Yepi trawan fu horidoro te den abi broko-ede

1. Fa wi kan teki na eksempre fu wi lobi-ati Papa, Yehovah?

YEHOVAH abi bigi lobi gi wi (Yoh. 3:16). Wi wani teki na eksempre fu wi lobi-ati Papa. Dati meki wi e ’firi gi tra sma, wi lobi den brada fu wi èn wi e sori sari-ati gi trawan’ spesrutu gi den wan di abi „a srefi bribi leki wi” (1 Petr. 3:8; Gal. 6:10). Te wan brada noso sisa abi broko-ede, dan wi wani yepi en.

2. San wi o luku na ini na artikel disi?

² Ala den anbegiman fu Yehovah kan fruwakti taki den o kisi tesi (Mark. 10:29, 30). Wi o kisi moro problema, now di a kaba fu a grontapu disi e kon moro krosibei. Fa wi kan yepi makandra? Meki wi go luku san wi kan leri fu na eksempre fu Lot, Yob nanga Naomi. Wi o si tu sortu problema den brada nanga sisa e kisi na ini a ten disi èn fa wi kan yepi den fu horidoro.

ABI PASENSI

3. Soleki fa 2 Petrus 2:7, 8 e sori, dan sortu don bosroiti Lot teki, èn san ben de a bakapisi?

³ Lot teki wan don bosroiti di a go tan na mindri den sma fu Sodom di ben libi wan morsu libi èn di ben ogri srefisrefi. (Leisi 2 Petrus 2:7, 8.) A kontren ben moi, ma Lot kisi bigi problema di a froisi go tan na Sodom (Gen. 13:8-13; 14:12). A frow fu en ben kon lobi a foto nanga sonwan fu den sma di ben libi drape èn dati meki a trangayesi Yehovah. A lasi en libi di Gado pori a foto. Èn prakseri den tu umapikin fu Lot. Den ben meki mofo fu trow nanga tu man, ma den man disi dede na ini Sodom. Lot lasi en oso, a lasi ala den tra gudu fu en, ma san hati en moro na taki a lasi en frow (Gen. 19:12-14, 17, 26). Ma Yehovah lasi pasensi nanga Lot di a ben kisi ala den tesi disi? Nôno.

4. Fa Yehovah sori pasensi nanga Lot? (Luku a fowtow tapu a kafti.)

⁴ Aladi Lot teki a bosroiti fu go libi na ini Sodom, toku Yehovah sori sari-ati gi en èn a seni engel fu yepi en nanga en osofamiri. Ma na presi taki Lot komoto wantewante na ini Sodom soleki fa den engel ben taki, a „tan draidrai”. Den engel ben abi fu grabu en na en anu èn tyari en nanga en osofamiri go na dorosei fu a foto (Gen. 19:15, 16). Den engel taigi en fu lon go na a bergikontren. Ma Lot aksi Yehovah efu a ben kan go na wan foto di ben moro krosibei (Gen. 19:17-20). Yehovah arki Lot nanga pasensi èn Lot ben kan go na a foto. Ma bakaten a kon frede fu libi drape èn a froisi go na a bergikontren, a presi pe Yehovah ben taigi en fu go a fosi leisi (Gen. 19:30). Yehovah ben abi trutru pasensi nanga Lot! Fa wi kan teki na eksempre fu en?

5-6. Te wi e du san skrifi na 1 Tesalonikasma 5:14, dan fa wi e teki na eksempre fu Yehovah?

⁵ Neleki Lot wan brada noso sisa kan teki don bosroiti di e tyari bigi problema kon gi en. San wi o du te dati pasa? Kande wi o wani taigi en taki a e koti san a sai èn dati tru (Gal. 6:7). Ma wi kan du wan moro bun sani. Wi kan yepi en neleki fa Yehovah ben yepi Lot. Fa wi kan du dati?

⁶ Yehovah no seni den engel fu warskow Lot wawan, ma fu yepi en fu komoto na ini Sodom di ben o kisi pori. Na so a de tu taki kande wi musu warskow wan brada noso sisa di e du wan sani di o tyari problema kon gi en. Ma kande wi musu yepi en tu. Awinsi a sma no e teki a Bijbel rai wantewante, toku wi musu abi pasensi nanga en. Wi musu de leki den tu engel. Wi musu tan yepi en, wi no musu libi en wawan meki a luku san a o du (1 Yoh. 3:18). Wi musu langa wan anu gi en èn wi musu sori en fa a kan fiti den bun rai di a kisi.​—Leisi 1 Tesalonikasma 5:14.

7. Fa wi kan si tra sma neleki fa Yehovah ben si Lot?

⁷ Yehovah ben kan luku soso den fowtu fu Lot. Ma na presi fu dati a meki na apostel Petrus skrifi bakaten taki Lot ben de wan reti-ati man. Wi breiti taki Yehovah e gi wi pardon gi den fowtu di wi e meki! (Ps. 130:3) Fa wi kan si tra sma neleki fa Yehovah ben si Lot? Efu wi e poti prakseri na den bun fasi fu den brada nanga sisa, dan wi o abi moro pasensi nanga den. Dati o meki en moro makelek gi den fu teki a yepi fu wi.

