Frutrow tapu Yehovah, „a Gado fu ala trowstu”
„Prèise a Gado nanga a Tata fu wi Masra Yesus Krestes, a Tata di abi furu sari-ati, a Gado fu ala trowstu.”—2 KOR. 1:3.
1. San libisma abi fanowdu awinsi omeni yari den abi?
WI ALAMALA abi trowstu fanowdu. Nofo tron wan beibi e krei te a wani wi fu boboi en, noso te angri e kiri en. Srefi te wi kon bigi wi abi trowstu fanowdu son leisi. Disi de so spesrutu te wi de na ini muilek situwâsi.
2. Fa Yehovah e gi wi a dyaranti taki a sa trowstu den wan di e frutrow na en tapu?
2 Nofo tron wi famiri nanga mati kan trowstu wi. Ma son tron wi kan de na ini muilek situwâsi pe den no man yepi wi. Na den ten dati na Gado wawan kan trowstu wi. A Wortu fu en e gi wi a dyaranti disi: „Yehovah de krosibei fu ala den wan di e kari en. . . . Te den e bari suku yepi na en, a o yere den” (Ps. 145:18, 19). Iya, „den ai fu Yehovah e si den reti-ati sma, èn den yesi fu en e yere te den e bari suku yepi na en” (Ps. 34:15). Ma efu wi wani taki Gado yepi wi èn trowstu wi, dan wi musu frutrow na en tapu. A psalm skrifiman David ben sori disi krin di a singi: „Yehovah o kon de wan bergi pe ala sma di e pina kan lon go kibri, iya, wan bergi pe sma kan go kibri te den de na nowtu. Den sma di sabi yu nen o frutrow yu, bika yu no o gowe libi den wan di e suku yu, Yehovah.”—Ps. 9:9, 10.
3. Fa Yesus sori taki Yehovah lobi a pipel fu En?
3 Yehovah lobi den anbegiman fu en trutru. Yesus ben tyari disi kon na krin di a taki: „A no de so, taki sma e seri feifi pikin fowru gi tu sensi di no warti furu? Toku Gado no e frigiti nowan fu den. Srefi ala den wiwiri na un ede a teri. No frede, unu warti moro leki furu pikin fowru” (Luk. 12:6, 7). Yehovah meki a profeiti Yeremia taigi a pipel fu En a sani disi: „A lobi di mi abi gi yu o tan fu ala ten. Dati meki mi hari yu kon na wan lobi-ati fasi.”—Yer. 31:3.
4. Fu san ede wi kan frutrow taki Yehovah o du san a pramisi?
4 Te wi e frutrow tapu Yehovah èn te wi e bribi taki a sa du san a pramisi, dan dati sa trowstu wi te wi de na ini muilek situwâsi. Dati meki wi musu abi a srefi frutrow na ini Gado neleki Yosua, di ben taki: „Yehovah un Gado du ala den bun sani di a ben pramisi unu. Ala den sani disi kon tru. Iya, a du ala den sani di a pramisi” (Yos. 23:14). Boiti dati, wi kan de seiker taki awinsi wi e pina fu di wi de na ini wan muilek situwâsi now, wi „kan frutrow Gado” fu di noiti a o gowe libi den futuboi fu en di e tai hori na en.—Leisi 1 Korentesma 10:13.
5. Fu san ede wi kan trowstu trawan?
5 Na apostel Paulus kari Yehovah „a Gado fu ala trowstu”. Fu trowstu wan sma di de na nowtu wani taki dati wi e meki a firi korostu, wi e safu a pen fu en fu di a e pina, noso wi e yepi en fu no sari so furu moro. A no de fu taki dati na disi Yehovah e du. (Leisi 2 Korentesma 1:3, 4.) Nowan sani èn nowan sma man tapu wi hemel Tata fu du san a wani, èn fu dati ede a kan du iniwan sani fu trowstu den wan di lobi en. Fu di Gado e trowstu wi, meki wi man trowstu wi Kresten brada nanga sisa di de „na ini ala sortu banawtu”. Wi kan du dati fu di „a trowstu di wi e kisi fu Gado e meki taki wi man trowstu tra sma tu”. Nowan sma kan trowstu wi neleki fa Yehovah e du dati!
San wi kan du te wan sani e trobi wi
6. Kari wan tu sani di kan meki taki sma abi trowstu fanowdu.
6 Na ini furu situwâsi na ini a libi wi abi trowstu fanowdu. Wan fu den sani di e meki wi sari trutru na te wan lobiwan fu wi dede, spesrutu te a trowpatna noso wan pikin fu wi dede. Wan sma kan abi trowstu fanowdu tu te trawan e desko en kande fu di a de fu wan tra ras. Wan sma kan abi trowstu fanowdu tu te a e siki, te a kon owru, te a abi problema na ini en trowlibi, noso te den problema fu a grontapu disi e gi en broko-ede.
