Teki leri fu Gado Wortu

Suma wi musu teki leki mati?

Na artikel disi e poti prakseri na sani di yu ben kan aksi yusrefi èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. Fu san ede wi musu luku bun suma wi e teki leki mati?

Furu sma wani taki trawan feni den bun. A sani disi meki taki wi wani du san trawan e du. Fu dati ede, den mati fu wi kan abi furu krakti tapu den fasi di wi e kweki na ini wi ati. Sobun den mati di wi e teki, kan abi krakti tapu a fasi fa wi o tyari wisrefi.​—Leisi Odo 4:23; 13:20.

A Bijbel skrifiman David ben luku bun suma a ben teki leki en mati. Leki futuboi fu Gado, David ben e bemui nanga sma di ben e yepi en fu tan gi yesi na Gado (Psalm 26:4, 5, 11, 12). Fu eksempre, David ben abi Yonatan leki mati, fu di Yonatan ben gi en deki-ati fu frutrow na tapu Yehovah.​—Leisi 1 Samuel 23:16-18.

2. Fa yu kan de wan mati fu Gado?

Aladi Yehovah na a Almaktiwan, toku wi kan tron wan mati fu en. Fu eksempre, Abraham ben kon tron wan mati fu Gado. Abraham ben e frutrow na tapu Yehovah èn a ben e gi yesi na en, èn fu dati ede Yehovah ben si en leki en mati (Genesis 22:2, 9-12; Yakobus 2:21-23). Te wi e frutrow na tapu Yehovah èn te wi e du a wani fu en, dan wi kan tron wan mati fu Gado tu.​—Leisi Psalm 15:1, 2.

3. Sortu wini yu kan kisi te yu abi bun mati?

Wan tru mati ala ten e tan horibaka gi yu èn a e yepi yu fu du san bun (Odo 17:17; 18:24). Fu eksempre, aladi Yonatan ben owru sowan 30 yari moro David èn aladi na en ben musu tron kownu fu Israel, toku a ben e tan horibaka gi David leki a sma di Gado ben poti leki kownu. Tru mati no e frede fu piri-ai gi yu te den e si taki yu e du wan don sani (Psalm 141:5). Mati di lobi Gado o yepi yu fu kon abi bun gwenti.​—Leisi 1 Korentesma 15:33.

Na a Kownukondre zaal fu Yehovah Kotoigi yu kan miti sma di lobi du san bun, neleki yu. Drape yu o feni mati di e gi yu deki-ati fu tan du muiti fu plisi Gado.​—Leisi Hebrewsma 10:24, 25.

Ma srefi den mati di lobi Gado kan hati den firi fu wi. No mandi esi te den du wan hati sani nanga yu (Preikiman 7:9, 20-22). Hori na prakseri taki mati kan meki fowtu, èn taki wi abi mati fanowdu di lobi Gado. Gado Wortu e gi wi a deki-ati fu gi wi Kresten brada nanga sisa pardon te den meki fowtu.​—Leisi Kolosesma 3:13.

4. Ma fa a de te sma di e taki dati den na yu mati, e gens yu?

Furu sma feni taki te trawan e bigin yepi den fu frustan Gado Wortu, dan sonwan fu den owru mati fu den e gens den. Kande den mati dati no e frustan a bun rai noso a trutru howpu di Bijbel e gi. Kande yu kan yepi den.​—Leisi Kolosesma 4:6.

Son leisi a kan pasa tu taki den sma di e taki dati den na yu mati, e spotu a bun nyunsu di skrifi na ini Gado Wortu (2 Petrus 3:3, 4). Kande sonwan fu den e spotu yu fu di yu e meki muiti fu du san bun (1 Petrus 4:4). Efu dati pasa nanga yu, dan kande yu musu bosroiti efu yu wani de wan mati fu den, noso wan mati fu Gado. Te yu bosroiti fu tron wan mati fu Gado, dan yu o abi a moro bun mati di wan sma kan abi.​—Leisi Yakobus 4:4, 8.

Efu yu wani sabi moro, dan luku kapitel 12 nanga 19 fu a buku disi, San Bijbel e leri wi trutru?, di Yehovah Kotoigi tyari kon na doro.