PIKI TAPU AKSI FU BIJBEL
Suma e tiri grontapu?
Efu na Gado ben e tiri grontapu, dan yu denki taki so furu pina ben o de?
Furu sma e bribi taki na a tru Gado e tiri grontapu. Ma efu dati de so, dan yu denki taki so furu pina ben o de na grontapu? (Deuteronomium 32:4, 5) Bijbel e sori taki na wan ogri-ati tiriman e tiri grontapu.—Leisi 1 Yohanes 5:19.
Fa grontapu kon de ondro a makti fu wan ogri-ati tiriman? Na a bigin di Gado meki libisma, wan engel opo ensrefi teige Gado èn a gi den fosi tu libisma deki-ati fu du a srefi (Genesis 3:1-6). Den sma disi bosroiti fu gi yesi na a tranga-ede engel, Satan, èn na so a tron den tiriman. Na a Almakti Gado wawan abi a reti fu tiri ala sani, ma a wani taki libisma e teki en leki den tiriman fu di den lobi en (Deuteronomium 6:6; 30:16, 19). A sari taki na engel disi kori furu tra sma fu teki a srefi don bosroiti di den fosi tu libisma ben teki.—Leisi Openbaring 12:9.
Suma o lusu den problema fu libisma?
Gado o gi pasi taki na ogri-ati tiri fu Satan e tan? Kwetikweti! Gado o meki Yesus tyari wan kaba kon na ala den ogri di Satan du.—Leisi 1 Yohanes 3:8.
Gado o gi Yesus a krakti fu puru Satan na pasi (Romesma 16:20). Baka dati Gado o tiri libisma èn a o meki taki den de koloku èn taki den e libi na ini freide, soleki fa a ben wani na a bigin.—Leisi Openbaring 21:3-5.