Teki leri fu Gado Wortu

Fa yu kan kon krosibei na Gado?

Na artikel disi e poti prakseri na sani di yu ben kan aksi yusrefi èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. Gado e arki ala begi?

Yehovah e gi sma fu ala kondre a kari fu kon krosibei na en nanga yepi fu begi (Psalm 65:2). Ma a no e arki ala begi. Fu eksempre, di den Israelsma ben e tan du ogri, dan Gado weigri fu arki den begi fu den (Yesaya 1:15). Boiti dati, te wan man no e libi bun nanga en wefi, dan dati kan tapu pasi gi den begi fu en (1 Petrus 3:7). Ma srefi te sma di e du bigi sondu e sori berow, dan Gado sa arki den begi fu den.​—Leisi 2 Kroniki 33:9-13.

2. Fa wi musu begi?

Begi na wan grani, èn a de wan fu den fasi fa wi kan anbegi Gado. Fu dati ede wi musu begi Yehovah wawan (Mateyus 4:10; 6:9). Wi na sondu sma, èn fu dati ede wi musu begi na ini a nen fu Yesus, fu di en na a „pasi” di musu tyari wi go na Gado (Yohanes 14:6). Te wi e begi, Yehovah no wani taki wi e taki sani di skrifi na tapu papira, noso sani di wi leri na ede, ma a wani taki wi e begi komoto fu wi ati.​—Leisi Mateyus 6:7; Filipisma 4:6, 7.

Wi Mekiman man yere srefi te wi e begi na ini wi ati (1 Samuel 1:12, 13). A e gi wi a kari fu begi na ibri okasi, soleki na a bigin èn na a kaba fu a dei, te wi o nyan, èn te problema e miti wi.​—Leisi Psalm 55:22; Mateyus 15:36.

3. Fu san ede Kresten e hori konmakandra?

A no makriki fu kon krosibei na Gado, fu di wi e libi na mindri sma di no e bribi na ini Gado èn di e spotu nanga a pramisi fu Gado taki freide o de na grontapu (2 Timoteyus 3:1, 4; 2 Petrus 3:3, 13). Sobun, wi musu abi demakandra nanga Kresten brada nanga sisa di e gi wi deki-ati.​—Leisi Hebrewsma 10:24, 25.

Yu kan kon krosibei na Gado te yu e tron mati fu sma di lobi Gado. Den konmakandra fu Yehovah Kotoigi e gi wi okasi fu kisi wini fu a bribi fu trawan.​—Leisi Romesma 1:11, 12.

4. Fa yu kan kon krosibei na Gado?

Yu kan kon krosibei na Yehovah te yu e denki dipi fu den sani di yu leri na ini a Wortu fu en. Denki dipi fu den sani di a du, fu den rai di a e gi, èn fu den pramisi fu en. Te wi e denki dipi fu den sani disi èn te wi e begi Gado fu yepi wi fu kon frustan den sani disi moro bun, dan dati o yepi wi fu kisi warderi gi a lobi nanga a koni fu En.​—Leisi Yosua 1:8; Psalm 1:1-3.

Yu kan kon krosibei na Gado soso te yu e frutrow na en tapu èn te yu e bribi na ini en. Ma bribi de leki wan libi sani di yu musu sorgu so taki a kan kon tranga. Sobun, yu musu tranga a bribi fu yu doronomo. A fasi fa yu kan du dati, na te yu e denki dipi doronomo fu den sani di yu leri.​—Leisi 1 Tesalonikasma 5:21; Hebrewsma 11:1, 6.

5. Fa yu sa kisi wini te yu e kon krosibei na Gado?

Yehovah e broko en ede nanga den sma di lobi en. A e kibri den gi iniwan sani di kan meki a bribi fu den kon swaki èn di kan meki den lasi a howpu di den abi fu kisi têgo libi (Psalm 91:1, 2, 7-10). A e warskow wi gi fasi fu libi di kan meki wi kon siki èn di kan meki wi sari. Yehovah e leri wi san na a moro bun fasi fu libi.​—Leisi Psalm 73:27, 28; Yakobus 4:4, 8.

Efu yu wani sabi moro, dan luku kapitel 17 fu a buku disi, San Bijbel e leri wi trutru?, di Yehovah Kotoigi tyari kon na doro.