Fu san ede wi musu hori wisrefi na Bijbel markitiki?

A TRU taki den sani di Bijbel e taki fu seks no fiti gi a ten disi? Den sani dati e tapu sma fu libi soleki fa den wani, aladi dati no de fanowdu? Nôno. Tra fasi leki dati, den sani di Bijbel e taki fu seks kan yepi wi fu wai pasi gi den sani disi:

▪ Wi no o kisi siki di sma e panya te den abi seks

▪ Wi no o kisi bere sondro taki wi trow

▪ Wi no o sari fu di wi broko trow

▪ Wi no o abi konsensi fonfon

▪ Wi no o firi leki wi no warti fu di trawan du san den wani nanga wi

Wi Mekiman, Yehovah Gado,a wani taki wi e prisiri nanga a fasi fa a meki wi èn a wani taki wi e kisi wini fu dati. Gado na „a sma di e leri yu fu kisi wini” (Yesaya 48:17). Wan sma di e libi soleki fa Bijbel e taki te a abi fu du nanga seks, o kisi den wini disi:

▪ Gado o feni en bun

▪ A o abi wan korostu firi

▪ A o abi wan moro bun osofamiri libi

▪ A o abi wan bun nen

▪ A o abi lespeki gi ensrefi

Ma fa a de efu nownowde yu no e hori yusrefi na Bijbel markitiki? Yu denki taki yu kan kenki yu libi? Yu denki taki Gado o aksi yu frantwortu fu a fasi fa yu ben e libi fosi?

Poti prakseri na a sani disi: Sonwan fu den sma na ini a Kresten gemeente fu a fosi yarihondro ben de sma di ben du hurudu, sutadu, èn den ben e libi wan homo-sekslibi. Den sma disi bosroiti fu kenki den libi èn den kisi furu wini fu dati (1 Korentesma 6:9-11). Na ini a ten disi, dusundusun sma na heri grontapu tyari den srefi sortu kenki disi kon na ini den libi. Den no e libi wan yayolibi moro èn den kisi wini fu di den e tyari densrefi na wan fasi di e kruderi nanga Bijbel markitiki. Fu eksempre, luku na ondrofenitori fu Sarah, di kari na ini a fosi artikel.

„Heri esi a ben gersi leki wan hebi komoto na mi tapu”

Sarah ben kon si taki a yayolibi fu en no ben meki a de fri èn a no ben de koloku soleki fa a ben e fruwakti. A e taki: „Mi konsensi ben fon mi. Mi ben e firi syen èn mi ben frede taki mi ben o kon de nanga bere noso taki mi ben o kisi wan takru siki. Noiti mi ben lasi bribi na ini Gado, èn mi ben sabi taki a fasi fa mi ben e libi ben meki a sari. Mi ben firi leki mi no krin, èn a sani dati ben hati mi.”

Te fu kaba, Sarah ben man kenki en libi. A go suku yepi na en papa nanga mama, di de Kotoigi fu Yehovah. A suku yepi tu na den lepi Kresten owruman na ini a gemeente. Sarah e taki: „Aladi mi no ben fruwakti dati, toku mi papa nanga mama èn den gemeente owruman sori switifasi nanga lobi gi mi, èn mi ben breiti srefisrefi fu a sani dati. Heri esi a ben gersi leki wan hebi komoto na mi tapu.”

Now Sarah e kweki den tu pikin fu en. A e taki: „Mi e taigi mi pikin krin sortu bosroiti mi ben teki. Mi wani taki den frustan san pasa nanga mi fu di mi no ben hori misrefi na den markitiki fu Gado. Mi wani yepi den fu frustan taki te den e hori densrefi na den markitiki fu Gado te a abi fu du nanga seks, dan den o man wai pasi gi son siki, den no o kisi wan lo broko-ede, èn den o de koloku. Mi de seiker taki Gado e gi wi markitiki fu di a no wani taki wi du sani di o meki wi sari.”

Yu kan kisi wini tu te yu e hori yusrefi na den markitiki fu Gado di e sori taki a lobi wi. Bijbel e pramisi: „Den sani di Yehovah e taigi wi fu du, de reti. Den e meki na ati prisiri. Den komando fu Yehovah bun. Den e meki na ai brenki. . . . Te [wi] e gi yesi na den, dan [wi] e kisi furu blesi.”​—Psalm 19:8, 11.b

[Futuwortu]

[Prenspari pisi na tapu bladzijde 8]

Den sma di no e hori densrefi na Bijbel markitiki nofo tron e meki trawan sari

[Prenspari pisi na tapu bladzijde 9]

Den sma di e hori densrefi na Bijbel markitiki abi wan krin konsensi èn den abi wan moro bun osofamiri libi