Abraham—Wan man di ben abi bribi

Abraham e tanapu na dorosei te neti te ala sani tiri. Te a e luku den stari di e brenki na hemel, dan wantewante a e prakseri a sani di Gado pramisi en taki den bakapikin fu en o kon furu leki den stari dati (Genesis 15:5). Ibri leisi te Abraham e si den stari, den e memre en na a sani di Yehovah pramisi en. Den e gi en a dyaranti tu taki den pramisi dati o kon tru. Fu taki en leti, efu Yehovah abi a makti fu meki a bigi hemel nanga ala sani di de na ini, dan a musu de so taki a man meki Abraham nanga Sara kisi wan pikin, a no so? Na a bribi dati Abraham abi.

SAN NA BRIBI? Soleki fa Bijbel e sori, dan „bribi” na te wan sma e frutrow dorodoro tapu wan sani di a no man si. Sma abi a bribi dati fu di den abi trutru buweisi. Wan sma di abi bribi na ini Gado, e tan poti prakseri na a kontru fu den sani di Yehovah pramisi. Gi a sma dati a de leki den sani dati pasa kaba.

FA ABRAHAM BEN SORI BRIBI? Abraham ben sori taki a ben e bribi na ini den pramisi fu Gado. Fu di Abraham ben abi bribi, meki a gowe libi a kondre pe a ben gebore. A ben sabi taki Yehovah ben o tyari en go na wan tra kondre soleki fa a ben pramisi en. Fu di a ben abi bribi, meki a ben e hari go fu a wán presi na a trawan na ini Kanan, èn a ben abi a frutrow taki den bakapikin fu en ben o kisi a kondre dati te fu kaba. Fu di Abraham ben abi bribi, meki a ben de klariklari fu gi Isak leki ofrandi. A ben abi a frutrow tu taki Yehovah ben o gi Isak wan opobaka, efu dati ben de fanowdu.​—Hebrewsma 11:8, 9, 17-19.

Abraham no ben e poti prakseri na sani di ben pasa kaba, ma na sani di ben musu kon ete. Aladi Abraham nanga Sara ben kan abi wan moro bun libi na ini Ur leki na ini Kanan, toku den „no ben e tan prakseri a kondre di den ben gowe libi” (Hebrewsma 11:15, Today’s English Version). Na presi fu dati, den tan luku fa Gado ben o blesi den nanga den bakapikin fu den na ini a ten di ben o kon.​—Hebrewsma 11:16.

Yu denki taki na fu soso a bribi fu Abraham ben tranga so? Nôno. Yehovah du ala san a ben pramisi en. Te fu kaba, den bakapikin fu Abraham kon lai so te, taki den tron a pipel di wi sabi leki Israel. Baka wan pisi ten, den Israelsma kon tan na ini Kanan, a srefi kondre di Yehovah ben pramisi Abraham.​—Yosua 11:23.

SAN WI E LERI FU DEN SANI DISI? Wi kan abi a frutrow taki Yehovah o du san a pramisi. Awansi wi leki libisma e denki taki wan tu fu den pramisi fu Gado noiti no o man kon tru, toku wi sabi taki „Gado man du ala sani”.​—Mateyus 19:26.

Na eksempre fu Abraham e leri wi tu taki wi no musu tan poti prakseri nomo na sani di pasa kaba, ma na den blesi di wi o kisi na ini a ten di e kon. Na dati wan man di nen Jason leri fu du. A abi wan seryusu siki di meki taki en heri skin kon lan. Jason e taki: „Mi no musu lei, ma son leisi mi e prakseri fa mi libi ben de fosi. Moro furu na den pikinpikin sani mi e misi, soleki a brasa di mi ben man brasa mi wefi Amanda.”

Toku Jason abi a tranga bribi taki Yehovah o du san a pramisi. Iya, heri esi grontapu o tron wan paradijs èn reti-ati libisma o kisi têgo libi sondro taki den e kon siki (Psalm 37:10, 11, 29; Yesaya 35:5, 6; Openbaring 21:3, 4).a „Mi e taigi misrefi taki den bun ten dati no de fara moro”, na so Jason e taki. A e fruklari: „Heri esi mi no o abi broko-ede moro, mi no o sari moro, èn mi no o firi fruferi moro taki mi no man du noti. Fu têgo den sani disi no o de moro.” Dati na wan heri moi eksempre fu wan sma di abi bribi neleki Abraham!

[Futuwortu]