Tan hori na prakseri taki na Yehovah wawan abi a reti fu tiri hemel nanga grontapu
„Na so sma o sabi taki yu di nen Yehovah, yu wawan na a Moro Heiwan fu heri grontapu.”—PS. 83:18.
1, 2. (a) Sortu prenspari tori ala libisma musu hori na prakseri? (b) Fu san ede a de fanowdu taki wi e frustan a prenspari tori dati?
GI FURU sma na ini a ten disi, moni na a moro prenspari sani. Den e suku nomo fu kon abi moro gudu noso fu no lasi den sani di den abi. San moro prenspari gi trawan na a famiri fu den, a gosontu fu den, noso sani di den du.
2 Ma wan tori de di prenspari moro ala den sani disi. Dati na taki a musu kon na krin taki na Yehovah wawan abi a reti fu tiri hemel nanga grontapu. Wi musu luku bun taki wi no e frigiti a sani disi. Fa dati kan pasa? Den aladei sani fu a libi kan teki so furu fu wi ten taki wi e frigiti o prenspari a de taki a musu kon na krin taki na Yehovah wawan abi a reti fu tiri. Noso kande wi e gi pasi taki den problema fu wi e puru wi prakseri na a prenspari tori disi. O moro wi e frustan san musu kon na krin èn san disi abi fu du nanga wi, o moro wi o man pasa den tesi di e miti wi na ini a libi. Disi o yepi wi fu kon moro krosibei na Yehovah.
FU SAN EDE A TORI DISI PRENSPARI SO?
3. San Satan taki fu a tiri fu Gado?
3 Den sani di Satan Didibri du meki sma tweifri efu na Gado abi a reti fu tiri hemel nanga grontapu. A ben taki dati Gado a no wan bun tiriman èn taki a e hori bun sani na baka gi den sma di a meki. Didibri ben feni taki libisma o de moro koloku efu den e tiri densrefi (Gen. 3:1-5). Satan ben taki tu dati nowan libisma e dini Gado nanga en heri ati. A feni taki iniwan sma o drai baka gi Yehovah efu a kisi nofo tesi (Yob 2:4, 5). Fu di Satan opo ensrefi teige Gado, meki Gado e gi libisma na okasi fu kon si taki a e tyari takru bakapisi kon te sma no e saka densrefi na ondro a tiri fu en.
4. Fu san ede a musu kon na krin suma abi a reti fu tiri hemel nanga grontapu?
4 A no de fu taki dati Yehovah sabi taki den sani di Didibri taki no tru. Sobun, fu san ede Gado e tan gi Satan so furu ten fu pruberi fu sori taki a abi leti? Na fu di libisma nanga engel de na ini a tori. (Leisi Psalm 83:18.) Te yu luku en bun, dan den fosi tu libisma no ben wani Yehovah leki a tiriman fu den. Sensi a ten dati, furu sma kon abi a denki disi. A sani disi kan meki son sma denki taki Didibri abi leti. Solanga libisma noso engel no kon sabi krin suma abi a reti fu tiri hemel nanga grontapu, trutru freide nanga wánfasi no o de. Ma te a kon na krin taki na Yehovah wawan abi a reti fu tiri, dan ala sma o saka densrefi na ondro a tiri fu en fu ala ten. Na so freide o de baka na hemel èn na grontapu.—Ef. 1:9, 10.
5. Fa wi kan yepi fu sori taki Yehovah wawan abi a reti fu tiri hemel nanga grontapu?
5 Te fu kaba a o kon na krin taki na Gado wawan abi a reti fu tiri. A o kon na krin tu taki a tiri fu Satan nanga libisma no bun èn Gado o puru den na pasi. Na a ten dati a Mesias Kownukondre fu Gado o du san Gado ben abi na prakseri èn a o de krin taki libisma man tan gi yesi na Gado èn taki den man horibaka gi en leki Tiriman (Yes. 45:23, 24). Yu wani de wan fu den sma di e tan horibaka gi Yehovah leki a Moro Hei Tiriman? A no de fu taki dati yu wani de wan fu den. Dati meki wi musu tan hori na prakseri san moro prenspari èn wi musu frustan tu fu san ede a prenspari so.