ABI SARI-ATI NANGA SMA

8. San wi o du te wi abi sari-ati nanga trawan?

⁸ Tra fasi leki Lot, Yob no ben kisi problema fu di a ben teki wan don bosroiti. Toku furu ogri miti en. A lasi ala den gudu fu en, sma no ben e lespeki en moro èn a kisi wan takru siki. Ma san moro ogri, na taki en nanga en frow lasi ala den pikin fu den. Dri mati fu Yob kon taigi en tu taki a ben pina fu di a ben du ogri. Fu san ede den dri mati disi no ben abi sari-ati nanga Yob? Fu di den no ben pruberi fu frustan fu san ede den sani disi ben miti en. Dati meki den ben abi wan fowtu denki èn den krutu Yob. San o yepi wi fu no meki a srefi fowtu? Wi musu hori na prakseri taki na Yehovah wawan sabi ala sani fu wan sma en situwâsi. Arki bun san a sma e taki. Pruberi fu firi san a e firi. Te yu e du dati, dan yu o man sori taki yu e firi trutru gi yu brada noso sisa.

9. Sortu sani wi no o du te wi abi sari-ati èn fu san ede wi no o du dati?

⁹ Te wi abi sari-ati, dan wi no o taki ogri fu trawan di abi problema. Wan sma di lobi taki sma tori no e gi a gemeente deki-ati, ma a e tyari pratifasi kon (Odo 20:19; Rom. 14:19). A no e sori switifasi, ma a e taki sondro fu denki. Den sani di a e taki kan hati a sma di e firi brokosaka kaba (Odo 12:18; Ef. 4:31, 32). A moro bun te wi e luku den bun fasi fu wan sma èn te wi e luku fa wi kan yepi en nanga den problema fu en!

10. San Yob 6:2, 3 e leri wi?

¹⁰ Leisi Yob 6:2, 3. Son leisi Yob ben e taki „dondon sani”. Ma bakaten a kon si taki den sani di a ben taki no ben bun (Yob 42:6). Na so a kan de tu taki wan sma di e stress fu di a abi wan bigi problema kan bigin taki dondon sani, èn bakaten a kan hati en taki a taki den sani dati. San wi musu du te dati pasa? Na presi fu krutu a sma, wi musu abi sari-ati nanga en. No frigiti taki di Yehovah meki wi, a no ben wani taki wi kisi problema nanga broko-ede. Dati meki wi kan frustan fu san ede wan brada noso sisa di lai broko-ede kan taki sani sondro fu denki. Srefi efu a taki sani fu Yehovah noso fu wi di no tru, wi no musu atibron gaw èn wi no musu krutu en fu den sani di a taki.​—Odo 19:11.

11. Fa owruman kan teki na eksempre fu Elihu te den e gi sma rai?

¹¹ Son leisi wan sma di e stress fu di a abi wan problema musu kisi rai fu kenki en denki (Gal. 6:1). Fa owruman kan yepi so wan sma? Den kan leri furu fu na eksempre fu Elihu di ben arki Yob èn di ben sori taki a e frustan fa a e firi (Yob 33:6, 7). Elihu gi Yob rai, baka di a kon frustan fa Yob ben denki. Owruman di e teki na eksempre fu Elihu o arki bun te wan sma e taki èn den o pruberi fu frustan a situwâsi fu a sma. Te den e du dati, dan den o man gi a sma rai di o naki en ati.

TAKI SANI FU TROWSTU SMA

12. Fa Naomi ben firi baka di en masra nanga den tu manpikin fu en dede?

¹² Naomi ben de wan uma di ben lobi Yehovah. Ma baka di en masra nanga den tu manpikin fu en dede, a ben wani taki sma kari en „Mara” san wani taki „Bita” (Rut 1:3, 5, 20, 21). Ma Rut, na uma fu wan fu den manpikin fu en tan nanga en, baka di den problema disi miti en. Boiti taki Rut ben yepi Naomi nanga den sani di a ben abi fanowdu, a ben trowstu en tu. Rut ben taki sani di sori Naomi taki a lobi en èn taki a ben o horibaka gi en.​—Rut 1:16, 17.

13. Fu san ede wan sma abi wi yepi fanowdu te en trowpatna dede?

¹³ Te a trowpatna fu wan brada noso sisa dede, dan a abi wi yepi fanowdu. Wi kan agersi wan trowpaar nanga tu bon di e gro sei nanga sei. Baka wan tu yari den rutu fu den bon disi e frekti kon na wán. Te wan fu den bon disi rutu puru noso dede, dan disi abi krakti tapu a tra bon. Na so a de tu taki te wan sma en trowpatna dede, a kan sari srefisrefi fu wan langa pisi ten. Paulab wan sisa di masra dede wantronso, e taki: „Mi heri libi kenki èn mi no ben man du noti. Mi lasi a moro bun mati fu mi. Mi ben kan taki nanga mi masra fu ala sani. A ben prisiri nanga mi te mi ben prisiri èn a ben horibaka gi mi te mi ben abi en muilek. Ala ten a ben arki mi te mi ben taki fu den problema fu mi. Mi ben firi leki wan sma ben koti mi na ini afu.”

