Fu san ede a seti fu puru wan sma na ini a gemeente na wan lobi-ati sani?

JULIAN e taki: „Di den meki bekènti taki a boi fu mi no ben de wan Kotoigi moro, a ben gersi leki mi heri libi ben kon na wan kaba. A ben de a fosi pikin fu wi èn wi ben de mati fu makandra. Wi ben gwenti du furu sani nanga makandra. Ala ten a ben e tyari ensrefi na wan bun fasi. Ma wantronso a bigin du sani di Yehovah no feni bun. Mi frow ben e krei furu èn mi no ben sabi fa fu trowstu en. Ibri leisi wi ben e aksi wisrefi efu sani ben de di wi leki papa nanga mama no ben du bun.”

Ma efu a seti fu puru wan Kresten na ini a gemeente na wan lobi-ati sani, dan fu san ede a e hati so? Fa Bijbel e sori taki a de fanowdu son leisi fu du so wan seryusu sani? O ten a de fanowdu fu puru wan sma na ini a gemeente?

TU SANI KAN MEKI TAKI DEN E PURU WAN SMA NA INI A GEMEENTE

Tu sani kan meki taki a de fanowdu fu puru wan dopu Kotoigi fu Yehovah na ini a gemeente. Dati na te a du wan seryusu sondu èn a no abi berow.

Aladi Yehovah no e fruwakti fu wi taki noiti wi meki wan fowtu, toku a wani taki den futuboi fu en musu libi wan krin libi. Fu eksempre, a e sori wi krin taki wi no musu du seryusu sondu soleki hurudu, na anbegi fu falsi gado, fufuru, kiri, nanga afkodrei, èn wi no musu puru moni na sma anu tu.​—1 Kor. 6:9, 10; Openb. 21:8.

A no wan bun sani taki Yehovah wani dati wi libi wan krin libi? A no muilek fu du disi èn a kan meki taki sani waka bun gi wi. Suma no wani libi na mindri sma di no gwenti meki trobi nanga makandra, di e du san bun èn di wi kan frutrow? We, den Kresten brada nanga sisa fu wi na den sortu sma disi. A dei di wi gi wisrefi abra na Gado èn wi pramisi taki ala ten wi o du san skrifi na ini en Wortu, dan wi tron wan fu den sma dati tu.

Ma son leisi a kan pasa taki wan Kresten e du wan seryusu sondu fu di wi leki libisma swaki. Na ini owruten, den futuboi fu Yehovah ben e du seryusu sondu tu. Ma toku Gado no drai baka gi den krinkrin fu di den tan gi yesi na en. Wi kan si disi na ini a tori fu Kownu David. A ben du hurudu èn a ben kiri sma, ma toku a profeiti Natan taigi en: „Yehovah o gi yu pardon fu yu sondu.”​—2 Sam. 12:13.

Gado gi David pardon fu di David ben abi trutru berow (Ps. 32:1-5). Na so a de tu na ini a ten disi. Soso te wan futuboi fu Yehovah no abi berow noso te a e tan du sani di no bun, den o puru en na ini a gemeente (Tori 3:19; 26:20). Efu den owruman di musu krutu a tori, no e si taki a sma abi berow trutru, dan den musu puru en na ini a gemeente.

Na a bigin, wi kan denki taki a bosroiti dati hebi tumusi noso taki a de wan hati sani, spesrutu te wi de bun nanga a sma. Ma Gado Wortu e sori krin taki so wan bosroiti na trutru fu di Gado lobi wi.

SORTU WINI A E TYARI KON TE DEN E PURU WAN SMA NA INI A GEMEENTE?

