TORI FU A KAFTI | SUMA NA YEHOVAH KOTOIGI?
Fu san ede wi e preiki?
A wán sani di furu sma sabi fu Yehovah Kotoigi, na taki den e preiki na ala sei. Wi e go na sma oso fu preiki gi den, wi e preiki na presi pe furu sma de èn na iniwan tra presi pe wi kan miti sma. Fu san ede wi e du dati?
Yehovah Kotoigi e preiki fu gi Gado glori èn fu meki sma kon sabi en nen (Hebrewsma 13:15). Wi e preiki tu fu di wi wani gi yesi na Krestes Yesus di ben taki: „Go na sma fu ala kondre èn meki den tron disipel. . . . Leri den fu du ala san mi taigi unu fu du.”—Mateyus 28:19, 20.
Wi e preiki tu fu di wi lobi tra sma (Mateyus 22:39). Wi sabi taki furu sma abi den eigi bribi èn taki a no ala sma wani sabi moro fu a boskopu di wi e tyari. Ma wi e bribi taki den leri fu Bijbel kan kibri sma libi. Fu dati ede, neleki den Kresten na ini a ten fu den apostel, wi ’e gi sma leri doronomo èn wi e tan fruteri sma a bun nyunsu fu Krestes’.—Tori fu den apostel 5:41, 42.
A sabiman Antonio Cova Maduro ben skrifi taki Yehovah Kotoigi ’e du ala muiti fu tyari a Wortu fu Gado gi sma na den moro farawe presi fu grontapu’.—A koranti El Universal na ini Venezuela
Furu sma di e leisi den buku fu wi no de Yehovah Kotoigi. Milyunmilyun sma di e studeri Bijbel nanga wi na sma fu tra kerki. Toku den breiti taki Yehovah Kotoigi e kon na den.
Efu yu wani sabi tra sani fu Yehovah Kotoigi, dan yu kan du disi:
Aksi wan Yehovah Kotoigi.
Go na a website fu wi, www.jw.org.
Go na wan konmakandra fu wi. Ala sma kan go èn yu no abi fu pai.