Yu de srekasreka fu waka miti wan situwâsi na a sei fu datrawroko di de wan tyalensi gi yu bribi?
Kibri den info disi pe esi-esi yu kan kon na den efu yu abi den fanowdu
1 No wan sma e denki furu fu a tori taki tide ofu tamara a ben sa kan kon didon na ini wan ati-oso. Toku a de so, taki ’ten nanga sani di e psa di wi no kan si a fesi e miti wi alamala’ (Preyk. 9:11). Awinsi yu no de wan sma di e go esi-esi na datra, san yu o du fu sorgu taki yu no kisi wan brudu transfusie, efu ini wan ongoloku yu flaw èn esi-esi den musu tyari yu go na ati-oso? Iya, wan ongoloku ofu wan gosontu di esi-esi e kon takru kan tyari yu kon na ini wan situwâsi di de wan tyalensi gi yu bribi.
2 Efu fu wan ofu tra reide yu kon na ini wan ati-oso èn wan sma e taigi yu drape taki sondro brudu transfusie yu sa dede, san yu e du dan fu kibri yu soifri-retifasi? Yu e teki wantewante taki a sani disi di taki trutru e sori fa a de nanga yu? Yu abi na overtoigi dorodoro taki yu no wani brudu? Yu de srekasreka fu kakafutu gi na tyalensi disi tapu yu bribi èn ’fu tan farawe fu brudu’? — Tori. 15:28, 29.
3 Efu yu wani kakafutu na wan bun fasi gi wan brudu transfusie di yu no wani èn di e doti yu na yeye fasi, dan wan fasti overtoigi de a fosi sani. So wan overtoigi musu abi en gron tapu wan bun frustan di yu e frustan san a beibri e taki fu brudu. Noso, ini den firi fu a momenti, makriki wan sma, di e taki taki a sabi moro fu na situwâsi leki yu, ben kan tapu skreki gi yu. Den kan kori yu fu denki taki datra kande sabi moro fu brudu leki Gado? Ini den omstandigheid disi seiker yu sa wani „de nanga wan faste bosroiti” fu du „san de reti” na ini den ai fu Yehovah, awinsi san libisma mag taki tu (Deut. 12:23-25). Ma a de so, taki na yu wawan musu waka miti na tyalensi disi? — Preyk. 4:9-12.
ATI-OSO INFODIENST NANGA ATI-OSO KONTAKTIKOMTE
4 Fu na bun fu Yehovah pipri meki san e kon now seti na ini Verenigde Staten (Amerkankondre): Fu yepi den sma di abi yepi fanowdu te den kon tanapu na fesi wan problema ini a tori fu brudu transfusie, meki na Genootschap na ini Brooklyn seti wan Ati-oso infodienst. So srefi tu den opo 100 Ati-oso kontaktikomte na ini prenspari Amerkan foto. Moro leki 600 owruman di kisi skoro fu na wroko disi de wan pisi fu den komte disi.
5 Na Ati-oso infodienst man fu ondrosuku sani ini moro leki 3600 datra tijdschrift ini na heri grontapu fu feni tori di e go fu den furu sortu oparasi nanga methode fu behandeling di de fu kisi èn di kan du na wan bun fasi sondro brudu. Moro fara na dienst disi e sorgu fu den Ati-oso kontakikomte, den presi di e sorgu fu sma gosontu nanga wantu datra kisi tori fu na go-na-fesi di feni presi tapu den kontren fu datrawroko. (Sontron na Ati-oso infodienst seni artikel fu datrawroko di e meki sma si san kan du sondro brudu go a doro, èn na a fasi disi ben sabi fu tyari wan bun kenki kon ini wan tuka di ben e gro kon na ini wan ati-oso.) Na Ati-oso infodienst ben fruteri den komte fu den bun bosroiti di krutubangi teki, so taki krutubakra sa kisi yepi fu si den tori fu wi nanga moro frustan fu sani. Na dienst disi e kibri den tori tu fu moro leki 7000 datra di ben taki taki den sa wroko makandra, so taki den komte abi bun bodoi fu kobroiki efu problema opo ede kon ini na tori fu brudu transfusie.