Yesus ben taki dati „na den bun sani di wan sma e du, e sori taki a koni” (Mat. 11:19). A koni bosroiti di owruman e teki fu puru wan sma na ini a gemeente, e tyari bun bakapisi kon. Luku dri fu den bun bakapisi disi:

Yehovah nen e kisi glori. Fu di wi e tyari Yehovah en nen, meki a fasi fa wi e tyari wisrefi kan gi en glori noso a kan gi en porinen (Yes. 43:10). Fu eksempre, a fasi fa wan boi e tyari ensrefi kan gi en papa nanga mama grani noso a kan gi den porinen. Na so a de tu taki te sma e si dati wi leki Yehovah en pipel e tyari wisrefi na wan bun fasi, dan den kan kon lobi Yehovah. Ma efu wi no e tyari wisrefi bun, dan den no o lobi en. Gado en nen e kisi glori efu a pipel di e tyari en nen e libi wan krin libi soleki fa en wani. Na ini a ten fu Esekièl, den pipel fu tra kondre ben e si den Dyu leki a pipel fu Yehovah (Esek. 36:19-23). Na ini a ten disi, sma e si Yehovah Kotoigi tu leki a pipel di e tyari Yehovah nen. Sobun, efu wi e gi yesi na den wet fu Yehovah, dan wi o gi en glori.

Te wi e du hurudu, dan dati o tyari syen kon na tapu Gado en santa nen. Na apostel Petrus ben taigi den Kresten: „Un musu de leki pikin di e gi yesi. Den lostu di unu ben abi na a ten di unu no ben sabi noti fu Gado, no musu basi unu moro. Ma neleki fa a sma di kari unu de santa, na so un musu kon santa tu na ini ala san unu e du, bika Gado Buku taki: ’Un musu de santa, bika mi santa’” (1 Petr. 1:14-16). Te wi e libi wan krin èn santa libi, dan dati e gi Gado glori.

Ma efu wan Kotoigi fu Yehovah abi a gwenti fu du sani di no bun, dan a no de fu taki dati den mati fu en nanga tra sma o kon sabi san a e du. A seti fu puru wan sma na ini a gemeente, e sori taki Yehovah abi wan krin pipel. Den e du san Bijbel e taki so taki den kan tan de santa. Wan leisi wan man go na wan konmakandra na ini wan Kownukondre zaal na Switserland èn a taki dati a ben wani tron wan Kotoigi. A man disi ben abi wan sisa di den ben puru na ini a gemeente fu di a ben du hurudu. A man ben wani de wan memre fu wan organisâsi di „no e gi pasi taki den sma drape e du ogri”.

A gemeente e tan krin. Na ini a gemeente fu den Kresten na Korente, yu ben abi sma di ben e du sondu fu espresi. Ma den no puru den sma disi na den mindri. Dati meki na apostel Paulus warskow den, fu di den sma disi ben kan meki trawan go du ogri tu. Paulus ben agersi den sma disi nanga srudeki di kan meki wan heri baki blon sweri. A taki: „Na pikinso srudeki nomo e meki ala blon sweri.” Baka dati a gi den a rai fu ’puru na ogriman na den mindri’.​—1 Kor. 5:6, 11-13.

Soleki fa a sori, dan „na ogriman” ben abi a gwenti fu du hurudu sondro fu syen. A pasa srefi taki tra sma na ini a gemeente no ben abi muiti nanga san a man ben e du (1 Kor. 5:1, 2). Efu a Kresten gemeente drape ben e gi pasi taki sma du den sortu seryusu sondu dati, dan tra Kresten ben kan denki taki den ben kan go libi wan huru libi leki den sma fu a foto. Sobun, te wan gemeente e gi pasi taki sma e tan du sondu fu espresi, dan sma no o si den wet fu Gado leki wan seryusu sani (Preik. 8:11). Boiti dati, den sma di e du sondu sondro fu abi berow kan tron „leki bigi ston di kibri na ondro watra”. Den kan pori a bribi fu tra sma na ini a gemeente.​—Yud. 4, 12.

A kan yepi a sma fu drai kon baka. Wan leisi Yesus fruteri wan tori fu wan yongu man di gowe libi en papa oso. A yongu man disi libi wan yayolibi èn a frumorsu ala a gudu di en papa gi en. Den sani di miti en, leri en taki a grontapu libi no ben switi srefisrefi. Te fu kaba, a kisi ensrefi baka èn a sori berow. Ne a bosroiti fu drai go baka na en famiri (Luk. 15:11-24). Yesus e fruteri taki a papa ben lobi a boi èn dati meki a ben breiti srefisrefi taki a boi fu en kenki. Disi e yepi wi fu frustan fa Yehovah e firi. A e taki: „Mi no e prisiri te wan ogri sma e dede, ma mi e prisiri te wan ogri sma e drai en libi èn te a e tan na libi.”​—Esek. 33:11.