A FRULUSU FU LIBISMA A NO A MORO PRENSPARI SANI
6. Fu san ede a prenspari taki wi e horibaka gi Yehovah leki a Moro Hei Tiriman?
6 Soleki fa wi si kaba, dan wan tumusi prenspari sani di libisma musu hori na prakseri, na taki a musu kon na krin taki na Yehovah abi a reti fu tiri. A sani disi prenspari moro leki den sani di e miti wi na ini wi libi. Ma disi wani taki dati a no prenspari gi Yehovah taki wi e kisi frulusu, noso taki a no e broko en ede nanga wi? Kwetikweti. Fu san ede wi kan taki dati?
7, 8. Te a kon na krin taki na Yehovah wawan abi a reti fu tiri, dan fa dati o tyari wini kon gi wi?
7 Yehovah lobi libisma trutru èn a abi warderi gi den. A ben de klariklari fu seti sani, so taki wi kan kisi têgo frulusu nanga yepi fu a brudu fu en Manpikin (Yoh. 3:16; 1 Yoh. 4:9). Efu Yehovah no du san a pramisi, dan Didibri o abi leti fu taki dati Gado e lei èn taki a e hori bun sani na baka gi wi. Na so a ben o gersi leki Gado a no wan bun tiriman. Tra gensman di e spotu den pramisi fu Yehovah ben o abi leti tu. Den sma disi e taki: „A ben pramisi wi taki a ben o kon. Ma pe a de? We, sensi a dei di den afo fu wi dede, ala sani tan soifri soleki fa den ben de sensi di Gado bigin meki sani” (2 Petr. 3:3, 4). Dati meki wan fu den sani di Yehovah o du fu sori taki na en abi a reti fu tiri, na taki a o frulusu ala libisma di e gi yesi na en. (Leisi Yesaya 55:10, 11.) Leki a Moro Hei Tiriman ala sani di Yehovah e du e sori taki en na lobi. Dati meki wi kan de seiker taki ala ten a o sori lobi nanga warderi gi den reti-ati futuboi fu en.—Eks. 34:6.
8 A tru taki a musu kon na krin taki na Yehovah wawan abi a reti fu tiri. Ma disi no wani taki dati a no prenspari gi en taki wi e kisi frulusu. Wi sabi taki Yehovah lobi wi trutru, ma wi no wani frigiti taki wan moro prenspari sani de di wi musu hori na prakseri èn wi wani tan horibaka gi en leki a Moro Hei Tiriman.
YOB KENKI A FASI FA A BEN E SI SANI
9. San Satan ben taki fu Yob? (Luku a prenki na a bigin fu na artikel.)
9 A buku Yob e sori fu san ede a prenspari fu sabi san moro prenspari. A buku disi na wan fu den moro owru Bijbel buku. Na ini a buku dati Satan taki dati efu Yob ben o kisi hebi tesi, dan a ben o drai baka gi Gado. Satan ben wani taki Gado srefi pina Yob, ma Yehovah no du dati. A gi pasi taki Satan tesi Yob èn a taigi Satan: „Yu kan du san yu wani nanga ala san a abi.” (Leisi Yob 1:7-12.) Na ini wan syatu pisi ten Yob lasi den futuboi fu en, den gudu fu en, nanga den tin pikin fu en di a ben lobi so te. Satan du den sani disi na so wan fasi taki a ben gersi leki na Gado srefi ben du den ogri disi nanga Yob (Yob 1:13-19). Baka dati Satan naki Yob nanga wan takru siki (Yob 2:7). A sani di ben meki Yob firi moro brokosaka, na taki en wefi nanga dri falsi mati fu en taigi en hati sani.—Yob 2:9; 3:11; 16:2.
10. Sortu fowtu denki Yob ben abi, aladi a tan gi yesi na Gado?
10 San ben de a bakapisi? A kon na krin taki Satan ben lei. Yob weigri fu drai baka gi Gado (Yob 27:5). Ma fu wan syatu pisi ten, Yob no ben e si sani na a yoisti fasi. A ben de nomonomo fu sori taki en na wan reti-ati sma èn a ben wani sabi fu san ede a ben e pina so (Yob 7:20; 13:24). Kande wi man frustan fa Yob ben e firi te wi e luku fa a pina. Toku Gado ben feni en fanowdu taki Yob kenki a fasi fa a ben e si sani. San Yehovah taigi en?
