Jongoewan gi Jehovah nen grani
1 Na a di foe toe zendingswaka foe Paulus a ben miti Timóteüs, foe soema den brada ini Lystra nanga Ikónium ’ben tjari wan boen bericht’. A ben gi Timóteüs wan kari foe go nanga en na ini na zendingwroko (Tori. 16:1-3). Jari baka dati Paulus ben skrifi foe Timóteüs: „Bikasi mi no abi no wan sma moro di abi na srefi fasi leki en, di sa sorgoe troetroe foe den sani di e go foe oenoe” (Fil. 2:20). A bijbel e ferteri wi toe foe Samuël di a ben de jongoejongoe ete, ben plisi soboen libisma nanga Jehovah (1 Sam. 2:26). Kristen jongoewan di e wroko boen ini a ten disi wani taki net sowan bericht moesoe taki foe den.
2 Soboen Samuël leki Timóteüs ben tangi den jeje go na fesi foe wan bigi pisi na den gadofasi kweki di den papa nanga mama di ben e gi densrefi troetroe ben gi den (1 Sam. 1:26-28; 2 Tim. 3:15). Ooktoe na ini a ten disi wan jongoewan di wan bow wan boen fasi foe de nanga Jehovah, moesoe handri boen tapoe na rai nanga leri di en kristen papa nanga mama e gi en. — Odo 6:20; Ef. 6:1-4.
PROBERI FOE KISI JEPI
3 Sondro degedege soboen Samuël leki Timóteüs ben kisi foeroe jeje dek’ati nanga jepi foe den owroeman èn den trawan di ben tjari so wan boen bericht foe en fasi foe tjari ensrefi. Foeroe foe den dinari ini na diniwroko de jongoe bigisma di ben meki heri boen jeje go na fesi. Den kan jepi joe foe kweki warderi foe na velddienst. Foe san-ede joe no sa wroko makandra nanga den ini na velddienst? Den brada disi kan jepi joe foe meki joe jeje go na fesi kon na krin. — 1 Tim. 4:15.
4 Joe papa nanga mama, den owroeman èn den dinari ini a diniwroko alamala wani si joe jeje go na fesi. Sorgoe taki den kan tjari wan boen bericht abra joe. Sondro degedege na spesroetoe prakseri di na Genootschap e gi jongoe sma e naki joe ati. Joe opregti fasi foe prakseri sa jepi joe foe prijse Jehovah nen.
WAN PRISTERI FOE BOEKOE
5 Ini a moen juli wi sa pristeri a Tégo-libi-boekoe. Jongoe prékiman sa feni a njoen Tori foe Takmakandra koemakriki foe gebroiki. Soboen awasi joe no abi te leki now ete foeroe ondrofeni ini na velddienst, tokoe wi e gi joe dek’ati foe abi wan postitief fasi foe prakseri. Kande joe kan gebroiki na pristeri di e kon now noso wan di gersi en.
6 Taigi na ososma odi, kari joe nen èn aksi moro fara: „Joe bribi taki na libismafamiri e go miti wan boen ten di de na den fesi?” A no trobi efoe na piki foe na ososma de positief noso negatief, joe ben sa kan piki bakaten: „A bijbel e sori taki wan heri moi, tégo ten di de na wi fesi.” Lési moro fara Psalm 37:29, 37. Kande joe kan gi wan sjatoe commentaar tapoe den vers disi èn dan joe kan taki: „Na srefi Psalm disi e ferteri wi fa nanga aladi a ten loekoe frede wi tokoe kan abi fertrow èn kan de séker foe wan heri moi ten di de na wi fesi.” Lési now vers 39. A didon na a belangstelling di a sma e sori di ben sa kan meki joe lési vers 40 toe èn gi wan ferklari. Opo na Tégo libi-boekoe èn sori tapoe na kontrari mindri den prenki di de tapoe bladzijde 9 nanga 11-13. Ferteri na ososma te foe kaba dati ini na belang foe wan heri moi ten di de na wi fesi a de fanowdoe foe kon sabi moro foe disi. Pristeri moro fara na Tégo libi-boekoe. Nanga pikinso moro moeiti nanga sreka na fesi foe na sé foe joe joe kan doe wan heri boen pristeri.
7 Oenoe jongoewan, di e kisi leri ini a ten disi ini na pasi foe waarheid, troetroe oen abi wan bigi grani. Oen kan gebroiki oen heri libi foe prijse Jehovah nen efoe troetroe joe abi na winsi foe doe Jehovah wani èn joe e teki winimarki foe na jepi di En e gi. Poti na joe prakseri foe dini Jehovah joe heri libi langa.