Sobun, te den puru wan sma na ini a gemeente, dan baka wan pisi ten a kan kon si taki a lasi en famiri fu Kresten brada nanga sisa. Kande a e si den takru bakapisi fu den ogri di a du èn a e prakseri baka o koloku a ben de di a ben abi wan bun matifasi nanga Yehovah èn nanga En pipel. Disi kan yepi en fu drai kon baka.

Lobi de fanowdu fu yepi wan sma fu drai kon baka. A de fanowdu tu fu gi en piri-ai. A psalm skrifiman David ben taki: „Efu den reti-ati sma ben o naki mi, dan na sori den e sori mi bun-ati. Efu den ben o piri-ai gi mi, dan dati ben o de leki switi oli na tapu mi ede” (Ps. 141:5). Kon meki wi taki dati wan sma e nyan èn wan pisi meti e fasi na ini en gorogoro. A no man hari bro bun èn a no man yepi ensrefi. A no man taki srefi. Efu wan sma no yepi en esi-esi, a o dede. Ma dan wan mati e kon èn a e naki en na tapu en baka fu meki a pisi meti komoto na ini en gorogoro. Kande a e hati en te a mati e naki en na tapu en baka, ma disi o meki taki a no dede. Na a sani disi David kon si tu. A frustan fu san ede a ben de fanowdu taki wan reti-ati sma gi en piri-ai gi en eigi bun, awinsi a ben o hati en.

Furu tron a de so taki te den e puru wan sma na ini a gemeente, dan dati na a strafu di a abi fanowdu fu drai kon baka. Baka sowan tin yari, a manpikin fu Julian di wi kari na a bigin fu na artikel, kenki en libi èn a drai kon baka na a gemeente. Now a de wan owruman. A e taki: „Di den puru mi na ini a gemeente, dan dati yepi mi fu kon si den takru bakapisi fu a libi fu mi. Na a strafu dati mi ben abi fanowdu.”​—Hebr. 12:7-11.

FA WI KAN SORI LOBI TE DEN PURU WAN SMA NA INI A GEMEENTE?

A tru taki a de wan sari sani te den e puru wan sma na ini a gemeente. Ma disi no wani taki dati yepi no de moro gi so wan sma, èn a gemeente no musu broko saka so te taki den no sabi moro san fu du. Wi alamala musu horibaka gi a seti disi so taki sani kan waka bun na ini a gemeente.

Owruman di musu fruteri wan sma a sari sani taki den o puru en na ini gemeente, e pruberi fu sori a lobi fu Yehovah. Na wan switi fasi den o sori en krin san a musu du fu drai kon baka. Efu wan sma e sori taki a wani meki muiti fu kenki en libi, dan wanwan leisi den owruman kan go baka na en fu memre en san a kan du fu drai kon baka na Yehovah.a

Famiri kan sori lobi gi a gemeente nanga a sma di sondu te den e sori lespeki gi a bosroiti fu den owruman. Julian e taki: „A ben de mi manpikin ete, ma a fasi fa a ben libi ben meki taki mi nanga en no ben man bumui nanga makandra moro.”

Ala sma na ini a gemeente kan sori tru lobi te den no e bumui nanga wan sma di den owruman puru na ini a gemeente èn te den no e taki nanga en (1 Kor. 5:11; 2 Yoh. 10, 11). Na so den e horibaka gi a seti disi di komoto fu Yehovah. Na en gi owruman a frantwortu fu puru sma na ini a gemeente. Boiti dati, den kan horibaka gi den famiri fu den sma disi èn den kan du ala san den man fu sori lobi gi den. Furu tron den famiri disi e sari srefisrefi. Kresten brada nanga sisa no musu gi den a firi taki den no wani bumui nanga den.​—Rom. 12:13, 15.

Julian e taki: „A seti fu puru wan sma na ini a gemeente de fanowdu. A e yepi wi fu libi soleki fa Yehovah wani. Te fu kaba, a e tyari bun bakapisi kon awinsi a e hati. Efu mi no ben horibaka gi a seti disi, dan a manpikin fu mi no ben o drai kon baka.”