Yesus Krestes​—Fa wi musu memre en?

Na ini december, furu sma na heri grontapu e si prenki noso tra sani pe Yesus de fu si leki wan beibi. A e didon na ini wan bigi nyanyan-baki pe sma ben e poti drei grasi gi meti. Ma wi musu memre Yesus soso leki wan beibi?​—a Meki wi taki fu wan moro prenspari fasi fa wi musu memre en. Wi kan teki leri fu a sani di ben pasa nanga wan grupu skapuman di ben de na ini den weigron krosibei fu Betlehem wan neti.

Wantronso den e si wan engel na den fesi. A e taigi den: „Tide wan Frulusuman gebore gi unu na ini a foto fu David. En na Krestes, a Masra.” Na engel e taigi den tu taki den o feni Yesus di „domru na ini wan krosi èn di didon na ini wan nyanyan-baki fu meti”. Wantewante furu tra engel e kon èn den e bigin „prèise Gado”.

Fa yu ben o firi efu yu ben e yere engel e prèise Gado?​— Den skapuman e prisiri! Den e taki: „Wi musu go na Betlehem fu si san pasa.” Drape den e feni „Maria nanga Yosef nanga a beibi di ben e didon na ini a nyanyan-baki”.

Syatu baka dati, tra sma e kon na Betlehem pe Maria nanga Yosef de. Te den skapuman e fruteri den san pasa, dan den no man bribi. Yu breiti taki yu sabi den moi sani disi?​— Wi alamala di lobi Gado, breiti. Meki wi luku now fu san ede sma ben breiti taki Yesus gebore. Fu man du dati, wi musu go baka na a ten fosi Maria ben trow.

Wan dei, wan engel di nen Gabrièl kon na Maria. A pramisi Maria taki a o kisi wan beibi di „o de wan prenspari sma èn den o kari en a Manpikin fu a Moro Heiwan”. „A o tiri fu têgo leki kownu”, na so Gabrièl e taki, „èn en Kownukondre o tan fu ala ten”.

Maria wani sabi fa dati kan, fu di noiti ete a ben sribi nanga wan man. Dati meki Gabrièl e taigi en: „A krakti fu a Moro Heiwan sa tapu yu. Fu dati ede sma o taki dati a pikin di o gebore santa èn den o kari en Gado Manpikin.” Gado teki a libi fu en Manpikin puru na hemel èn a poti en na ini a bere fu Maria pe a ben o gro kon tron wan beibi. Dati ben de wan bigi wondru!

Oiti yu si prenki noso tra sani di e sori fa dri „koni man” nanga skapuman e kon luku a beibi Yesus?​— Nofo tron den sani disi de fu si na Kresnetiten. Ma den sani disi no e sori san pasa trutru. Den „koni man” disi ben e du lukuman-wroko, èn Gado no feni a sani dati bun. Meki wi go luku san pasa di den doro drape. Bijbel e taki: „Den go na ini na oso èn den si a yongu pikin nanga en mama Maria.” Soleki fa a sori, dan Yesus no ben de wan beibi moro di ben e didon na ini wan nyanyan-baki. A ben de wan pikin di ben e libi na ini wan oso makandra nanga Yosef nanga Maria!

Fa den lukuman ben man feni Yesus?​— Na wan „stari” ben sori den a pasi. A stari disi no ben tyari den go na Betlehem, ma a tyari den go fosi na Kownu Herodes na ini Yerusalem. Bijbel e taki dati Herodes ben wani feni Yesus so taki a ben kan kiri en. Denki a sani disi now. Suma yu denki ben meki a gersi leki wan stari ben e tyari den lukuman go na Herodes?​— A no ben de a tru Gado, Yehovah, ma a ben de a gensman noso a feanti fu en, Satan Didibri!

Na ini a ten disi, Satan e pruberi fu meki sma si Yesus soso leki wan beibi di no man du noti gi ensrefi. Ma na engel Gabrièl ben taigi Maria: „A o tiri fu têgo leki Kownu . . . èn en Kownukondre o tan fu ala ten.” Now Yesus e tiri leki Kownu na hemel, èn heri esi a o pori ala den feanti fu Gado. Na a sani dati wi musu memre fu Yesus èn na dati wi musu fruteri trawan.