Gi pardon nanga yu heri ati

RAI FU BIJBEL: „Tan . . . gi makandra pardon nanga un heri ati, srefi te wan sma feni taki wan trawan du wan hati sani nanga en. Soleki fa Yehovah e gi unu pardon nanga en heri ati, na so un musu gi trawan pardon tu.”​—Kolosesma 3:13.

San disi wani taki? Bijbel e agersi sondu nanga wan paiman. Te wan sma kisi pardon fu en sondu, dan a de leki a no abi fu pai a paiman moro (Mateyus 18:21-35). Wan buku e taki dati a Griki wortu di vertaal na ini Bijbel nanga „gi pardon” e sori taki wan sma „no e teki wan paiman moro fu di a taigi a trawan di musu pai en taki a no abi fu pai en moro”. Sobun, te wi bosroiti fu gi wan sma di du wi wan ogri pardon, dan wi no e fruwakti taki a sma musu du wi wan bun baka. Ma te wi de klariklari fu gi sma pardon, dan disi no wani taki dati wi feni na ogri di a du bun. A no wani taki tu dati a sani di a sma du no e hati wi moro. Na presi fu dati, na bosroiti wi bosroiti nomo fu no hori a sma na ati, awinsi a ’du wan hati sani nanga wi’.

A rai disi e wroko na ini a ten disi? Wi alamala e sondu fu di wi na sondusma (Romesma 3:23). Sobun, a de wan koni sani te wi abi a gwenti fu gi trawan pardon, fu di wan dei o kon te den o abi fu gi wi pardon tu. Boiti dati, wi srefi e kisi wini te wi e gi trawan pardon. Fa so?

Te wi abi bita-ati èn wi e hori trawan na ati, sobun te wi no wani gi den pardon kwetikweti, dan wi e pina wisrefi. Te wi abi den firi disi, dan wi no o de koloku, wi no o man libi soleki fa wi wani èn wi o de nanga atibron ala ten. Wi kan kon siki srefi. Na ini wan tijdschrift Datra Yoichi Chida nanga Professor Andrew Steptoe taki dati ondrosuku na ini a ten disi sori taki atibron nanga bita-ati kan meki wan sma kon siki na en ati.​—Journal of the American College of Cardiology.

Ma luku sortu wini wi kan kisi te wi e gi trawan pardon. Te wi e gi trawan pardon nanga wi heri ati, dan wánfasi nanga freide o de. Na so wi o tan mati fu trawan. San moro prenspari, na taki wi wani teki na eksempre fu Gado di e gi sondusma pardon nanga en heri ati te den abi berow. A e fruwakti taki wi du a srefi sani tu.​—Markus 11:25; Efeisesma 4:32; 5:1.