7. (a) Sortu trowstu wi abi fanowdu na ini muilek ten? (b) San Yehovah kan du fu trowstu ’den sma di brokosaka noso lasi-ati’?
7 Na ini muilek ten wi kan abi trowstu fanowdu di e kowru wi ati, di e meki taki wi no e bruya, di e meki taki wi e denki bun fu wisrefi, di abi krakti tapu a gosontu fu wi, èn di e tranga a bribi fu wi. Meki wi luku fa wi kan kisi kowru-ati. Gado Wortu e taki dati ’wan sma kan firi brokosaka, noso a kan lasi-ati’ (Ps. 51:17). Wi kan de seiker taki Yehovah man trowstu wi te wi lasi-ati, bika „a e dresi den sma di brokosaka èn a e tai den soro di e hati den” (Ps. 147:3). Srefi te sani e moro wi, Gado kan trowstu wi efu wi e begi en nanga wan tranga bribi, èn efu wi e gi yesi na den wèt fu en.—Leisi 1 Yohanes 3:19-22; 5:14, 15.
8. Fa Yehovah kan yepi wi fu no bruya?
8 Nofo tron wi abi trowstu fanowdu, fu no bruya te difrenti tesi e miti wi. Te wi e kisi tesi fu a bribi fu wi ede, dan wi no man horidoro nanga wi eigi krakti. Ma a psalm skrifiman ben singi: „Di den prakseri fu mi di ben e trobi mi, ben kon hebi gi mi, dan na yu ben e trowstu mi, so taki mi ben man prisiri baka” (Ps. 94:19). Paulus skrifi tu: „No broko un ede nanga nowan sani, ma begi Gado ala ten, begi en fayafaya èn taki en tangi tu. Na so a o kon sabi san unu wani aksi en, dan a freide fu Gado di bigi moro iniwan sani di libisma man frustan, o kibri un ati nanga un frustan nanga yepi fu Krestes Yesus” (Fil. 4:6, 7). Te wi e leisi Bijbel èn e denki dipi fu en, dan dati kan yepi wi te wi abi broko-ede.—2 Tim. 3:15-17.
9. San kan yepi wi te wi no e denki bun fu wisrefi?
9 Son tron wi kan firi brokosaka so te, taki wi no e denki bun fu wisrefi. Kande wi feni taki wi no man du wan sani di Yehovah wani wi fu du, noso kande wi firi taki wi no man tyari wan frantwortu na ini a gemeente. Srefi te wi abi den firi disi Yehovah kan trowstu wi. Meki wi luku na eksempre fu Yosua. Di a kisi a wroko fu tyari den Israelsma fu go feti teige tranga feanti, Moses taigi a pipel: „Abi deki-ati, no frede. No beifi gi den èn no meki den skreki unu, bika Yehovah un Gado na a sma di e waka nanga unu. A no sa libi unu kwetikweti èn noiti a sa gowe fu unu” (Deut. 31:6). Nanga a yepi fu Yehovah, Yosua ben man tyari a pipel go na a Pramisi Kondre èn den ben man wini ala den feanti fu den. Di den Israelsma ben de na a Redi Se, Yehovah yepi Moses tu.—Eks. 14:13, 14, 29-31.
10. San kan yepi wi efu muilek situwâsi abi krakti tapu a gosontu fu wi?
10 Te wi de na ini muilek situwâsi, dan dati kan abi krakti tapu a gosontu fu wi. A tru taki te wi e nyan bun, te wi e rostu nofo, te wi e oefen wi skin èn te wi e hori wi skin krin, dan dati kan yepi wi fu tan gosontu. Te a fasi fa wi e denki fu sani e kruderi nanga Bijbel, dan dati kan meki wi firi bun tu. Fu dati ede, te wi e kisi tesi noso problema, a bun fu hori na prakseri san Paulus ondrofeni èn san a taki: „Wi e kisi ala sortu hebi tesi, ma a no de so taki wi no man du noti moro. Wi e bruya, ma a no de so taki wi no man feni nowan lusu. Sma e frufolgu wi, ma a no de so taki Gado gowe libi wi. Den naki wi trowe, ma wi no dede.”—2 Kor. 4:8, 9.