6 Na Ati-oso infodienst so srefi tu e hori ai tapu na gi fu leri èn na wroko fu den Ati-oso kontaktikomte. Na ini den foto pe den komte disi de, den e gi doronomo bodoi na den sma fu den ati-oso di de datra, fu meki a matifasi nanga den kon moro bun. Den e go na den tu fu feni moro datra ete di wani fu behandel wi sondro fu kobroiki brudu.
7 Na ini Nederland den sortu sani disi seti. Na ini Sranan den sani disi no seti ete. Na Tiri Skin no poti no wan Ati-oso infodienst ete èn so srefi tu no wan Ati-oso kontaktikomte de. Ma seminaar e hori na ini difrenti kondre, so srefi tu gi na Caraibisch kontren èn brada fu Sranan kisi kari fu dati tu. Ma wi ben meine fu no hori den tori disi ini na inlegvel a baka gi yu so taki unu sabi fu den stáp di e teki te situwâsi fu na sei fu datrawroko sori en srefi di kan de wan tyalensi gi yu bribi. Tapu na bijkantoro na ini Emmen wan afdeling de tu fu na ati-oso infodienst. Wi abi wan lijst fu tintin datra di de klariklari fu behandel Kotoigi sondro fu kobroiki brudu. Fo Ati-oso kontaktikomte de; na ini ibri komte, di e sorgu fu wantu provincie, nownow dri brada e dini. Den go kba na bun furu ati-oso fu taki nanga sma fu na direktie èn den sma di e du datrawroko. Ini na krosibei ten di e kon moro komte sa seti, ala di na nomru fu sma fu den sa kon moro furu. Den brada disi sa de klariklari fu yepi yu, ma efu den wani du disi na wan bun fasi, dan yu srefi musu teki a fesi bepaalde bosroiti.
BOSROITI DI MUSU TEKI A FESI — YU TEKI DEN KBA?
8 Ondrosuku fu si na a fosi presi taki ala osofamiriman vul na Datrakarta Papira dorodoro — dati a abi wan datum èn yu nen de na ondro, so srefi tu na nen fu den kotoigi. Na son brada nanga sisa di ben kon na ini wan ati-oso nanga wan karta di no ben abi datum ofu pe den kotoigi no ben poti den nen na ondro, den ben tweifri efu a bun. Èn ala wi pikin di no dopu ete abi na Identiteitkarta fu den di vul in? Efu dati no de so, dan fa den sma di e wroko ini na ati-oso kan sabi fa yu e denki ini na tori fu brudu na ini wan nowtu situwâsi pe yu pikin de na ini, èn sabi suma den musu bel?
9 Luku so srefi tu taki ala osofamiriman ALATEN abi den karta disi na den. Kontroleer disi ibri dei na yu pikin bifo den go na skoro, iya, srefi bifo den go na wan preigron ofu recreatiekontren. Wi alamala musu de seiker taki wi abi den karta disi na wi, efu wi de now na wi wroko, de na wan fakansi ofu de na wan kresten kongres. Abi den alaten na yu!
10 Go prakseri pikinso san ben kan psa efu na ini wan seryusu toestand den ben sa tyari yu go na a ongoloku afdeling fu wan ati-oso, sondro fu yu sabi fu yu srefi èn noso yu no man fu taki fu yu srefi. Efu yu no abi na karta nanga yu, èn no wan famiriman ofu owruman de ete na ini na ati-oso fu taki gi yu, èn den sma kon na a bosroiti taki yu ’abi brudu fanowdu’, dan kande seiker yu sa kisi wan brudu transfusie. Na wan ongoloku fasi disi psa nanga wantu sma. Ma efu wi abi na karta na wi, dan dati e taki ini wi nen èn e tyari na wani fu wi kon na fesi.
11 Fu dati-ede meki wan Datra Karta de moro bun leki wan S.O.S.-anubui noso -keti. Na lastiwan no e fruteri na reide fu wi fu a beibri fu na sei di wi e teki èn handtekening no de di e taki taki san skrifi de so. Na ini na krutu di leisi na ini wan krutubangi na ini Canada tanapu fu na karta fu wan sisa: „[Na sikiman] ben teki na wan enkri fasi di kan fu fruteri datra nanga tra sma di e wroko fu dresi trawan taki en, efu a no ben sabi fu en srefi, ofu noso no ben man fu fruteri san a e winsi, no e agri nanga wan brudu transfusie.”
