Abraham​—Wan man di ben abi deki-ati

Abraham e luku fa en osofamiri nanga den futuboi fu en e sreka densrefi fu hari go na Kanan (Genesis 12:1-5). Te a e luku a bigi grupu sma disi di a musu sorgu, dan a e frustan heri bun taki na en abi a frantwortu fu sorgu taki sani waka bun nanga den. Fa a o sorgu gi den na ini wan kondre di den no sabi so bun? A no ben o moro makriki efu a ben tan na ini Ur? A kondre dati ben de wan gudu kontren di ben abi bigi weigron, furu watra, nanga fatu gron. San o pasa te a kon siki noso te a dede na ini a nyun kondre? Suma o sorgu en osofamiri? Efu a de so taki Abraham e broko en ede nanga den sani dati, dan a no e meki den sani dati tapu en fu du san a musu du. A abi a fasti bosroiti fu du san Yehovah taigi en, awansi san e pasa. Disi e sori taki a abi trutru deki-ati.

SAN NA DEKI-ATI? Dati na te wan sma no e degedege èn te a no e frede fu du sani. A sma disi no e syensyen, èn a no e lon gi sani. Ma dati no wani taki dati wan sma di abi deki-ati no e frede noiti. Na presi fu dati, wan sma di abi a deki-ati di Gado e gi, e du san a musu du awansi a e frede.

FA ABRAHAM BEN SORI DEKI-ATI? Abraham no ben e frede fu de tra fasi leki tra sma. A ben kweki na ini wan kondre pe sma ben e anbegi bun furu falsi gado. Ma fu di a no ben e frede san tra sma ben o denki fu en, meki a tan du san bun. Abraham no ben frede fu du sani tra fasi leki tra sma, dati meki a bosroiti fu anbegi wán Gado nomo. Dati na „a Moro Hei Gado”, Yehovah.​—Genesis 14:21, 22.

Abraham ben feni en moro prenspari fu anbegi a tru Gado, leki fu feti baka gudu. A ben de klariklari fu libi a switi libi di a ben abi na ini Ur fu go tan na ini a sabana. Boiti dati, a ben abi a tranga bribi taki Yehovah ben o sorgu gi en. A no de fu taki dati a kan taki baka wan tu yari Abraham ben e prakseri a switi libi di a ben abi na ini Ur. Ma Abraham ben sabi taki ala ten Yehovah ben o sorgu en nanga en osofamiri. Fu di Abraham ben e tai hori na Yehovah, a moro prenspari sma na ini en libi, meki a teki deki-ati fu gi yesi na den komando fu Gado.

SAN WI E LERI FU DEN SANI DISI? Neleki Abraham wi kan teki deki-ati fu gi yesi na Yehovah, awansi tra sma no e du dati. Fu eksempre, Bijbel e leri wi taki te sma e opo taki gi a bribi di den abi na ini Yehovah Gado, dan a kan taki trawan o gens den. Son leisi dati kan de mati noso famiriman di abi a bun fu den na prakseri (Yohanes 15:20). Ma te wi e bribi taki den sani di wi e leri fu Yehovah na tru tori, dan wi e opo taki gi a bribi fu wi èn wi e du dati na wan lespeki fasi.​—1 Petrus 3:15.

Wi kan abi a frutrow tu taki Gado o sorgu den wan di e poti bribi na ini en, soleki fa a ben pramisi dati. Te wi abi a frutrow dati, dan a o gi wi deki-ati fu poti na anbegi fu Gado na a fosi presi na ini wi libi, na presi fu broko wi ede tumusi nanga den sani di wi abi fanowdu (Mateyus 6:33). Luku fa wán osofamiri du dati.

Aladi Doug nanga Becky abi tu yongu boi, toku den ben wani froisi go na wan kondre pe moro preikiman ben de fanowdu fu preiki a bun nyunsu fu Bijbel. Den ondrosuku sani finifini èn den begi Gado fayafaya fu yepi den. Baka dati den bosroiti fu du san den ben abi na prakseri. Doug e taki: „A no de fu taki dati wi ben musu teki deki-ati fu froisi nanga den pikin, aladi wi no ben sabi soifri fa sani ben o waka gi wi. Ma di wi bigin prakseri fu froisi, dan wi taki fu na eksempre fu Abraham nanga Sara. Wi prakseri fa den ben frutrow tapu Yehovah èn fa a yepi den ala ten. A sani dati ben de wan bigi yepi gi wi.”

