Teki leri fu Gado Wortu

Fa yu kan sabi san na a tru anbegi?

Na artikel disi e poti prakseri na sani di yu ben kan aksi yusrefi èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. A tru taki na wán tru bribi nomo de?

Yesus ben leri den bakaman fu en taki wán bribi nomo de èn dati na a tru anbegi. A de leki wan pasi di e tyari sma go na têgo libi. Yesus ben taki fu a pasi dati: „Wan tu sma nomo e feni en” (Mateyus 7:14). Na soso te sma e anbegi Gado na wan fasi di e kruderi nanga a Wortu fu en di tru, dan fosi Gado o feni na anbegi dati bun. Ala tru anbegiman abi a srefi bribi.​—Leisi Yohanes 4:23, 24; 14:6; Efeisesma 4:4, 5.

2. Fu san ede someni kerki e taki dati den na Kresten kerki?

Falsi profeiti pori a tru Kresten bribi èn den gebroiki en fu kisi wini gi densrefi. Soleki fa Yesus ben taki na fesi, den falsi profeiti disi e du neleki den na en „skapu”, ma den e handri leki ogri busidagu (Mateyus 7:13-15, 21, 23). A falsi Kresten bribi bigin opo kon spesrutu baka di den apostel fu Yesus dede.​—Leisi Tori 20:29, 30.

3. San na wan tu sani di e sori san na a tru bribi?

Tru anbegiman e si Bijbel leki a Wortu fu Gado. Den e du muiti fu hori densrefi na den gronprakseri fu Bijbel. Fu dati ede a tru bribi e difrenti fu bribi di abi fu du nanga libisma denki (Mateyus 15:7-9). Tru anbegiman no e preiki wan sani, sondro fu du san den e preiki.​—Leisi Yohanes 17:17; 2 Timoteyus 3:16, 17.

A tru anbegi e gi grani na Gado en nen, Yehovah. Yesus ben e meki a nen fu Gado bekènti. A yepi sma fu kon sabi Gado èn a leri den fu begi fu meki a nen fu Gado kon santa (Mateyus 6:9). Sortu kerki na ini a kontren pe yu e libi, e gi sma deki-ati fu gebroiki a nen fu Gado?​—Leisi Yohanes 17:26; Romesma 10:13, 14.

4. Fa yu kan kon sabi suma na den tru anbegiman fu Gado?

Tru Kresten e preiki Gado Kownukondre. Gado ben seni Yesus fu kon preiki a Kownukondre. Gado Kownukondre na a wan-enkri howpu gi libisma. Yesus taki fu a Kownukondre teleki a dei di a dede (Lukas 4:43; 8:1; 23:42, 43). A ben taigi den bakaman fu en fu preiki Gado Kownukondre. Efu wan sma e kon taki nanga yu fu Gado Kownukondre, dan fu sortu kerki a sma dati de nofo tron?​—Leisi Mateyus 10:7; 24:14.

Den bakaman fu Yesus no de wan pisi fu na ogri grontapu disi. Den no e teki prati na politiek afersi noso na dyugudyugu di de na ini a libimakandra (Yohanes 17:16). Boiti dati, den no e teki na eksempre fu sma di e du ogri èn di abi takru gwenti.​—Leisi Yakobus 1:27; 4:4.

5. San na a moro prenspari fasi di tru Kresten abi?

Tru Kresten abi bun furu lobi gi makandra. Nanga yepi fu Gado Wortu, den leri fu lespeki ala sortu sma. Aladi falsi bribi gwenti horibaka fayafaya gi a feti di sma fu difrenti kondre e feti nanga makandra, toku sma fu a tru anbegi e weigri fu teki na eksempre fu den (Mika 4:1-4). Na presi fu dati, den sma di abi a tru bribi de klariklari fu gebroiki den ten nanga den gudu fu den fu yepi trawan èn fu gi den deki-ati.​—Leisi Yohanes 13:34, 35; 1 Yohanes 4:20, 21.

Sortu kerki e leri sma sani di e komoto soso fu Gado Wortu? Sortu kerki e gi grani na Gado nen èn e meki bekènti taki Gado Kownukondre na a wan-enkri howpu gi libisma? Sortu grupu e sori lobi gi trawan èn no e horibaka gi orloku? Soleki fa a sori, dan dati na Yehovah Kotoigi.​—1 Yohanes 3:10-12.

Efu yu wani sabi moro, dan luku kapitel 15 fu a buku disi, San Bijbel e leri wi trutru?, di Yehovah Kotoigi tyari kon na doro.

[Prenki na tapu bladzijde 16]

„Den e taigi ala sma taki den sabi Gado, ma den sani di den e du, e sori taki den no sabi en.”​—Titus 1:16