Aksi 2: San o pasa nanga mi te mi dede?

ROMAN ben de wan yongu boi di wan bun mati fu en lasi libi di wan ongoloku pasa nanga wagi. „A dede fu mi mati ben hebi srefisrefi gi mi”, a e taki. „Furu yari langa mi aksi misrefi san e pasa nanga wi te wi dede.”

Fu san ede a no fowtu fu poti na aksi disi?

A gersi leki wi no meki fu dede. Awinsi o owru wi de, toku wi no wani dede. Furu sma e frede te den e prakseri san o pasa nanga den te den dede.

Fa son sma e piki na aksi disi?

Furu sma e bribi taki te wan sma dede, dan wan sani fu en e libi go doro. Den e bribi taki bun sma sa kisi libi na ini hemel èn taki ogri sma o kisi strafu fu têgo gi den sondu fu den. Tra sma e denki taki te wan sma dede, dan a sma no de moro èn taki te fu kaba nowan sma o memre en.

San den piki dati e sori fu den sma disi?

Sma di gi a fosi piki kan denki taki wan sma no e dede trutru. Sma di gi a tra piki kan denki taki na fu soso wi de na libi. Den sma di abi a denki disi no e span nanga noti èn den e denki: „Meki wi nyan èn dringi, bika tamara wi o dede.”​—1 Korentesma 15:32.

San Bijbel e leri wi?

Bijbel no e leri wi taki te wan sma dede, dan wan sani fu en e libi go doro. Gado ben meki Kownu Salomo skrifi: „Den libiwan sabi taki den o dede. Ma den dedewan no sabi notinoti” (Preikiman 9:5). Den sma di „no sabi notinoti”, no sabi san e pasa na den lontu. Den no abi firi èn den no man du noti. Sobun, den dedewan no man yepi den libiwan èn den no man du ogri nanga den.

Aladi furu sma e denki tra fasi, toku Gado no meki libisma fu dede. Di Gado meki Adam, a fosi libisma, dan a ben meki en fu libi fu têgo na grontapu. A wan-enkri leisi di Gado ben taki fu dede ben de di a taigi Adam sortu strafu a ben o kisi te a trangayesi Gado. A ben taigi Adam taki a no mag nyan a froktu fu wan spesrutu bon, èn a ben warskow en taki ’na dede a ben o dede’ efu a ben o nyan a froktu fu a bon (Genesis 2:17). Efu Adam nanga Eva no ben trangayesi Gado, dan den nanga ala den bakapikin fu den di gi yesi na Gado, ben o libi fu têgo na grontapu.

Adam ben teki a bosroiti fu no gi yesi na a warskow fu Gado. A ben sondu di a trangayesi Gado, èn fu dati ede a dede (Romesma 6:23). Nowan pisi fu Adam libi go doro baka di a dede. Na presi fu dati, Adam no ben de moro. Gado taigi Adam: „Yu o broko sweti, fu di yu o abi fu wroko tranga fu feni nyanyan. Na so a o de teleki yu dede èn yu drai go baka na a gron di mi teki yu puru na ini, bika na fu doti yu meki èn na doti yu o tron baka” (Genesis 3:19). Fu di wi alamala na bakapikin fu Adam, meki wi kisi sondu fu en èn dati meki wi e dede.​—Romesma 5:12.

Aladi Adam bosroiti fu trangayesi Gado, toku Gado o du san A abi na prakseri, èn dati na fu furu grontapu nanga den bakapikin fu Adam di no o abi sondu (Genesis 1:28; Yesaya 55:11). Heri esi Yehovah sa meki furu fu den sma di ben dede, kon na libi baka. Disi na san na apostel Paulus ben taki fu a ten dati: „Gado sa gi wan opobaka na den sma di du san reti èn na den sma di no du san reti.”​—Tori fu den apostel 24:15.

Roman di kari na a bigin fu na artikel, ben bigin studeri Bijbel èn a kon sabi san Bijbel e taki fu den sma di dede èn fu Yehovah Gado. Den sani di a kon sabi ben abi furu krakti na en tapu. Leisi a tori fu en na tapu bladzijde 11 fu a tijdschrift disi.