Yu ben sabi a sani disi?

Fu san ede Yesus no ben feni en bun taki sma ben e meki sweri?

SOLEKI fa a Wet fu Moses e sori, dan son leisi a ben fiti taki den Dyu ben e meki wan sweri. Ma na ini a ten fu Yesus, sma ben teki en leki wan gwenti fu meki wan sweri gi iniwan pikin sani di den ben e taki. Den ben e du disi fu sori sma taki den no ben e lei. Ma tu leisi Yesus sori taki a sani disi no ben bun. A ben leri sma: „Te unu taki ’iya’, dan meki a tan iya. Te unu taki ’nôno’, dan meki a tan nôno.”​—Mat. 5:33-37; 23:16-22.

Soleki fa a buku Theological Dictionary of the New Testament e sori, dan a Talmud (a Dyu wet) e yepi wi fu kon si taki den Dyu ben gwenti fu meki sweri fu sori sma taki den no ben e lei. Disi de krin fu si fu di a Talmud ben e taki finifini sortu sweri ben fiti èn sortuwan no ben fiti.

A no Yesus wawan ben feni taki a gwenti disi no ben bun. Fu eksempre, a Dyu historia skrifiman Flavius Josephus, ben skrifi fu wan Dyu sekte di no ben e meki sweri. Den sma fu a sekte dati ben e bribi taki wan sweri ben ogri moro wan lei. Den ben feni taki efu wan sma ben musu meki wan sweri fu meki trawan bribi en, dan a sma dati ben musu fu de wan leiman. A Dyu buku di sma sabi leki Wisdom of Sirach (A koni fu Sirak) e taki wan srefi sortu sani. A buku disi e taki: „Wan man di lobi sweri, ogri te na ini en bonyo.” Yesus no ben feni en bun taki sma ben e meki sweri gi lawlaw sani. Efu wi abi a gwenti fu taki san tru, dan wi no abi fu meki sweri fu meki sma bribi san wi e taki.