Yehovah man du ala sani

WI BEN E WROKO FU MAMANTEN TE GO MITI MOFONETI

Mi gebore na ini 1937 na wan fu den gron fu lanti pe furu sma ben e wroko. Wi e kari en wan Kolkhoz. A gron disi ben de krosibei fu a foto Tokmok di de na ini Kirgistan. Mi famiri na Kirgisisma èn den e taki Kirgisitongo. Mi papa nanga mama ben wroko na den gron disi fu mamanten fruku te go miti mofoneti. Lanti ben gwenti gi nyanyan na den sma di ben wroko na den gron, ma den ben pai den wan leisi wan yari. A ben tranga gi mi mama fu sorgu gi mi nanga mi pikin sisa. Baka di mi go na skoro feifi yari nomo, mi bigin wroko heri dei tu na den gron disi.

Na ini a kontren pe mi ben e libi furu sma ben pôti èn den sma ben musu wroko tranga fu sorgu densrefi. Di mi ben moro yongu mi no ben abi furu aksi fu a libi èn fu a ten di e kon. Noiti mi ben denki taki den moi sani di mi leri fu Yehovah Gado nanga den sani di a abi na prakseri fu du, ben o kenki mi libi so. Now mi o fruteri unu fa a Kownukondre boskopu doro Kirgistan èn fa a prati na ala sei. A tori disi span srefisrefi. A tori bigin na ini a birti pe mi ben e tan na a noordsei fu Kirgistan.

KOTOIGI DI BEN DE NA STRAFU-OSO FOSI TYARI A BOSKOPU KON NA KIRGISTAN

Na ini den yari baka 1950 sma kon sabi den tru leri fu Yehovah Gado na ini Kirgistan. Ma a no ben makriki fu leri sma den tru tori fu Bijbel fu di furu sma ben leri fu horibaka gi a Komunist denki. Kirgistan ben de wan fu den kondre fu Sovyet-Unie. Na ini heri Sovyet-Unie den Yehovah Kotoigi no ben bumui nanga politiek (Yoh. 18:36). Dati meki lanti ben si den leki feanti fu a tirimakti èn den ben e frufolgu den. Ma a Komunist denki no ben man tapu Gado Wortu fu doro na ati fu reti-ati sma. Wan fu den moro prenspari sani di mi leri ini mi heri libi na taki Yehovah „man du ala sani”.​—Mark. 10:27.

A frufolgu di den ben frufolgu den Yehovah Kotoigi meki taki furu fu den kon tan na ini Kirgistan. Fa dati du kon? Siberia ben de wan pisi fu Sovyet-Unie. Na Siberia den ben seni den feanti fu lanti go leki strafuman. Di sonwan fu den Kotoigi di ben de drape leki strafuman kon fri, dan den tyari a boskopu fu Bijbel go na Kirgistan. Wan fu den Kotoigi disi ben de Emil Yantzen, di ben gebore na ini 1919 na ini Kirgistan. Lanti ben seni Emil go na wan strafuman-kampu pe a miti den Kotoigi. A ben bribi den sani di a ben leri fu Bijbel èn na ini 1956 a drai go baka na oso. Emil go tan na ini a foto Sokuluk, di ben de krosibei fu pe mi ben tan. Na ini Sokuluk a fosi gemeente fu Kirgistan seti na ini 1958.

Wan yari baka dati Victor Vinter froisi go na Sokuluk. A brada disi kisi furu tesi. Tu leisi den seni en go na strafu-oso gi dri yari fu di a no ben wani bumui nanga politiek. Baka dati den seni go na strafu-oso gi tin yari èn den seni go na Siberia tu gi feifi yari. Ma toku a situwâsi disi no tapu den Kotoigi fu prati a tru leri.