14-15. Fa wi kan trowstu wan sma te en trowpatna dede?

¹⁴ Fa wi kan trowstu wan sma te en trowpatna dede? Wan prenspari sani di wi musu du na taki wi musu taki nanga a sma, awinsi wi no sabi san wi musu taki. Paula e taki: „Mi e frustan taki te wan sma dede, dan sma no sabi san den musu taki. Kande den e frede taki den o taki wan sani di kan hati a sma di e sari. Ma a e hati moro te sma no e taki noti.” Wan sma di e sari no e fruwakti taki wi o taki wan kefalek sani fu trowstu en. Paula e taki: „Mi ben warderi en te den mati fu mi ben taigi mi: ’Mi e sari taki a sani disi miti yu.’”

¹⁵ William en frow dede wan tu yari pasa. A e taki: „Mi e firi bun te sma e taki fu den bun sani di mi frow ben du. Disi e sori mi taki sma ben lobi en èn taki den ben lespeki en. A sani disi yepi mi furu. Den sani di den ben taki ben trowstu mi fu di mi ben lobi mi frow èn wi ben du furu sani makandra.” Bianca di masra dede e taki: „A e trowstu mi te trawan e begi nanga mi èn te den e leisi wán noso tu tekst nanga mi. A e yepi mi tu te den e taki fu mi masra èn te den e arki mi te mi e taki fu en.”

16. (a) Fu san ede wi musu tan horibaka gi wan brada noso sisa te wan sma fu en dede? (b) Sortu frantwortu wi abi, soleki fa Yakobus 1:27 e sori?

¹⁶ Neleki fa Rut ben tan horibaka gi Naomi, na so wi musu tan horibaka gi wan brada noso sisa te wan sma fu en dede. Paula di wi ben kari kaba, e taki: „Syatu baka di mi masra dede, mi kisi furu yepi. Ma baka wan pisi ten sma ben go doro nanga den libi. Ma mi libi no ben de a srefi moro. Na wan bigi yepi te trawan e frustan taki wan sma di e sari fu di wan sma fu en dede, abi yepi fanowdu tu na ini den mun noso yari baka te a sma beri.” Ma a no de fu taki dati a no ala sma de a srefi. Son sma e fiti densrefi gaw na a nyun situwâsi fu den. Ma trawan e sari ibri tron te den e du wan sani di den ben gwenti du nanga den trowpatna. Ibri sma e sari na en fasi. Wi musu hori na prakseri taki Yehovah gi wi a grani nanga a frantwortu fu yepi wi brada nanga sisa te a trowpatna fu den dede.​—Leisi Yakobus 1:27.

17. Fu san ede wan sma abi trowstu fanowdu te en trowpatna gowe libi en?

¹⁷ Tra sma e sari srefisrefi fu di den trowpatna gowe libi den. Joyce en masra gowe libi en gi wan tra uma. A e taki: „Te yu broko trow a e hati moro leki te yu masra dede. Efu mi masra ben dede fu di a kisi wan mankeri noso fu di a ben siki, dan a no en bosroiti fu meki dati pasa. Ma mi masra srefi bosroiti fu gowe libi mi. A sani disi ben meki mi firi syen.”

18. San wi kan du gi den wan di no abi trowpatna moro?

¹⁸ Te wi e yepi den wan di no abi trowpatna moro, dan wi e sori den taki wi lobi den. Now di den wawan de, den abi bun mati fanowdu (Odo 17:17). Fa yu kan sori taki yu na den mati? Yu kan kari den kon nyan na yu oso. Kande yu kan du wan prisiri sani nanga den noso yu kan wroko nanga den na ini a preikiwroko. Wan tra sani di yu kan du na fu aksi den fu kon hori na Osofamiri Anbegi makandra nanga yu. Efu yu e du disi, yu o prisiri Yehovah ati, fu di a de „krosibei fu den sma di lasi-ati” èn a de „wan krutuman di e opo taki gi den uma di masra dede kaba”.​—Ps. 34:18; 68:5.

19. San 1 Petrus 3:8 e taigi wi fu du?

¹⁹ Heri esi te Gado Kownukondre o tiri grontapu, wi ’no o prakseri moro fa wi ben de na ini banawtu’. Wi e angri fu si a ten te „sma no o memre den fositen sani moro èn den sani dati no o abi krakti na den tapu moro” (Yes. 65:16, 17). Ma fosi a ten dati doro, meki wi horibaka gi makandra èn meki wi taki èn du sani di e sori taki wi lobi ala den brada nanga sisa fu wi.​—Leisi 1 Petrus 3:8.