11, 12. San Yehovah yepi Yob fu kon si, èn san Yob du?
11 Fo kapitel fu a buku Yob, kapitel 38 te go miti 41, e sori san Gado taigi Yob. Ma nowan presi wi e leisi taki Gado e taigi Yob krin fu san ede a ben e pina. Na presi fu dati, Yehovah ben wani yepi Yob fu kon si taki a ben de noti te a ben e teki ensrefi gersi nanga na almakti Gado. A yepi Yob fu kon si tu taki den problema fu en no ben de den moro prenspari sani. (Leisi Yob 38:18-21.) A sani disi yepi Yob fu kon si sani na a yoisti fasi.
12 Yu feni taki Gado no ben sori sari-ati gi Yob di a piri-ai gi en baka di a ben pina so? Dati no de so, èn Yob no ben denki so tu. Aladi a ben e pina so, toku Yob bigin taki tra fasi. A ben taki srefi: „Mi e aksi yu fu frigiti san mi taki. Luku fa mi e sidon na doti èn na ini asisi fu sori taki mi e sari.” Na fu di Yehovah ben gi Yob piri-ai na wan lobi-ati fasi meki a kon si sani tra fasi (Yob 42:1-6). Wan pisi ten na fesi, Yob ben kisi piri-ai fu Elihu di ben yongu moro en (Yob 32:5-10). Baka di Yob teki a piri-ai fu Gado èn a kenki a denki fu en, dan Yehovah sori trawan taki a ben breiti nanga Yob fu di a ben horidoro di a kisi tesi.—Yob 42:7, 8.
13. Fa Yob ben o kisi wini fu a rai fu Yehovah srefi baka di den tesi fu en ben kon na wan kaba?
13 Yob ben o tan kisi wini fu a rai fu Yehovah srefi baka di den tesi fu en ben kon na wan kaba. Fa so? We, aladi „Yehovah blesi Yob moro leki fosi”, a ben musu fu teki ten fosi a kon betre èn fosi a kisi den sani baka di a ben lasi. Bijbel e sori taki bakaten a „kisi seibi manpikin nanga dri umapikin” (Yob 42:12-14). A no de fu taki dati Yob ben e misi den pikin fu en di Satan ben kiri. A kan taki wan heri pisi ten a ben man memre krin fa a ben pina. Awansi a ben kon frustan moro bun fu san ede tesi ben miti en, toku a kan taki ten na ten a ben e aksi ensrefi fu san ede den tesi ben musu hebi so. Awansi fa a no fa, a ben kan prakseri a rai di Gado ben gi en. Dati ben o yepi en fu tan si sani na a yoisti fasi èn na so a ben o feni trowstu.—Ps. 94:19.
Te problema e miti wi, dan wi o hori na prakseri san prenspari trutru? (Luku paragraaf 14)
14. San wi e leri fu na ondrofeni fu Yob?
14 A tori fu Yob kan yepi wi fu kon si sani na a yoisti fasi tu èn a kan de wan trowstu gi wi. Fu taki en leti, Yehovah meki sma skrifi a tori disi na ini Bijbel „fu leri wi wan sani. Disi e yepi wi fu horidoro èn fu kisi trowstu fu Gado Buku, so taki wi kan abi howpu” (Rom. 15:4). San wi kan leri fu den sani di miti Yob? Wan prenspari sani di wi e leri na disi: Wi no musu poti so furu prakseri na wi eigi libi taki wi e frigiti taki a musu kon na krin taki na Yehovah wawan abi a reti fu tiri hemel nanga grontapu. Wi musu frustan tu taki neleki Yob wi musu tan gi yesi na Gado awansi sortu tesi e miti wi.
