Gi leri na yu bijbelstudi fa fu gebroiki na bijbel
1 „Di unu ben kisi a Wortu fu Gado, di unu ben yere fu mi, unu no ben teki en leki na wortu fu libisma, ma, san a de ooktu trutru, leki na wortu fu Gado” (1 Thess. 2:13). Leki tru kristen wi e broko wi ede fu meki a bijbel taki gi ensrefi. Yepi fu dat’ede, te yu e hori wan bijbelstudi, na sma di yu e yepi fu si dati san a e leri de den prakseri fu Yehovah, èn no di fu libisma. Te yu e leri yu studi fu gebroiki na bijbel bun, dan yu kan bow na ini den a fertrow na ini na bijbel èn gi den wan bun fondamenti fu bribi èn na bekwaamheid fu opo taki nanga overtoigi nanga yepi fu na bijbel. — 2 Tim. 3:16, 17; 1 Petr. 3:15.
2 Oten yu e bigin fu leri yu studenti fu gebroiki na bijbel? Fa yu e leri en fa den bijbelbuku e waka baka makandra èn fa a kan feni tekst? San na studenti kan du persoonlek fu leri bepaalde sroto tekst èn fa yu kan yepi en? Difrenti fasi de di kan gebroiki tapu wan bun fasi.
GEBROIKI NA BIJBEL
3 Sori na studenti fu na bigin kaba na bladzijde na ini a bijbel di e sori ala bijbelbuku èn meki a si fa a kan feni ibriwan fu den. Furu tekst den e kari na ini den buku fu na Genootschap, èn trawan den e kari ma no e skrifi den wortu fu den poti. Ini a bigin a kan de bun fu suku èn leisi den alamala na ini a bijbel, èn na sofasi poti krakti na tapu dati disi na wan bijbelstudi. Disi sa kostu ekstra ten, ma a sa yepi na studenti fu kon sabi en bijbel. A sa meki en fertrow gro ooktu dati san e taki na ini den buku abi den fondamenti na ini a bijbel.
4 Te na studenti e poti aksi, yepi en dan fu feni den piki na ini a bijbel fudi a e suku tekst di fiti. Na a fasi dati a sa sabi dati a e kisi den piki fu Gado tapu en aksi (Yoh. 17:17). Yepi na studenti fu tak-go-tak-kon fu den tekst èn fu frustan na piki fu na bijbel dorodoro. Na a kaba fu na studi dan yu wani luku kande agen tu ofu dri sroto tekst fudi yu e meki a studenti luku den èn fu tyari san den wani taki kon a krin nanga en eigi wortu. Dati sa yepi en fu opo taki fu en bribi nanga yepi fu a bijbel. Ooktu a sa leri fudi a e gebroiki na bijbel fu taki nanga krakti èn overtoigi te a e prati nanga tra sma san a ben leri. — Tori. 17:1-3.
5 Gi dek’ati na a studenti fu suku den tekst di skrifi èn fu tak-go-tak-kon fu den te a e sreka a les na ini a ten di a e studeri nanga ensrefi, na Wachttoren-studi nanga tra komakandra. Na so fasi a sa de srekasreka fu gebroiki bun en bijbel na a ten fu den komakandra èn fu gi kommentaar tapu a studi materiaal di abi en fondamenti tapu a bijbel. Sori en ooktu na index fu bijbel-wortu na bakasei fu na Nyun Grontapuvertaling. Na index disi sa yepi en fu feni furu difrenti tori èn ooktu piki tapu aksi. Te ensrefi e leisi den tekst èn e ondrosuku den, dan na indruk fu den waarheid di a e kisi leri fu den sa go moro dipi na ini en.
6 Fu leri den studenti fa den mu gebroiki a bijbel sa tyari winimarki kon di sa tan. Na studenti sa erken dati na leri di a e kisi kon fu Gado. Iya, „a wortu fu Gado de a libi” èn abi krakti (Hebrewsma 4:12). Wi wani yepi tra sma fu kon de bekwaam ini ’na gebroiki na wan yoisti fasi fu na wortu fu waarheid’. — 2 Tim. 2:15.