12 Na ini oktober 1986 na Datra Tuchtcollege na ini Amsterdam ben taki na sani disi: „Na College moro fara e bribi taki soso efu wan datra abi na moro bigi seikerhèit taki wan sikiman en srefi nanga en fri wani teki na bosroiti fu no kisi brudu, a de wan frantiwortu sani taki wan datra na ini wan situwâsi pe a libi de ini degedege no kobroiki brudu fu gi na sma. . . . A de na a pasi fu na sikiman ofu fu den sma di e teki presi gi en fu sorgu taki na datra di e behandel en kon sabi taki na sikiman srefi na ini wan situwâsi pe en libi de na ini degedege no wani kisi brudu. Disi wani taki taki wan sikiman musu abi wan codicil (wan skrifi di e sori a wani fu a sma) na en èn efu na sikiman no man taki moro, taki a sma di e teki presi gi en musu sori tapu na codicil di de.” Den wortu disi e meki wi si o prenspari na ról de fu na Datra Karta. Yu musu abi en sobun alaten na yu!
13 Fu di na richtlijn fu wi ini na tori fu datra moro furu seti gi nowtu situwâsi, meki ini na tori fu wan oparasi di wi wani, a ben sa de wan koni sani fu yu skrifi a fesi tapu papira moro finifini yu eigi richtlijn di abi en gron tapu na beibri (nanga leki fondamenti na richtlijn fu wi fu datrawroko) so taki yu kan teki spesrutu penti poti na ini, so leki na sortu fu oparasi nanga den nen fu den datra nanga ati-oso. A de na reti fu yu fu du dati èn na so fasi meki a de seiker taki yu kisi na behandeling di yu wani. Srefi efu yu èn yu datra no e si seryusu problema, tyari toku kon a krin taki den musu hori den srefi na den richtlijn disi ini kofal fu onfruwakti sani di ben sa kan psa. — Odo 22:3.
14 Na tra prenspari stap na fu taki nanga den datra di o de fanowdu èn di yu o abi fu du nanga den na wan behandeling di seti a fesi ofu wan di e kon fu wan nowtu situwâsi. Nanga suma moro spesrutu yu musu taki?
TAKI NANGA DEN SMA DI E DU DATRAWROKO
15 NA GRUPU FU DATRA: Disi no de na ten fu gi yu srefi abra na a frede fu libisma (Odo 29:25). Efu yu e sori leki yu de onseiker, dan den sma kan teki na bosroiti taki yu no de opregti. Ini na kofal fu wan oparasi ofu a de wan di yu wani ofu wan nowtu situwâsi, dan yu ofu na moro krosibei famiriman fu yu nanga fasti bosroiti musu aksi wantu konkreet aksi na a edeman fu na oparasi grupu. Wan prenspari aksi de: Na grupu sa respeki den winsi fu na sikiman èn ini ala omstandigheid gi en wan behandeling sondro brudu? Sondro na dyaranti disi yu no ben sa kibri yu srefi bun.
16 Taki krin èn nanga warti overtoigi san yu winsi de. Meki kon a krin taki ini na tori fu yu problema yu wani kisi wan tra datra behandeling sondro brudu. Taki bedari èn nanga frutrow fu yu eigi richtlijn fu a sei fu datrawroko di yu ben skrifi a fesi èn so tu, efu a de, fu taki fu na formulier di son ati-oso e kobroiki fu seti sani taki na datra de fri fu frantiwortu. Efu na datra di o du na oparasi no wani wroko nanga den winsi fu yu, dan yu kan taki na afersi nanga na edeman fu na afdeling èn aksi efu na ini na ati-oso wan tra datra de di de klari fu du leki fa yu wani.
17 NA ANESTHESIST: Fu ala den sma fu na grupu fu datra di yu musu taki nanga en bifo na oparasi, dan YU MUSU TAKI SEIKER NANGA NA DATRA DISI. Na anesthesist, di abi na wroko fu hori yu na libi ala di na datra di e oparasi e koti yu, de na sma di e teki bosroiti fu den sortu afersi disi leki na kobroiki fu brudu. Sobun yu no kibri yu srefi krinkrin efu yu taki nomo nanga na datra di e du na oparasi. Fu dati-ede yu musu taki nanga na anesthesist, overtoigi en fu san yu e bribi èn luku efu a e respeki ofu no e respeki dati. — Teki gersi Lukas 18:3-5.
