Aksiboksoe

● O ten èn fa bijbelaksi moe seni go na a Genootschap?

Ibri jari wi e kisi na tapoe na ede kantoro nanga den bijkantoro fu a Genootschap doesoen-doesoen aksi di e go foe difrenti afersi ofoe rai e aksi fa foe doe nanga den. Den aksi disi e kon na tapoe papira ofoe nanga telefoon. Wi e feni en wan moi sani foe jepi wi brada nanga sisa na a ten foe nowtoe. Ma a no de foe taki dati a e poti wan hebi lai tapoe den brada di e wroko tapoe den kantoro. Foeroe foe den aksi di wi e kisi, e go foe afersi di behandel finifini na ini boekoe, èn foeroe problema di wi e kisi, nofotron den sa behandel nanga jepi foe owroeman na ini na gemeente, di sabi den omstandigheden foe na presi pe joe e libi. — 1 Petr. 1:10.

Efoe joe abi wan aksi, dan wi e gi joe foe dat’ede rai dati joe go soekoe fosi ini den boekoe foe a Genootschap foe di joe e meki gebroiki foe den Tori- èn tekstindex na ini den boekoe, ofoe dati joe go nanga joe aksi na den owroeman ini na gemeente. Efoe joe abi rai fanowdoe ini a tori foe wan problema dan joe ben sa doe boen foe go soekoe na rai dati fosi na den owroeman foe a gemeente. Efoe joe no kisi a loesoe ete, dan joe kan seni na afersi go na a Genootschap. Disi moro foeroe moe psa na ini na vorm foe wan brifi, di joe e tjari ala den sani di de troe kon na fesi. Grantangi no gebroiki telefoon, efoe a no de wan toemsi tranga fanowdoe afersi.

Na ini na Kownoekondre dienst foe december 1974 commentaar e gi na ini Aksiboksoe tapoe na aksi: „Fa wi kan kisi jepi na ini na loesoe foe wan persoonlek problema?” Efoe na Kownoekondre dienst disi de ete, dan joe kan lési kande na artikel disi ete wan tron foe kisi moro bodoi.