Heri esi Gado o puru ala pina na grontapu

„O Yehovah, o langa mi musu bari, fosi yu arki mi? O langa mi musu bari fu yu yepi mi? O langa yu o meki sma du ogri nanga mi, fosi yu frulusu mi?” (Habakuk 1:2, 3) Den wortu disi na fu Habakuk, wan reti-ati man di ben de wan mati fu Gado. Na fu di a no ben abi bribi meki a taki a sani dati? Kwetikweti. Gado ben pramisi Habakuk taki a ben poti wan ten te a ben o puru pina.​—Habakuk 2:2, 3.

Te yu noso wan famiri fu yu e pina, dan makriki yu ben kan denki taki Gado e draidrai fu du wan sani. Kande yu feni taki a ben musu du wan sani kaba. Ma Bijbel e taki: „Yehovah no e draidrai fu du san a pramisi, soleki fa son sma e prakseri. Ma a abi pasensi nanga unu, bika a no wani taki wan sma lasi libi. A wani taki ala sma musu kisi na okasi fu sori berow.”​—2 Petrus 3:9.

O TEN GADO O DU WAN SANI?

Heri esi! Yesus ben taki dati wan spesrutu grupu sma di Bijbel e kari „den sma fu a ten disi” ben o si difrenti sani di ben o sori taki wi e libi na ini den lasti dei „fu a grontapu disi” (Mateyus 24:3-42). A profeititori fu Yesus di e kon tru na ini a ten disi e sori taki heri esi Gado o tyari wan kenki kon na ini libisma afersi.a

Ma fa Gado o puru ala pina? Di Yesus ben de na grontapu, dan a sori taki Gado abi a krakti fu tyari wan kaba kon na pina. Luku wan tu eksempre.

Rampu: Di Yesus nanga den apostel fu en ben de na ini wan boto na tapu a Se fu Galilea, dan wan bigi winti bigin wai di ben kan sungu a boto. Ma Yesus sori taki en nanga en Papa man basi a winti, a watra, nanga den tra krakti fu grontapu (Kolosesma 1:15, 16). Yesus ben taki nomo: „Tapu! Tan tiri!” San pasa baka dati? „A winti saka èn ala sani kon tiri.”​—Markus 4:35-39.

Siki: Furu sma ben sabi taki Yesus ben man dresi brenisma, malengrisma, nanga sma di ben abi fadonsiki, gwasi, noso iniwan tra siki. Bijbel e taki: „A ben meki ala siki sma kon betre.”​—Mateyus 4:23, 24; 8:16; 11:2-5.

Angriten: Yesus gebroiki den krakti di en Papa ben gi en fu sorgu taki a pikinso nyanyan di ben de ben e kon moro furu. Bijbel e taki dati di a ben e du a diniwroko fu en, dan a pasa tu leisi taki a gi dusundusun sma nyanyan.​—Mateyus 14:14-21; 15:32-38.

Dede: Bijbel e taki fu dri leisi di Yesus gi wan sma wan opobaka. Disi e sori taki Yehovah abi a makti fu tyari wan kaba kon na dede. Wan fu den sma di Yesus ben gi libi baka ben dede fo dei kaba.​—Markus 5:35-42; Lukas 7:11-16; Yohanes 11:3-44.