Fu san ede a bun fu sabi san na wondru?

„Wondru no e kruderi kwetikweti nanga sabidensi.”​—RICHARD DAWKINS, WAN PROFESSOR DI ONDROSUKU FA SMA E SI SABIDENSI.

„Wi kan frustan fu san ede sma e bribi na ini wondru. A no de so taki wondru no e kruderi nanga bribi. Na presi fu dati den e sori taki Gado lobi den sani di a meki èn taki a e tan poti prakseri na den.”​—ROBERT A. LARMER, WAN PROFESSOR FU FILOSOFIA.

„YU E bribi na ini wondru?” Soleki fa wi si na tapusei, dan sma no e agri kwetikweti nanga makandra fu a tori disi. Ma fa yu ben o piki?

A kan taki yu e frede fu taki: „Iya, mi e bribi na ini wondru.” Kande yu e denki taki te yu e bribi na ini wondru, dan sma o feni dati yu e bribi ala sortu kruktu sani noso taki yu no kisi furu skoroleri. Furu sma e denki so.

Ma kande yu e bribi taki wondru e pasa trutru. A kan taki yu e bribi na ini den wondru di skrifi na ini Bijbel soleki a pisi pe skrifi taki Moses prati a Redi Se na tu. Kande yu e bribi tu taki wondru e pasa na ini a ten disi. Fu taki en leti, no so langa pasa sma ondrosuku a tori èn den kon si taki „furu sma fu Europa nanga Amerika e bribi na ini wondru. Fu eksempre, sowan dri fu ibri fo sma na Amerkankondre èn pikinmoro afu fu den sma na ini Ingrisikondre e tan bribi na ini wondru” (The Cambridge Companion to Miracles fu Graham H. Twelftree). Ma a no Kresten wawan e bribi na ini wondru. Soleki fa wan buku e taki, dan „pikinmoro ala kerki” e bribi na ini wondru (Britannica Encyclopedia of World Religions).

Noso kande yu na wan fu den sma di ben o taki: „Mi no sabi èn mi no e broko mi ede nanga dati! Wondru no e pasa na ini mi libi!” Ma fu san ede a bun fu sabi san na wondru?

Kon meki wi taki dati yu abi wan takru siki. Efu yu ben o leisi na ini wan datrabuku taki wan nyun dresi de di kan meki yu kon betre, a no ben o bun fu teki ten fu ondrosuku efu a sani dati tru? Bijbel e pramisi taki heri esi bigi wondru o pasa di o abi krakti na tapu ala sma na grontapu. Dati meki a ben o bun tu fu teki ten fu kon si efu a pramisi dati tru.

Ma fosi wi go luku san na den wondru di Bijbel pramisi, wi o luku dri sani di sma di no e bribi na ini wondru gwenti taki.

[Faki na tapu bladzijde 3]

SAN NA WAN WONDRU?

Wan wondru na wan sani di bigi moro iniwan sani di libisma man du. Nofo tron sma e bribi dati a pasa nanga yepi fu wan moro hei makti.