Tan poti den kownukondre afersi tapu a fosi presi
1 Den wan di e kobroyki Yeyses ray fu suku na Kownukondre fosi, e kon si taki den musu poti wantu sani na a fosi presi na ini den libi (Mat. 6:33). Den e ondrofeni tu taki a waka baka Yeyses ray e yepi den fu wini sani di e tapu pasi. A de wan sani di musu kisi prèyse taki furu brada nanga sisa di abi osofamiri memre di no de na ini bribi e tan go doro kotrow fu poti Kownukondre afersi na a fosi presi.
2 Fa Yeyses ben demo, tapu wan fasi di e gi sma overtoygi, taki a ben poti na Kownukondre na a fosi presi ini en libi! Di a ben tanapu na fesi krutu na Pilatus, a ben tan stanfaste (Yoh. 18:36, 37). Iya, aladi a ben anga na a postu e dede, a ben tan poti krakti tapu na howpu tapu Gado Kownukondre fu di a ben taygi na ogriduman: „Yu sa de nanga mi na ini a Paradèysi” — Luk. 23:43.
BEREKEN DEN KOSTU
3 Fu san-ede Yeyses ben si a Kownukondre leki wan sani di de so prenspari? A ben seni kon komoto fu heymel fu „preyki fu na waarheid” taki Gado kownukondre ben sa go tiri ini regtfardiki fasi èn ben sa meki a kan taki Gado wani ben sa psa ini heymel, so srefi tu na grontapu. A de fu dati-ede wan bigi prisiri fu abi wan prati na a du fu Yehovah wani fu kenki na grontapu ini wan Paradèysi di a ben abi na a fosi bigin ini en prakseri! Iya, fa a de wan blesi di e wakti na libismafamiri di e bribi na ondro na Kownukondre tiri!
4 A waka baka Yeyses leki wan sma di e feti gi Gado kownukondre abi na ini tu a tyari fu wan „pina-udu” èn ala sani di abi fu du nanga dati. A „bereken fu den kostu” wani taki taki wan sma musu de klariklari fu libi en grontapu gudu efu dati e tapu pasi gi en diniwroko gi Yehovah (Luk. 14:27, 26, 33). Na a srefi ten Yeyses ben gi ala sma deki-ati fu de en bakaman èn fu prati na bun nyunsu nanga trawan. A kisi fu têgo libi na ondro na Kownukondre tiri warti ibri prèys. — Mat. 13:44-46.
NO BROKO YU EDE MORO LANGA
5 A psa di 19 yarihondro psa no meki a fanowdu fu tan poti den Kownukondre afersi na a fosi presi ini wi libi, èn moro mendri. A bun fu wi aksi wi srefi efu a dini fu Yehovah de trutru gi wi fu na moro bigi belang. Yeyses ben fruklari: „No wan sma kan dini tu masra leki srafu. No broko yu ede moro langa gi yu sili, na ini na tori fu san yu e go nyan ofu san yu e go dringi, ofu gi yu skin, ini a tori fu san yu sa weri” (Mat. 6:24, 25). Wi e broko wi ede fu wi sili ede? Ofu wi abi nofo bribi fu waka baka Yeyses ray fu suku fosi a Kownukondre, aladi wi e frutrow taki ala den tra sani disi wi sa kisi a tapu?
6 Wantu brada no ben wani teki wan wroko di ben sa meki den kisi wan moro bigi pay fu di na wroko schema ben sa tapu pasi fu na teyokrasiya wroko. Trawan ben musu kenki wroko te sani ben kon boksu nanga beybri gronprakseri. Son wroko basi ben meki wan skeki fu yepi Yehovah Kotoygi di ben sori taki den de wrokoman di de klariklari èn kotrow fu wroko (Kol. 3:23, 24). Wan gemeente seyker e tranga na wan tumusi bun fasi te owruman, dinari ini na diniwroko nanga pionier e gi wan bun eksenpre fu di den e suku a Kownukondre fosi.
MEKI PLAN NOW
7 Sonwan fu unu yonguwan, heri esi sa komoto na skoro. Yu e meki plan now gi wan teyokrasiya wroko fu yu libi? Yu poti na ede fu wroko, wan pisten heri dey bifosi yu bigin pionier? A de wan sani di fiti prèyse taki yu e prakseri fu abi wan prati na a pionierwroko na ini a ten di e kon. Ma efu a Kownukondre tanapu na a fosi presi ini yu libi èn yu situwâsi e gi pasi fu dati, fu san-ede dan yu no ben sa poti pionierwroko na a fosi presi? Efu na grontapu wroko e kisi na fosi presi a kofar de taki yu ati sa kon hebi nanga sorgu di sa meki yu lasi ati fu pionier. — Mat. 6:27, 34; Luk. 21:34.
8 Na grontapu disi e aksi furu fu den sma di de klariklari fu dini en leki srafu. Efu wi meki wi libi moro eenvoudig èn wi kisi seykerfasi fu den sani di de moro prenspari, wi kan nyan bun fu den, blesi di e komoto fu a suku fosi fu a Kownukondre. O moro prenspari a de, na presi fu brokokindi gi kori fu na grontapu, fu frutrow tapu Yehovah, di sabi wi fanowdu èn di pramisi fu sorgu fu dati! Te wi tan poti Kownukondre afersi tapu a fosi presi, wi libi sa abi wan trutru marki, di e kisi krakti fu di wi abi na luku na fesi fu blesi di no abi kba ini a ten di e kon. — Mat. 6:32; 1 Tim. 6:17-19.