A BUN NYUNSU E DORO A FOTO FU MI

Na ini 1963 sowan 160 Kotoigi ben de na ini Kirgistan. Furu fu den ben komoto fu Doisrikondre, Ukraini, nanga Rosiakondre. Wan fu den ben de Eduard Varter. A dopu na ini Doisrikondre na ini 1924. Na ini de yari baka 1940 den Nazisma seni en go na wan strafuman-kampu èn wan tu yari baka dati den Komunist na ini Sovyet-Unie seni Eduard go na Siberia. Na ini 1961 a brada disi froisi go na a foto Kant, di de krosibei fu a foto pe mi ben e libi.

Elizabeth Fot, wan sisa di ben lobi Yehovah ben libi tu na ini Kant. A sisa disi ben meki krosi gi sma. Fu di a ben sabi du a wroko disi bun, meki furu datra nanga leriman ben kon meki krosi na en. Wan fu den klanti fu en ben de wan frow di ben nen Aksamai Sultanalieva. A frow disi ben trow nanga wan afkati fu lanti. Aksamai ben kon meki krosi na Elizabeth, ma a ben lobi aksi en sani fu a libi èn a ben wani sabi san e pasa nanga den dedewan. Elizabeth ben gebroiki Bijbel fu piki den aksi fu en. Aksamai tron wan fayafaya preikiman fu a bun nyunsu.

Na a srefi ten dati, Nikolai Chimpoesh, di ben kon fu Moldafia tron kring-opziener èn a du a wroko dati sowan 30 yari. Boiti taki Nikolai ben go luku den gemeente, a ben orga sani tu fu meki kopi fu den buku fu wi èn fu prati den. Ma lanti ben si den sani di a ben du. Dati meki Eduard Varter gi Nikolai a rai disi: „Te den e aksi yu pe wi e feni den buku, dan yu musu taigi den taki wi e kisi den fu na edekantoro na Brooklyn. Luku a skowtu na ini en ai. Yu no abi fu frede den.”​—Mat. 10:19.

Baka di Eduard taki nanga Nikolai, den KGB skowtu seni kari Nikolai kon na a edekantoro fu den na ini Kant. Nikolai e fruteri san pasa baka dati: „A skowtu aksi mi pe wi e feni den buku fu wi. Mi taigi en taki wi e kisi den fu Brooklyn. A skowtu no ben sabi san a ben musu taki. A seni mi gowe èn noiti moro den seni kari mi.” Den Kotoigi disi di ben abi deki-ati tan preiki a bun nyunsu na a noordsei fu Kirgistan pe mi ben tan. Den ben luku bun taki den skowtu no kisi den. Mi famiri kon sabi den tru leri fu Yehovah na ini 1981. Na a pisi ten dati mi frow, Mairambubu, ben yere fu Yehovah kaba.

MI WEFI E SI WANTEWANTE TAKI DISI NA A TRU BRIBI

Mairambubu ben tan na ini a foto Naryn, na Kirgistan. Na ini augustus 1974 a kon luku mi sisa wan dei, èn na drape mi miti en a fosi leisi. Wantewante mi ben lobi fa Mairambubu ben de. Wi trow a srefi dei dati.

Na ini yanuari 1981, di Mairambubu ben de na ini wan bus e go na wowoyo, a yere a takimakandra di mi ben taki fu en na a bigin. Fu di mi frow ben wani sabi moro, meki a aksi na uma fa a nen èn pe a e tan. Na uma taki dati a ben nen Apun, ma a no ben wani taigi mi frow pe a ben tan fu di srefi na ini den yari baka 1980 lanti ben tapu a wroko fu Yehovah Kotoigi. Dati meki Apun aksi mi frow pe wi e tan. Di mi frow kon na oso a dei dati, a no ben man wakti fu fruteri mi san pasa.

Mairambubu fruteri mi: „Mi yere wan moi sani! Wan frow fruteri mi taki heri esi libisma no o dede moro. Srefi den busimeti no o du ogri nanga libisma moro.” Gi mi den sani disi ben gersi anansitori. Mi taigi mi frow: „Meki wi wakti teleki a kon, dan a kan fruteri wi moro fu a tori disi.”