18 Na ini na praktijk a gersi taki a de na gwenti taki na anesthesist e fisiti na sikiman bun lati, na a neti di e waka na fesi na oparasi — tumusi lati efu a de kontrari a bribi fu yu ini na tori fu brudu. Tanapu na tapu taki na datra di e du na oparasi, suku na fesi wan anesthesist di de klari fu wroko makandra èn di bun langa na fesi bifo yu go didon fu kisi wan oparasi di yu wani, yu kan abi wan takimakandra nanga en. Dan ten sa de fu feni wan trawan efu na fosiwan no de klari fu du san yu e wani. No gi pasi taki wan sma e pruberi fu taki so nanga yu, so taki yu no e kobroiki na reti disi fu yu srefi kon agri nanga na anesthesist fu yu oparasi.
19 Na ala den sma disi yu musu tyari na bribi fu yu kon a krin, pe no wan onderhandel kan: NO WAN BRUDU. Aksi efu den wani gi yu wan tra datra behandeling sondro brudu. Kari ala tra sani di yu sabi fu brudu di abi fu du nanga na situwâsi fu yu. Efu na grupu fu datra e denki taki den no kan kobroiki disi na ini yu kofal, aksi den dan fu suku na ini den datra buku na tra mogelijkheid. Gi den na dyaranti taki, efu den wani disi, yu kan gi den wantu bodoi fu di yu sa aksi yu owruman fu meki kontakti nanga na krosibei Ati-oso kontaktikomte.
KOBROIKI YU RETI
20 Stuka finifini na formulier ini na tori fu a datra de fri fu frantiwortu èn na formulier di na ati-oso e aksi yu fu poti yu nen na ondro baka te den teki yu na ati-oso èn pe yu e gi den primisi. Sontron wantewante baka na fruklari taki den sa respeki yu winsi, dan na ini na tra pargraaf e tyari kon na krin taki na sma di poti en nen na ondro a formulier e agri taki na ati-oso kan kobroiki wan behandeling „fu kibri yu libi” efu problema kon sori den srefi. Disi ben kan wani taki na kobroiki fu brudu. Yu abi na reti fu kenki den sortu fruklari disi na so wan fasi taki na kobroiki fu brudu e poti na wan sei, ofu fu hari wan strepi na tapu. Sma di e sorgu gi sikiman kande sa wani fu fruteri yu taki dati no mag, ma dati mag wel! Tyari kon a krin taki so wan formulier de wan kruderi nanga den èn taki yu no kan poti yu nen na ondro wan kruderi di yu no e agri nanga en. Efu wan sma e pruberi fu dwengi yu fu poti yu nen ala di yu no wani, aksi dan fu taki nanga na edeman fu na afdeling èn/ofu na driktoro fu sikiman sorgu fu na ati-oso dati.
21 Yu mag du den sortu sani dati? Seiker! Sabi sobun yu reti leki sikiman. Te yu e go na ini ati-oso dan yu no libi den libisma reti disi na yu baka na a fesi doro. Yu no abi fu poti den na wan sei fu den behandel yu. No meki no wan tra sma fruteri yu wan tra sani.
22 Na ini na Mamawet fu na Kownukondre fu Nederland tanapu na ini kapitri 1 ondro „Gron reti”, artikel 11 san e taki so: „Ibriwan sma, boiti na ini wet ofu ini na krakti fu na wet, abi reti tapu en skin di sma no mag fu fasi.” Na ini Bakrakondre den e sreka wan nyun wet ini na tori fu den reti fu sikiman. Fu dati ben tanapu na ini na Staatscourant fu 16 februari 1987: „Leki fa na voorontwerp taki dan gi ibri du di wan sma di e gi yepi ini na tori fu wan kruderi fu behandeling, dan ala tron baka na sikiman sa musu gi pasi. Na sma di e gi yepi sa musu fruteri na sikiman tapu wan krin fasi kande tapu papira a fesi fu na fasi nanga na marki fu na ondrosuku ofu na behandeling di a e feni fanowdu. So tu a musu fruteri na sikiman fu den bakapisi di a e fruwakti èn na risico fu dati gi na gosontu fu na sikiman. Na plekti fu gi bodoi e go moro fara te na a fruteri fu tra methode fu ondrosuku ofu behandeling di ben sa kan kobroiki.” Na uitgave fu 8 september 1987 ben taki moro fara: „Na gi fu primisi fu wan behandeling wi musu si tu leki wan fu den moro prenspari reti fu na sikiman.” Na prakseri disi e kruderi nanga na rai fu na Nationale Rai fu na Volksgezondheid na den tiriman di abi fu du nanga dati.