11. San wi musu du efu a bribi fu wi kon swaki?
11 Son tesi kan swaki a bribi fu wi. Te disi pasa Yehovah kan yepi wi tu. En Wortu e gi wi a dyaranti: „Yehovah e yepi ala den wan di de fu fadon èn a e opo ala sma di e didon na gron, fu di den brokosaka” (Ps. 145:14). Efu a bribi fu wi kon swaki, wi musu suku yepi na Kresten owruman (Yak. 5:14, 15). Sosrefi, te wi tan prakseri a howpu fu kisi têgo libi, dan dati kan yepi wi te wi e kisi tesi fu wi bribi ede.—Yoh. 17:3.
Sma di Gado trowstu
12. Fa Yehovah meki Abraham firi korostu?
12 Wan psalm skrifiman ben taki nanga yepi fu santa yeye: „Memre den sani di yu pramisi a futuboi fu yu. Iya, na den sani dati yu [Yehovah] ben meki mi wakti. Na den sani disi e trowstu mi te mi de na nowtu, bika na den sani di yu taki, hori mi na libi” (Ps. 119:49, 50). Na ini a ten disi, wi abi a Wortu fu Yehovah pe wi kan leisi fa Gado trowstu son sma. Fu eksempre, a kan taki Abraham ben firi brokosaka trutru di a yere taki Yehovah ben o pori Sodom nanga Gomora. A reti-ati famiri-edeman dati aksi Gado: „A de so trutru taki yu o kiri den reti-ati sma makandra nanga den ogriwan?” Yehovah meki Abraham firi korostu fu di a taigi en taki a no ben o pori Sodom efu 50 reti-ati sma ben o de na den ini. Ma ete feifi leisi Abraham aksi Yehovah efu a ben o pori den foto. Yehovah ben o pori a foto efu 45, 40, 30, 20, noso 10 reti-ati sma ben de na den ini? Yehovah ben abi pasensi, èn ibri leisi a gi Abraham a dyaranti taki a no ben o pori Sodom efu dati ben de so. Tin reti-ati sma no ben de na ini a kontren dati, ma toku Yehovah kibri Lot nanga den umapikin fu en.—Gen. 18:22-32; 19:15, 16, 26.
13. Fa Hana sori taki a ben e frutrow tapu Yehovah?
13 Hana, a wefi fu Elkana, ben angri fu kisi wan pikin. Ma a no ben man meki pikin, èn a sani disi ben e moro en. A begi Yehovah fu a tori disi èn Granpriester Eli taigi en: „Meki a Gado fu Israel gi yu san yu aksi en.” A sani disi trowstu Hana, „èn a no ben de nanga wan sari fesi moro” (1 Sam. 1:8, 17, 18). Hana frutrow tapu Yehovah èn a libi sani na ini en anu. A ben kon abi wan korostu firi aladi a no ben sabi san ben o pasa. Bakaten Yehovah piki a begi fu en. A kon de nanga bere èn a kisi wan manpikin di a kari Samuel.—1 Sam. 1:20.
14. Fu san ede David ben abi trowstu fanowdu, èn na suma a suku yepi?
14 Kownu David fu owruten Israel na wan tra sma di Gado trowstu. Yehovah „e si fa na ati de”. Fu dati ede, di a teki David fu de kownu fu Israel, a ben sabi taki David ben de wan reti-ati sma èn taki a ben lobi a tru anbegi (1 Sam. 16:7; 2 Sam. 5:10). Ma bakaten David du sutadu nanga Batseiba èn a kiri Batseiba en masra fu di a ben wani kibri a sondu fu en. Di David kon frustan taki a du wan bigi sondu, a begi Yehovah: „Figi den sondu fu mi puru, fu di yu abi sari-ati pasa marki. Wasi mi krin fu den fowtu fu mi. Meki mi kon krin, so taki mi no abi sondu moro, bika mi sabi sortu fowtu mi meki èn doronomo a sondu fu mi de na mi fesi” (Ps. 51:1-3). David ben abi trutru berow èn Yehovah gi en pardon. Ma David ben abi fu libi nanga den bakapisi fu a sondu fu en (2 Sam. 12:9-12). Toku David kisi trowstu fu di Yehovah sori en sari-ati.
15. Fa Yehovah yepi Yesus leti fosi a dede?
15 Di Yesus ben de na grontapu, a kisi furu tesi. Gado gi pasi taki Yesus kisi den tesi disi, ma ala ten Yesus tan dini Gado leki wan sma di no ben abi sondu. Ala ten a ben e frutrow tapu Yehovah èn a ben gi yesi na en leki a Moro Hei Tiriman. Leti fosi sma tori en èn kiri en, Yesus begi Yehovah: „A no mi wani musu pasa, ma yu wani.” Dan wan engel kon na Yesus èn a gi en krakti (Luk. 22:42, 43). Gado trowstu Yesus, a gi en krakti, èn a gi en a yepi di a ben abi fanowdu na a ten dati.