Luku san Doug e taki fu a libi fu den na ini wan tra kondre: „Wi kisi bogobogo blesi.” A e fruklari: „Fu di wi no e poti prakseri moro na sani di no de so prenspari, meki now wi abi moro ten gi makandra leki osofamiri. Iya, wi e du a preikiwroko makandra, wi e taki furu nanga makandra, èn wi abi ten fu prei nanga den boi fu wi. Mi e firi so frulekti. Wortu no de fu fruteri fa dati switi.”

A no de fu taki dati a no ala sma abi na okasi fu tyari so wan bigi kenki kon. Ma neleki Abraham, wi alamala kan poti na anbegi fu Gado na a fosi presi na ini wi libi èn wi kan abi a frutrow taki Gado o yepi wi. Te wi e du dati, dan wi e gi yesi na a rai di Bijbel e gi fu ’abi deki-ati èn wi o man taki: „Yehovah na mi yepiman. Mi no o frede.”’​—Hebrewsma 13:5, 6.

[Prenspari pisi na tapu bladzijde 7]

Wan sma di abi a deki-ati di Gado e gi, e du san a musu du awansi a e frede

[Faki/​Prenki na tapu bladzijde 8]

Wan bun uma di ben e gi yesi na Gado

Sara ben trow nanga wan bun man di ben abi wan tranga bribi. Ma na uma disi di ben e gi yesi na Gado de wan heri bun eksempre gi wi. Fu taki en leti, Bijbel e taki dri leisi fu en dati a de wan bun eksempre gi umasma di lobi Gado (Yesaya 51:1, 2; Hebrewsma 11:11; 1 Petrus 3:3-6). Aladi Bijbel no taki furu fu a bun uma disi, toku wi kan si taki a ben abi moi fasi.

Fu eksempre, prakseri fa Sara ben feni en di Abraham taigi en taki Gado ben wani taki den gowe libi Ur. Kande a ben aksi ensrefi pe den ben o go èn fu san ede den ben musu go. Kande a ben e broko en ede fa den ben o sorgu densrefi. Noso, kande a ben e firi sari te a ben e prakseri taki a ben o abi fu libi en mati nanga en famiri, bika a no ben sabi efu oiti a ben o si den baka. A no de fu taki dati a ben e prakseri den sani dati. Ma toku a ben de klariklari fu gowe libi a kondre fu en èn a ben abi a frutrow taki Yehovah ben o blesi en fu di a ben gi yesi.​—Tori fu den apostel 7:2, 3.

Boiti taki Sara ben e gi yesi na Gado, a ben de wan bun wefi tu. A no ben e strei nanga en masra suma ben de basi na ini na osofamiri, ma a ben abi trutru lespeki gi en masra èn a ben yepi en na wan lobi-ati fasi fu sorgu gi na osofamiri fu den. Na so a ben e moi ensrefi nanga den moi fasi fu en.​—1 Petrus 3:1-6.

Den fasi dati e tyari wini kon gi wefi na ini a ten disi? Jill, na wan uma di trow moro leki 30 yari èn a abi wan koloku trowlibi. A e taki: „Na eksempre fu Sara leri mi taki mi no musu frede fu taigi mi masra fa mi e denki fu wan tori.” A e taki moro fara: „Ma na a srefi ten, mi masra di de na edeman fu na osofamiri, abi a frantwortu fu teki wan bosroiti te fu kaba. Te a du dati, dan mi musu du ala san mi man fu horibaka gi en so taki sani e waka bun.”

Kande a moro moi sani di wi leri fu Sara, na disi: Aladi a ben moi srefisrefi, toku a no kisi bigifasi fu a sani dati ede (Genesis 12:10-13). Na presi fu dati, a ben e horibaka gi Abraham nanga sakafasi, èn a du dati na ini bun ten èn na ini muilek ten. A no de fu taki dati Abraham nanga Sara ben de wan trowpaar di ben e gi yesi na Gado, den ben abi sakafasi èn den ben abi lobi. Iya, den ben de wan blesi gi makandra trutru.