23 Fu kan de seiker ini san yu e gi primisi, dan yu MUSU aksi bun aksi fu ala sani san yu no e frustan, spesrutu te den sma di e wroko na ini ati-oso e kobroiki muilek wortu ofu datra wortu. Efu wan datra fu eksenpre taki taki a wani kobroiki „plasma”, dan sondro fu prakseri ogri yu ben kan denki taki a e bedoel wan „plasma-aanvullende vloeistof”, ma dati no de so. Aksi, bifo yu e gi primisi: „Disi na wan pisi fu brudu?” Aksi fu ibriwan fu den behandeling methode: „Na a behandeling dati na kobroiki fu brudu produkt de ini na tori?” Aksi efu a e kari wan ofu tra apparaat di a wani kobroiki: „Na brudu fu mi e poti aparti na wan sei te den e kobroiki na apparaat disi ini wan bepaalde pisiten?”
24 Ma san yu musu du efu yu du ala san tanapu dyaso na tapusei èn ini na tori fu yu bribi wrokomakandra no de ete ofu srefi wan pikin gens de? No draidrai fu suku yepi. Son sma ben wakti tumusi langa fu suku yepi èn ben tyari no moro mendri leki na libi fu den kon ini kofar.
WARTI YEPI INI WAN TEN FU NOWTU
25 Poti prakseri na san e kon èn san musu du fu kisi na fanowdu yepi: (1) Efu yu ofu wan lobiwan kon na fesi wan oparasi di yu wani ofu wan oparasi leki wan bakapisi fu wan nowtusituwâsi pe wan tuka nanga makandra e sori en srefi fu di na ati-oso wani kobroiki brudu; ofu (2) efu na gosontu toestand fu yu ofu di fu wan lobiwan kon ogri srefisrefi; ofu (3) efu ini na tori fu wan pikin na datra, wan sma di e yepi siki sma ofu wan tra frantiwortu memre fu na ati-oso e taki taki den sa musu seti fu wan pisiten taki na papa nanga mama no abi makti tapu na pikin èn, sa seti taki na pikin e gi na a frantiwortu fu na Rai fu Kibri Pikin,
26 KARI DAN DEN OWRUMAN FU NA PRESI PE YU E LIBI efu yu no du dati kba. (Iya, fu na bribi fu wi ede ini na tori fu brudu meki a de na pasi fu koni fu warskow alaten den owruman fu wi efu wi musu go didon na ini wan ati-oso.) Efu den feni disi fanowdu, DAN DEN OWRUMAN SA TELEFON NA MORO KROSIBEI ATI-OSO KONTAKTIKOMTE. Efu yu wani disi dan wantu memre fu na Ati-oso kontaktikomte kan kon na ati-oso fu yepi. — Yes. 32:1, 2.
27 Prakseri taki yu abi yu srefi na reti fu teki wan (tra) datra. Den owruman disi fu na Ati-oso kontaktikomte sabi sortu datra ini na kontren fu yu wani gi a wrokomakandra fu den, èn kan tyari yu kon na ini kontakti nanga den èn meki wan bigin fu poti tapu wan rèi sortu tra datra ofu ati-oso ben sa kan yepi. Efu na ini na directe omgeving no wan yepi de, dan den owruman sa suku rai na tra moro krosibei komte. Èn efu dati no man fu gi yepi, dan den sa telefon na Ati-oso infodienst na ini Emmen. Den kan aksi kande so srefi wan takimakandra nanga wan datra di fruteri taki a man fu yepi èn di kan tyari kon a krin gi na grupu fu datra san kan du sondro brudu. Den brada fu na Ati-oso kontaktikomte sabi fa den kan du nanga den sortu situwâsi disi — den kisi leri fu dati.