16. Fa Gado kan trowstu wi te sma wani kiri wi fu di wi e tai hori na en?
16 Awinsi sma wani kiri wi fu wi Kresten bribi ede, Yehovah kan yepi wi fu tan dini en èn a sa du dati tu. Boiti dati, na opobaka howpu e gi wi trowstu. Wi e angri fu si tu fa Gado o puru dede, a lasti feanti, na pasi! (1 Kor. 15:26) Yehovah e memre den futuboi fu en èn tra sma di dede, èn a o gi den wan opobaka (Yoh. 5:28, 29; Tori 24:15). A frutrow di wi abi taki Yehovah sa gi sma wan opobaka soleki fa a pramisi, e gi wi trowstu èn a de wan tranga howpu gi wi te sma e frufolgu wi.
17. Fa Yehovah kan trowstu wi te wan lobiwan fu wi dede?
17 A moi fu sabi taki den lobiwan fu wi di dede sa kisi wan opobaka, èn den sa libi baka na ini wan moi nyun grontapu pe nowan broko-ede fu a ten disi no de. A sa de wan grani tu gi a „bigi ipi” futuboi fu Yehovah di sa pasa a kaba fu a grontapu disi libilibi, fu gi den sma dati wan switikon èn fu gi den leri!—Openb. 7:9, 10.
Fu têgo en anu de na yu ondro fu yepi yu
18, 19. Fa Gado trowstu den futuboi fu en di den ben e kisi frufolgu?
18 Moses ben skrifi wan moi singi di tranga a pipel fu Israel èn di gi den trowstu. Na ini a singi disi, a taki: „A Gado fu owruten na wan kibripresi. Fu têgo en anu de na yu ondro fu yepi yu” (Deut. 33:27). Bakaten a profeiti Samuel taigi den Israelsma: „Sorgu nomo taki unu no gowe libi Yehovah èn taki unu tan dini Yehovah nanga un heri ati. . . . Yehovah no o gowe libi en pipel, fu di a e prakseri a bigi nen fu en” (1 Sam. 12:20-22). Solanga wi tai hori na Yehovah èn solanga wi tan na ini a tru anbegi, a no sa gowe libi wi noiti. Ala ten a o gi wi a trowstu di wi abi fanowdu.
19 Ala ten Gado e yepi a pipel fu en èn a e trowstu den na ini den muilek lasti dei disi. Moro leki wán hondro yari kaba, dusundusun brada nanga sisa fu wi na heri grontapu kisi frufolgu èn sma poti den na strafu-oso soso fu di den dini Yehovah. Den ondrofenitori fu den e sori taki Yehovah e trowstu den futuboi fu en trutru te den e kisi tesi. Fu eksempre, wan fu den brada fu wi di ben e libi na ini a kontren di sma ben e kari Sovjet Unie fosi, ben koti strafu 23 yari langa fu a bribi fu en ede. Toku den ben feni wan fasi fu gi en Bijbel buku, so taki a ben kan kisi deki-ati nanga trowstu. A brada taki: „Na ini ala den yari dati mi leri fu frutrow tapu Yehovah èn a gi mi krakti.”—Leisi 1 Petrus 5:6, 7.
20. Fu san ede wi kan de seiker taki Yehovah no o gowe libi wi?
20 Awinsi san o miti wi ete, a bun fu hori na prakseri san a psalm skrifiman skrifi, fu di dati o trowstu wi. A ben skrifi: „Yehovah no o gowe libi a pipel fu en” (Ps. 94:14). Aladi wisrefi musu kisi trowstu, wi abi a bigi grani tu fu trowstu trawan. Na ini a tra artikel wi o si fa wi kan trowstu den wan di e sari na ini a grontapu disi di lai nanga problema.
San yu ben sa piki?
• San na wan tu sani di kan meki taki wi abi trowstu fanowdu?
• Fa Yehovah e trowstu den futuboi fu en?
• Efu sma wani kiri wi, san kan de wan trowstu gi wi?
[Faki/Prenki na tapu bladzijde 25]
WI KAN KISI TROWSTU DI . . .
▪ e kowru wi ati Ps. 147:3; 1 Yoh. 3:19-22; 5:14, 15
▪ e meki taki wi no e bruya Ps. 94:19; Fil. 4:6, 7
▪ e meki taki wi e denki bun fu wisrefi Eks. 14:13, 14; Deut. 31:6
▪ abi krakti tapu a gosontu fu wi 2 Kor. 4:8, 9
▪ e tranga a bribi fu wi Ps. 145:14; Yak. 5:14, 15