Wan bon di kapu trowe kan sproiti baka?

TE YU teki wan moi sedrebon fu Libanon gersi nanga wan olèifbon di kronkron èn kundukundu, dan na olèifbon no sori wan kefalek moi bon. Ma na olèifbon na wan spesrutu bon fu di a no e dede awinsi fa a weer de. Sonwan fu den bon disi owru sowan 1000 yari. Fu di den rutu fu na olèifbon e go bun dipi na ini a gron, meki a kan bigin gro baka srefi te a tompu wawan de ete. Solanga den rutu no dede, a o gro baka.

A famiri-edeman Yob ben de seiker taki awinsi a ben o dede, a ben o libi baka (Yob 14:13-15). Fu sori taki a ben de seiker taki Gado man gi en libi baka, a gebroiki na eksempre fu wan bon. Kande a ben abi wan olèifbon na prakseri di a taki: „Srefi wan bon abi wan howpu. Efu sma kapu en a e sproiti baka.” Te dreiten pasa èn alen e bigin fadon, dan a drei tompu fu wan olèifbon kan bigin gro baka èn den „taki fu en o bigin gro leki wan nyun bon”.​—Yob 14:7-9.

Neleki fa wan gronman wani taki wan olèifbon di koti trowe, gro baka, na so Yehovah Gado wani meki en futuboi èn furu tra sma di dede, kon na libi baka. A e angri fu du disi srefi (Mat. 22:31, 32; Yoh. 5:28, 29; Tori 24:15). A o de wan prisiri fu gi den dedesma di kon na libi baka, wan switikon èn fu si fa den e prisiri baka fu a libi.