Gado kan firi sari​—Fa wi kan meki a firi prisiri?

Oiti wan sma du wan sani nanga yu di meki yu sari so te, taki yu krei?​—a Kande a sani dati miti wi alamala. Son leisi wi e krei fu di wi e firi sari. Kande wan sma fruteri wan sani fu wi di no tru. A sani dati kan meki wi firi sari, a no so?​— Gado kan firi sari tu te sma e fruteri lei fu en. Wi o taki fu a tori disi fu kon sabi fa wi kan meki Gado firi prisiri na presi fu meki a firi sari.

Bijbel e taki dati son sma di ben e taki dati den lobi Gado ben du sani di ben „hati en”. Iya, den ben meki Gado „firi sari”! Wi sabi taki nowan sma kan gi Yehovah Gado skin-ati. En na a Almaktiwan. Sobun, meki wi luku fu san ede Yehovah e firi sari te wi no e du san a e taki.

Den fosi tu sma di Yehovah ben meki na grontapu ben du sani di ben hati en srefisrefi. A ben poti den tu sma disi na ini a paradijs na grontapu di ben nen „a dyari fu Eden”. Suma ben de den tu sma dati?​— Iya, Adam, èn baka wan pisi ten, Eva. Meki wi luku san den du di meki taki Yehovah firi sari.

Baka di Yehovah ben poti den na ini a dyari dati, a taigi den fu sorgu a dyari bun. A taigi den tu taki den ben kan meki pikin èn libi na ini a dyari sondro taki den dede. Ma fosi Adam nanga Eva meki pikin, wan sari sani pasa. Yu sabi san na dati?​— Wan engel meki taki Eva èn baka dati Adam trangayesi Yehovah. Meki wi luku fa dati pasa.

Na engel meki a gersi leki wan sneki ben e taki. Eva ben lobi san a ben yere. A sneki ben taigi en taki a ben o kon de „leki Gado”. Dati meki a du san a sneki taigi en. Yu sabi san a du?​—

Eva nyan fu a bon di Yehovah ben taigi Adam taki den no ben mag nyan fu en. Fosi Gado ben meki Eva, a ben taigi Adam: „Fu ibri bon na ini a dyari yu kan nyan teleki yu bere furu. Ma fu a bon di nen ’Sabi san bun èn san ogri’, yu no musu nyan, bika na a dei di yu o nyan fu en, na dede yu o dede.”

Eva ben sabi a wèt dati. Ma a ben tan luku a bon èn a ben si taki „den froktu fu a bon ben bun fu nyan èn taki a bon ben moi fu si, . . . Ne a piki wan froktu fu a bon, dan a nyan fu en. Baka dati a gi Adam a froktu èn a „bigin nyan” en. Yu sabi fu san ede Adam du dati?​— Na fu di Adam ben kon lobi Eva moro Yehovah. Dati meki a du san Eva ben wani na presi fu du san Gado wani. Ma a moro prenspari fu gi yesi na Yehovah, leki fu gi yesi na iniwan tra sma!

Yu e memre a sneki ete di ben taki nanga Eva? Neleki fa wan sma kan meki a gersi leki wan popki e taki, na so wan sma ben meki a gersi leki a sneki ben e taki. Yu sabi suma ben abi a sten di ben komoto fu a sneki?​— A ben de a sten fu „a fosi sneki, a wan di den e kari Didibri nanga Satan”.

Yu sabi fa yu kan meki Yehovah firi prisiri?​— Yu kan du dati te yu e pruberi fu gi yesi na en ala ten. Satan e taki dati a kan meki iniwan sma du san en wani. Dati meki Yehovah e gi wi a rai disi: „Mi manpikin [noso umapikin], de koni èn meki mi ati prisiri, so taki mi kan gi wan piki na a sma di e spotu mi.” Satan e spotu Yehovah. A e taki dati a kan tapu ibriwan sma fu dini Yehovah. Sobun, gi yesi na Yehovah èn dini en, so taki a kan firi prisiri! Yu o meki muiti fu du dati?​—