15. Sortu wini a abi te wi e horidoro te wi e kisi tesi?
15 A tori fu Yob kan de wan trowstu gi wi fu di a e sori taki te wi e kisi tesi, dan dati no wani taki dati Yehovah e atibron nanga wi. Na presi fu dati tesi e gi wi okasi fu sori taki wi e horibaka gi Gado leki a Moro Hei Tiriman (Odo 27:11). Te wi e tan horidoro, dan Yehovah „o feni wi bun” èn a howpu fu wi o kon moro tranga. (Leisi Romesma 5:3-5.) A tori fu Yob e sori taki „Yehovah lobi sma trutru èn taki a abi sari-ati” (Yak. 5:11). Efu wi e horibaka gi Gado leki a Moro Hei Tiriman, dan a o blesi wi. Te wi sabi disi, dan dati o yepi wi fu „horidoro nanga pasensi èn nanga prisiri awinsi san e pasa”.—Kol. 1:11.
TAN HORI NA PRAKSERI SAN MORO PRENSPARI
16. Fu san ede wi musu tan memre wisrefi taki a musu kon na krin taki na Yehovah wawan abi a reti fu tiri?
16 A no de fu taki dati wi sabi taki a musu kon na krin taki na Yehovah wawan abi a reti fu tiri. Ma te wi abi problema, dan a kan muilek gi wi fu tan hori a sani disi na prakseri. Srefi pikin problema kan gersi bigi problema te wi e tan prakseri den. Dati meki a bun te wi e tan memre wisrefi taki wi musu horibaka gi Gado leki a Moro Hei Tiriman te tesi e miti wi.
17. Te wi e teki prati doronomo na a wroko di Yehovah gi wi, dan fa dati e yepi wi fu tan hori na prakseri san moro prenspari?
17 Te wi e teki prati doronomo na a wroko di Yehovah gi wi, dan dati kan yepi wi fu no frigiti taki wan moro prenspari sani de di wi musu hori na prakseri. Luku na eksempre disi: Brudu ben naki wan sisa di nen Renee, en skin ben hati en doronomo èn a ben abi kanker. Di a ben e didon na ati-oso, a preiki gi den sma di ben e wroko drape, gi sikisma, èn gi sma di ben e kon luku en. Wan leisi di a ben de na ati-oso, dan a preiki 80 yuru na ini tu nanga afu wiki nomo. Srefi di Renee ben de fu dede, a tan hori na prakseri taki a ben musu sori taki a e horibaka gi Yehovah leki a Moro Hei Tiriman. A sani disi meki taki a no ben e broko en ede tumusi.
18. Fa a sani di miti wan sisa e sori fu san ede wi musu hori na prakseri san prenspari trutru?
18 A no de fu taki dati te wi e kisi fu du nanga den problema fu na aladei libi, dan wi wani hori na prakseri tu taki a musu kon na krin taki na Yehovah abi a reti fu tiri. Jennifer ben musu tan dri dei langa na wan vliegveld fu wakti teleki a ben man feni wan opolani fu go na oso. Ibri leisi baka a ben e yere taki na opolani di ben o frei en go na oso, no ben o frei a dei dati. A ben e firi leki a ben de en wawan èn a ben weri. Sobun, a ben kan lasi-ati. Na presi fu dati a begi Gado fu sori en fa a kan de wan deki-ati gi tra sma di ben de na ini a srefi situwâsi leki en. San ben de a bakapisi? Jennifer preiki gi furu sma èn a prati furu tijdschrift. A e taki: „Mi firi taki Yehovah blesi mi di mi ben de na ini so wan muilek situwâsi. Mi firi tu taki a gi mi a krakti fu gi a nen fu en grani.” Iya, Jennifer tan hori na prakseri san na a wani fu Yehovah.
19. Fa a pipel fu Yehovah e prakseri fu a reti di a abi fu de a Moro Hei Tiriman?
19 Na a pipel fu Yehovah wawan e frustan taki na Yehovah abi a reti fu tiri. Dati meki den na den tru anbegiman fu en. Sobun, ibriwan fu wi musu meki muiti fu tan horibaka gi Yehovah leki a Moro Hei Tiriman.
20. Fa Yehovah feni en taki yu e tan horibaka gi en leki a Moro Hei Tiriman?
20 A no de fu taki dati Yehovah e warderi en taki yu e tan horibaka gi en leki a Moro Hei Tiriman èn taki yu e horidoro te yu e kisi tesi (Ps. 18:25). Na ini a tra artikel wi o luku moro fara fu san ede a fiti taki wi e horibaka gi Yehovah leki a Moro Hei Tiriman èn wi o si tu fa wi kan tan du dati.