San Gado o du?

Efu yu ben abi wan problema, dan yu ben o fruwakti taki wan bun mati fu yu ben o du wan sani fu yepi yu. Son sma e taki dati Gado a no wi mati, fu di a no e du noti fu yepi wi. Ma Gado du furu sani kaba fu yepi wi èn a o du tra sani tu fu lusu ala den problema nanga ala pina di e miti wi na ini a ten disi. San Gado o du?

A O PURU ALA OGRI

Gado o puru a rutu fu ogri, so taki wan kaba kon na ala ogridu. Bijbel e sori wi san na a rutu fu ogridu. A e taki: „Heri grontapu de na ini a makti fu na ogriwan” (1 Yohanes 5:19). Na „ogriwan” na a sma di Yesus kari „a tiriman fu a grontapu disi”, èn dati na Satan Didibri (Yohanes 12:31). A krakti di Satan abi tapu libisma na a rutu fu ala den problema na grontapu. San Gado o du?

Heri esi Yehovah Gado o gebroiki en Manpikin Yesus Krestes fu „meki Didibri, a wan di man kiri sma, kon tron noti” (Hebrewsma 2:14; 1 Yohanes 3:8). Bijbel e sori taki Didibri srefi sabi taki „en ten syatu” èn taki heri esi a o kisi pori (Openbaring 12:12). Gado o tyari wan kaba kon tu na ala ogridu èn na ala den sma di e du ogri.​—Psalm 37:9; Odo 2:22.

A O MEKI GRONTAPU TRON WAN PARADIJS

Baka te wi Mekiman puru ala ogri na grontapu, dan a o du san de fanowdu fu sorgu taki libisma di no o abi sondu moro o man libi fu têgo na grontapu. Fa a libi o de na a ten dati?

Freide fu ala ten èn wan bun libi. „Den safri-ati sma o kisi grontapu èn den o prisiri srefisrefi, fu di freide o de pasa marki.”​—Psalm 37:11.

Gosontu nyanyan o lai. „Furu nyanyan o kon de na grontapu. Srefi na tapu den ede fu den bergi nyanyan o de pasa marki.”​—Psalm 72:16.

Bun oso èn wroko di e gi prisiri. „Den o bow oso èn den srefi o tan na ini. Den o prani droifidyari èn den srefi o nyan fu en. . . . Den wan di mi teki o nyan bun fu a wroko di den du.”​—Yesaya 65:21, 22.

Yu no e angri fu si ala den sani disi? Heri esi ala sma o ondrofeni den sani disi ibri dei.

A O PURU SIKI NANGA DEDE

Nownow ala sma e siki èn e dede, ma dati no o de so moro. Heri esi, Gado o meki sma kisi wini fu a lusu-paiman fu Yesus, so taki „ala sma di e bribi na ini en no sa dede, ma sa kisi têgo libi” (Yohanes 3:16). San disi wani taki?

Siki no o de moro. „Nowan sma di e tan na ini a kondre o taki: ’Mi siki.’ Den sma di e tan na ini a kondre o kisi pardon fu den sondu fu den.”​—Yesaya 33:24.

Dede no o de moro. „A Moro Hei Masra Yehovah o swari dede fu têgo èn a o figi den watra-ai fu ala sma puru na den fesi.”​—Yesaya 25:8.

Libisma o libi fu têgo. „A kado di Gado e gi sma na têgo libi nanga yepi fu Krestes Yesus wi Masra.”​—Romesma 6:23.

Dedesma o libi baka. „Gado sa gi wan opobaka na den sma di du san reti èn na den sma di no du san reti” (Tori fu den apostel 24:15). Na a fasi disi den dedesma o kisi wini fu a lusu-paiman.

Fa Gado o du ala den sani disi?

WAN BUN REGERING

Gado o gebroiki wan regering di a seti na hemel fu du san a abi na prakseri gi libisma. A poti Krestes Yesus leki tiriman fu a regering disi (Psalm 110:1, 2). Na fu a regering disi, noso a kownukondre, Yesus ben leri den bakaman fu en fu begi. A ben taigi den: „Wi Tata na hemel, . . . meki yu Kownukondre kon.”​—Mateyus 6:9, 10.

Gado Kownukondre o tiri heri grontapu èn a o puru ala sari nanga pina na grontapu. A Kownukondre disi na a moro bun regering di libisma ben kan abi oiti! Na fu dati ede Yesus ben wroko tranga fu preiki „a bun nyunsu fu a Kownukondre” di a ben de na grontapu, èn a ben taigi den disipel fu en fu du a srefi.​—Mateyus 4:23; 24:14.

Fu di Yehovah Gado abi so furu lobi gi libisma, meki a pramisi fu du ala den moi sani disi gi den. A sani disi no e meki taki yu wani kon sabi en fu tron wan mati fu en? Sortu wini dati o tyari kon gi yu? A tra artikel o taki fu a tori dati.