Baka dri mun Apun kon luku wi. A kon luku wi ete wan tu leisi baka dati èn wi miti tra Kotoigi di ben de Kirgisisma tu. Den sisa disi yepi wi fu kon sabi Yehovah nanga den moi sani di a wani du gi libisma. Wi ben studeri a buku Van het verloren naar het herwonnen Paradijs.a Fu di wán nomo ben de fu a buku disi na ini a foto Tokmok, meki wi skrifi en abra gi wisrefi.

Wan fu den fosi sani di wi leri, na a profeititori na ini Genesis 3:15. A profeititori disi ben sori go na Yesus leki a Mesias di ben o tron Kownu. Dati ben de wan prenspari boskopu di ala sma musu yere! Dati meki wi ben de fayafaya fu bigin prati a boskopu disi (Mat. 24:14). A no teki langa fosi den sani di wi ben leri fu Bijbel bigin kenki wi libi.

A FASI FA WI BEN HORI KONMAKANDRA ÈN FA WI BEN DOPU SMA DI LANTI BEN TAPU A WROKO

Wan brada di ben tan na ini Tokmok ben kari wi fu go na wan trow. Mi nanga mi wefi kon si taki den Kotoigi ben de heri tra fasi. Sopi no ben de na a trowfesa èn sani ben go na wan orga fasi. A trow disi ben de heri tra fasi fu den tra trow pe wi ben gwenti go. Nofo tron a ben de so na den trow dati taki sma ben drungu, den no ben tyari densrefi bun èn den ben kosi.

Wi ben go tu na wan tu konmakandra na ini Tokmok. Den konmakandra disi ben hori na ini a busi efu a weer ben bun. Den brada nanga sisa ben sabi taki den skowtu ben luku san wi ben du. Dati meki den brada ben poti wan sma fu luku efu skowtu ben e kon. Na ini winter wi ben hori konmakandra na ini wan oso. Wan tu leisi den skowtu kon na a oso fu kon aksi wi san wi ben du. Di mi nanga Mairambubu dopu na ini yuli 1982 na ini a Chüy-liba wi ben musu luku bun taki skowtu no kisi wi (Mat. 10:16). Den brada nanga sisa no ben kon na a srefi ten èn wi ben kon makandra na ini a busi. Wi singi wan Kownukondre singi èn wi arki a dopu-lezing.

WI E BIGIN DU MORO GI YEHOVAH

Na ini 1987, wan brada aksi mi fu go luku wan sma di ben wani sabi moro fu Bijbel na ini a foto Balykchy. Fu man doro drape wi ben musu rèi fo yuru langa nanga loko. Di wi go wan tu leisi na Balykchy, wi si taki furu sma ben wani kon sabi den tru leri fu Bijbel. Disi ben de wan moi okasi gi wi fu du moro gi Yehovah.

Mi nanga Mairambubu ben go furu na Balykchy. Na tapu satra nanga sonde wi ben tan sribi drape, wi ben go na ini a preikiwroko èn wi ben hori konmakandra. Furu sma ben wani abi den buku fu wi tu. Wi ben syow den buku na ini wan mishok, dati na wan saka pe sma e poti patata. Ibri mun na tu fu den bigi saka disi wi ben syow go na Balykchy. Ma bijna dati no ben sari gi ala den sma. Srefi te wi ben de na ini a loko, wi ben kan preiki gi den sma di wi ben miti.

Na ini 1995, aiti yari baka di wi bigin preiki na ini Balykchy, wan gemeente seti drape. Wi ben abi furu moni fanowdu fu komoto na Tokmok go na Balykchy ibri leisi. Wi no ben abi so furu moni, sobun pe wi ben feni a moni dati? Wan brada ben gwenti gi wi moni so taki wi ben abi nofo moni fu du ala den sani di wi ben musu du. Yehovah ben si taki wi ben wani du moro gi en èn dati meki a opo „den sroisi fu hemel” gi wi (Mal. 3:10). Iya, wi no e tweifri taki Gado man du ala sani!

