Fu san ede Kresten e teki dopu?

Na artikel disi e poti prakseri na sani di yu ben wani kon sabi kande èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. San a Kresten dopu wani taki?

Wan sma di e teki dopu, e aksi Gado fu de wan mati fu en. Sobun, wan Kresten no musu teki dopu te a de wan beibi, ma te a owru nofo fu leri sabi Gado èn fu tron wan disipel fu Yesus (Tori fu den apostel 8:12; 1 Petrus 3:21). Wi e tron disipel fu Yesus te wi e kon sabi san a e aksi fu wi èn te wi e du den sani dati.​—Leisi Mateyus 28:19, 20.

Na ini a ten fu den apostel fu Yesus, furu sma ben de di no draidrai fu kon sabi moro fu Gado nanga Yesus. Fu eksempre, di wan man kon sabi taki a dede fu Yesus ben opo a pasi gi sma fu kisi frulusu, dan a tron wan disipel wantewante. Na ini a ten disi, furu reti-ati sma teki a bosroiti fu tron bakaman fu Yesus.​—Leisi Tori fu den apostel 8:26-31, 35-38.

2. Fu san ede Yesus ben teki dopu?

Yesus ben abi sowan 30 yari di Yohanes a Dopuman dukrun en na ini a watra fu Yordan-liba. A dopu fu Yesus ben e sori taki a ben o du san Gado ben wani en fu du (Hebrewsma 10:7). Disi wani taki dati a ben gi en libi leki wan ofrandi gi den sondu fu libisma. Srefi bifo Yesus ben komoto na hemel fu kon libi na grontapu, a ben lobi en Papa, Yehovah, kaba. A ben e gi yesi na en tu.​—Leisi Markus 1:9-11; Yohanes 8:29; 17:5.

3. Fu san ede wan Kresten musu teki dopu?

A situwâsi fu wi de tra fasi leki a di fu Yesus, fu di wi gebore leki sondu sma. Toku a dede fu Yesus e gi wi na okasi fu kon bun baka nanga Gado (Romesma 5:10, 12; 12:1, 2). Fu taki en leti, wi kan tron wan memre fu Gado en osofamiri, so taki wi kan tron sma di de fu en (2 Korentesma 6:18). Fa wi kan kisi a grani dati? Wi musu begi Yehovah fu gi wisrefi abra na en èn wi musu pramisi en taki wi o du a wani fu en wi heri libi langa. Baka dati, wi e teki dopu fu sori sma taki wi gi wisrefi abra na Gado.​—Leisi Mateyus 16:24; 1 Petrus 4:2.

4. Fa yu kan sreka yusrefi fu teki dopu?

Yehovah Kotoigi e studeri Bijbel nanga iniwan sma di wani tron wan mati fu Gado. Te yu e studeri Bijbel èn te yu e go na den Kresten konmakandra, dan dati o tranga a lobi di yu abi gi Gado èn a bribi fu yu o kon tranga tu. A o yepi yu tu fu kweki bun fasi nanga bun gwenti. Te yu e kon abi lobi, bribi, nanga tra fasi di Gado feni bun, dan dati o yepi yu fu dini Yehovah fu têgo, soleki fa yu ben pramisi en.​—Leisi Yohanes 17:3; Hebrewsma 10:24, 25.

Efu yu wani kon sabi moro, dan luku kapitel 18 fu a buku disi, San Bijbel e leri wi trutru?, di Yehovah Kotoigi tyari kon na doro.