„Pe Gado ben de?”
„ALA YURU MI E AKSI MISREFI: PE GADO BEN DE?”—Disi na san Paus Benedictus XVI ben taki, di a go luku a fositen strafuman-kampu na Auschwitz, na ini Polen.
TE RAMPU E PASA, YU E AKSI YUSREFI ’PE GADO BEN DE?’ NOSO OITI WAN SARI SANI PASA NA INI YU LIBI DI MEKI YU AKSI YUSREFI EFU GADO E BROKO EN EDE NANGA YU?
Kande yu e firi leki Sheila di e libi na Amerkankondre èn di kweki na ini wan famiri fu fayafaya kerkisma. A e taki: „Sensi mi pikin, mi ben wani kon sabi Gado fu di en na wi Mekiman. Ma noiti mi ben si en leki mi mati. Mi ben e denki taki a ben e luku mi fu farawe nomo. Mi no ben denki taki Gado ben e teige mi, ma mi no ben e bribi tu taki a ben e broko en ede nanga mi.” Fu san ede Sheila ben e tweifri efu Gado lobi en? A e taki: „Ibri leisi baka sari sani ben e miti mi famiri, èn a ben gersi leki Gado no ben e yepi wi .”
Kande yu e bribi tu na ini wan Almakti Gado, neleki Sheila. Ma kande yu e aksi yusrefi efu a e broko en ede trutru nanga yu. A reti-ati man Yob, di ben e bribi na ini a krakti nanga a koni fu a Mekiman, ben e aksi ensrefi den sani dati tu (Yob 2:3; 9:4). Baka makandra rampu ben e miti Yob èn a ben gersi leki a no ben o feni frulekti. Dati meki a aksi Gado: „Fu san ede yu drai baka gi mi? Fu san ede yu e si mi leki yu feanti?”—Yob 13:24.
Ma san Bijbel e taki? Na Gado abi a fowtu te rampu e miti wi? Buweisi de taki Gado e broko en ede nanga libisma èn nanga ibriwan fu wi? Fa wi kan sabi efu a e si wi, efu a e frustan wi, efu a e firi gi wi, noso efu a e yepi wi nanga den problema fu wi?
Na ini den tra artikel, wi o luku fa a fasi fa libisma meki e sori taki Gado e broko en ede nanga wi (Romesma 1:20). Baka dati wi o luku fa Bijbel e sori taki Gado e broko en ede nanga wi. Te yu e luku den sani di a meki èn te yu e leisi Bijbel, dan yu o „kon sabi en” moro bun. O moro yu e kon sabi en, o moro dati o yepi yu fu bribi taki ’a e broko en ede nanga yu’.—1 Yohanes 2:3; 1 Petrus 5:7.