Den Kresten fu a fosi yarihondro ben e teki prati na politiek?

▪ Fosi Yesus opo go na hemel, a ben gi den disipel fu en krin rai fa fu du a preikiwroko fu den, ma a no ben gi den rai di abi fu du nanga politiek (Mateyus 28:18-20). Fu dati ede, den disipel fu en ben e tan libi soleki fa Yesus ben leri den di a taki: „Pai Grankownu san na fu Grankownu, ma pai Gado san na fu Gado.”​—Markus 12:17.

Fa a rai dati ben yepi den bakaman fu Yesus fu libi na grontapu, sondro taki den ben de wan pisi fu en? Fa den ben sabi sortu sani ben de fu Lanti, noso Grankownu, èn sortu sani ben de fu Gado?

Na apostel Paulus ben sabi taki efu a ben o teki prati na politiek, dan a no ben o du san Krestes wani. Wan buku e taki: „Leki borgu fu Rome, Paulus aksi lanti fu yepi en di sma tyari en go na fesi krutu, ma noiti a du sani fu horibaka gi politiek” (Beyond Good Intentions​—A Biblical View of Politics).

Sortu rai Paulus ben gi den Kresten brada nanga sisa fu en? A srefi buku e taki moro fara: „Den brifi di a ben skrifi gi den bribiman na ini prenspari foto soleki Korente, Efeise, nanga Rome srefi, no ben e sori taki a ben e poti prakseri na kesekese di ben abi fu du nanga politiek.” A buku e taki tu dati Paulus „ben taigi den Kresten fu saka densrefi na ondro a tirimakti, ma na ini nowan fu den brifi fu en wi e leisi taki a ben gi den gemeente drape deki-ati fu sori lanti fa fu meki sani waka moro bun”.​—Romesma 12:18; 13:1, 5-7.

Kresten di ben e libi someni tenti yari baka di Paulus dede, tan sori krin taki den ben sabi san na fu Gado èn san na fu Lanti. Den tan sori lespeki gi politiek man, ma den no ben e teki prati na sani di ben abi fu du nanga politiek. A buku Beyond Good Intentions e taki fu den bribiman dati: „Den fosi Kresten ben sabi taki den ben musu gi grani na tirimakti, ma den ben sabi tu taki den no ben kan teki prati na politiek.”

Ma sowan 300 yari baka di Krestes dede, sani kenki. Kerki sabiman Charles Villa-Vicencio e taki: „Di den politiek sistema kenki na a ten di Konstantijn ben e tiri, dan soleki fa a sori, bun furu Kresten bigin wroko gi lanti èn gi a legre, èn den teki wroko tu di ben abi fu du nanga politiek” (Between Christ and Caesar). San ben de a bakapisi? Na a kaba fu a di fu fo yarihondro baka Krestes, a moro prenspari bribi fu a Gran Kownukondre Rome ben de a wan di ben moksi kerki nanga politiek.

Na ini a ten disi, furu kerki di e taki dati den na bakaman fu Krestes, e tan gi den memre fu den deki-ati fu teki prati na politiek. Ma den kerki dati no e teki na eksempre fu Krestes, èn den no e teki na eksempre fu den Kresten fu a fosi yarihondro.