Psalm 83:18.

San wi e leri: Gado no de wan krakti nomo, ma a de wan trutru Sma di abi wan nen.

◼ Bijbel e taki: „Yehovah e ondrosuku na ati fu ala sma èn a sabi ibri sani di wan sma e prakseri fu du. Efu yu suku en, a o meki yu feni en.”​—1 Kroniki 28:9.

San wi e leri: Yehovah Gado e broko en ede nanga wi alamala, sosrefi nanga yongu pikin (Psalm 10:14; 146:9). A wani taki wi kon leri sabi en.

◼ Bijbel e taki: „Un no musu pina . . . wan pikin di no abi papa. Efu unu e pina en èn a e bari suku yepi na mi, dan mi o yere a babari fu en trutru.”​—Eksodes 22:22-24.

San wi e leri: Yehovah e arki a begi fu yongu pikin srefi. Wi kan taki doronomo nanga Gado èn wi kan fruteri en iniwan sani di de na tapu wi ati.

◼ Bijbel e taki: „Doronomo den ben e tesi Gado. Den ben e meki a Santawan fu Israel firi sari.”​—Psalm 78:41.

San wi e leri: Den sani di wi e taki èn e du abi krakti tapu den firi fu Yehovah. Sobun, wi musu denki bun fosi wi e taki èn e handri.

Fa wi musu handri nanga sma di de tra fasi leki wi?

◼ Bijbel e taki: „Gado no lobi a wan sma moro a trawan, ma awansi fu sortu kondre wan sma de, efu a e lespeki Gado èn a e du san reti, dan Gado feni en bun.”​—Tori 10:34, 35.

San wi e leri: Efu Gado lobi ala sortu sma, dan wi no musu desko sma soso fu di den skin abi wan tra kloru, noso fu di den fesi de tra fasi leki a di fu wi.

◼ Bijbel e taki: „Ala ten un musu de srekasreka fu opo taki gi unsrefi na fesi ala sma di e aksi unu sani di abi fu du nanga a howpu fu unu, ma du dati na wan safri fasi èn nanga bigi lespeki.”​—1 Petrus 3:15.

San wi e leri: Te wi e taki fu a bribi fu wi, dan wi musu taki nanga overtoigi, sondro fu atibron. Wi musu sori lespeki tu gi sma di abi wan tra bribi leki wi.

Fa wi musu handri nanga den memre fu wi osofamiri?

◼ Bijbel e taki: „Un pikin, gi yesi na un papa nanga mama na ala fasi, bika disi e plisi Masra.”​—Kolosesma 3:20.

San wi e leri: Pikin di e gi yesi e sori taki den lobi den papa nanga mama èn taki den wani plisi Gado.

◼ Bijbel e taki: „Tan frudrage makandra èn gi makandra pardon nanga un heri ati, srefi te wan sma feni taki wan trawan du wan hati sani nanga en. Soleki fa Yehovah e gi unu pardon nanga en heri ati, na so un musu gi trawan pardon tu.”​—Kolosesma 3:13.

San wi e leri: Son leisi, a kan pasa taki tra sma èn sosrefi den memre fu wi osofamiri, e meki wi firi sari. Ma efu wi wani taki Gado gi wi pardon, dan wi musu leri fu gi trawan pardon.​—Mateyus 6:14, 15.

Fu san ede wi musu taki san tru èn fu san ede wi musu abi switifasi?

◼ Bijbel e taki: „Now di unu no e lei moro, ibriwan fu unu musu taki san tru nanga trawan.”​—Efeisesma 4:25.

San wi e leri: Te wi e taki san tru, dan wi e teki na eksempre fu Gado èn a o prisiri nanga wi. Te wi kon abi a gwenti fu lei, dan wi e kon de leki Gado en feanti, Didibri, di de „a tata fu ala lei”.​—Yohanes 8:44; Titus 1:2.

◼ Bijbel e taki: „Ala sani di unu wani meki sma du gi unu, na dati un musu du gi den tu.”​—Mateyus 7:12.

San wi e leri: Wi musu lespeki den firi, den denki, nanga den winsi fu den memre fu wi osofamiri, èn den di fu tra sma na ini a libimakandra. Te wi e sori trawan taki wi „e firi gi” den, dan a o makriki gi den fu sori switifasi gi wi.​—1 Petrus 3:8; Lukas 6:38.

Soleki fa ala den eksempre disi e sori, dan den leri na ini Bijbel kan yepi pikin fu gro kon tron sma di de nanga tangi, di e lespeki trawan, èn di e firi gi trawan. Ma suma musu leri pikin den sani disi?