WI ABI FURU FU DU NA INI WI OSOFAMIRI ÈN NA INI A PREIKIWROKO

Na ini 1992 mi tron owruman. Mi ben de a fosi Kirgisisma di ben tron owruman na ini a kondre. Na ini wi gemeente na ini Tokmok furu wroko ben de fu du. Wi ben abi wan lo Bijbelstudie di ben de fu technisch skoro. Wan fu den yongusma dati na wan memre fu a Bijkantoro Komte now èn tu trawan na spesrutu pionier. Wi ben yepi tra sma tu di ben kon na den konmakandra. Na ini den yari syatu baka 1990 den buku fu wi ben de na ini Rosiatongo èn den konmakandra ben hori na ini Rosiatongo tu. Ma wan lo sma na ini a gemeente ben abi a Kirgisitongo leki mamatongo. Dati meki mi ben vertaal gi den, so taki den ben man frustan san den ben leri.

Mi nanga Mairambubu ben abi furu fu du tu na ini wi eigi osofamiri. Wi ben tyari den pikin fu wi go na ini a preikiwroko èn na den konmakandra. Gulsayra, a meisje fu wi, di ben abi 12 yari na a ten dati ben lobi taki fu Bijbel nanga den sma di a ben miti na strati. Èn den pikin fu wi ben lobi leri Bijbeltekst na ede. Na so den pikin fu wi èn bakaten den granpikin fu wi ben abi furu fu du tu na ini a wroko fu Yehovah. Fu den 9 pikin nanga den 11 granpikin fu wi di de na libi ete, 16 e dini Yehovah noso e go na den konmakandra nanga den papa nanga mama.

BIGI KENKI

Den brada nanga sisa di bigin du a wroko fu Yehovah na ini a kontren disi na ini den yari baka 1950 o fruwondru fu si den bigi kenki di wi ondrofeni. Wan fu den kenki disi na taki na ini den yari baka 1990 lanti bigin gi den Kotoigi na okasi fu preiki a bun nyunsu èn fu hori konmakandra.

Na ini 1991, mi nanga mi wefi go na wi fosi kongres. A kongres disi hori na ini Alma-Ata, di wi sabi leki Almaty now, na ini Kasakstan. Na ini 1993 den brada na ini Kirgistan hori wan kongres fu a fosi leisi na ini a Spartak Stadion na ini Bishkek. Wan heri wiki fosi a kongres den brada nanga sisa bigin krin a stadion. A driktoro fu a stadion ben warderi a sani disi so te, taki wi no ben abi fu pai moro fu gebroiki a stadion.

Na ini 1994 wan tra moi sani pasa. Wi druk a fosi buku na ini a Kirgisitongo. Now brada nanga sisa di e wroko na a bijkantoro na ini Bishkek e vertaal buku gi wi na ini Kirgisitongo. Na ini 1998 Yehovah Kotoigi kisi primisi fu du den wroko na ini Kirgistan. A nomru fu Kotoigi gro èn now wi abi moro leki 5000 preikiman. Wi abi 83 gemeente nanga 25 grupu na ini Sneisitongo, Ingrisitongo, Kirgisitongo, Dofusma-tongo fu Rosiakondre, Torkutongo, Udgurtongo nanga Usbektongo. Ala den brada nanga sisa disi fu difrenti kulturu e dini Yehovah na ini wánfasi. Na Yehovah ben man tyari den bigi kenki disi kon.

Yehovah kenki mi libi tu. Mi gro kon na ini wan pôti famiri èn mi go na skoro feifi yari nomo. Ma toku Yehovah gebroiki mi leki owruman èn mi ben man gi sma di ben kisi moro skoro leki mi leri fu Bijbel. Iya, Yehovah du wan sani di misrefi noiti no ben o man du. Den sani di misrefi ondrofeni meki taki mi kan taki nanga mi heri ati taki Yehovah „man du ala sani”.​—Mat. 19:26.