28 Sma fu na Ati-oso kontaktikomte de so srefi tu klari fu yepi yu nanga wan famiri ini wan takimakandra nanga wan datra ofu wan tra frantiwortu sma ini na ati-oso, ma yu musu aksi fu na yepi dati. A no de fu taki, taki den brada disi no kan teki no wan bosroiti gi yu, ma nofotron den kan yepi yu fu luku na fasi fa na Genootschap e si sani ini bepaalde afersi èn sori yu tapu den mogelijkheid di kan teki ini na tori fu datra èn ini na tori fu lanti wet.
29 Efu na grupu fu datra no wani te now ete fu wroko makandra, taki dan nanga na edeman fu na afdeling fu aksi efu tra datra de na ini ati-oso di sa respeki den winsi fu yu. Efu na edeman fu na afdeling no e du wan sani fu du dati èn SOSO efu yu feni definitief na wan tra presi wan tra datra di e oparasi sma èn den kan tyari yu go na a tra ati-oso dati, dan yu kan teki na bosroiti fu gi na edeman fu na afdeling wan fruklari nanga wan datum a tapu èn yu nen na ondro pe yu e kari den nen fu den datra di ben weigri fu wroko makandra èn pe yu e fruteri taki yu no wani den de moro fara leki datra fu behandel yu.
30 Yu mag du dati? Iya, yu abi na reti fu dati. Èn efu bakaten na afersi kon na fesi wan krutubakra dan na skrifi fruklari fu yu kan du furu taki en ben erken den winsi fu yu. Èn na ethisch fasi a kan opo na pasi so tu gi tra datra di e oparasi sma fu go bemui nanga a tori èn pristeri na yepi fu den na yu. Èn san de a moro prenspari sani, yu kan hari na prakseri fu den datra di yu abi fanowdu de, bifo na toestand fu yu kon moro ogri taki a kon de kofarlek. No wakti tumusi langa!
AKSI DI E WROKO TAPU YU FIRI ÈN DI YU MUSU LUKU BUN NANGA DEN
31 Yu musu sabi taki son aksi fu datra nanga trawan no e aksi alaten nanga wan yoisti buweigi fu ati. Na aksi di datra (èn son krutubakra) e aksi moro furu de:
„Yu ben sa wani dede (meki yu pikin dede) leki fu teki wan ’brudu transfusie di kan kibri yu libi’?”
32 Efu yu taki iya, dan dati ben sa de yoisti na a sei fu a fasi fu anbegi Gado. Ma na piki dati nofotron den e frustan en fowtu èn sontron e meki krutubakra teki bosroiti di no de yoisti. Yu musu hori na ini prakseri taki na ini a situwâsi disi yu no de ini na velddienst. Na presi fu dati, yu e taki fu wan fanowdu datra behandeling. Fu dati-ede meki yu musu fiti yu srefi na den sma di e arki yu, efu dati de now datra ofu afkati. — Ps. 39:1; Kol. 4:5, 6.
33 Gi wan datra, wan ofsiri fu Yustitie, wan sma fu na Rai fu na Kibri fu den Pikin-nengre, wan krutubakra ofu wan frantiwortu memre fu na ati-oso, dan „iya” kan wani taki taki yu wani de wan sma di wani dede fu en bribi ede ofu wani ófer yu pikin gi yu bribi. Ini na situwâsi disi a no sa yepi gewoonlijk te yu taigi den taki yu abi wan bribi na ini na opobaka. Den sa si yu leki wan fanatiek sma ini na dini fu Gado, di no man fu teki bosroiti nanga yu frustan te libi de ini na tori. Ini na tori fu pikin den sa si yu leki wan papa ofu mama di no e broko en ede èn di e weigri wan datra behandeling di „kan kibri na libi”.
34 Yu NO e weigri langalanga ibri datra behandeling. Yu abi soso wan tra denki leki na datra ini NA SORTU fu behandeling. Na fasi disi fu si sani nofotron sa meki den si sani tra fasi èn tyari wan kenki kon na ini yu situwâsi. Boiti fu dati, a de wan sani di de leki wan kori efu den meki a kon so a fesi neleki brudu transfusie na wan bun sani sondro kofar èn na WÁN ENKRI behandeling di de „fu kibri yu libi”. (Luku Fa brudu kan frulusu yu libi?, blz. 7-22.) Yu musu meki na penti dati kon so srefi tu krin a fesi. Fa yu kan du disi? Yu ben sa kan piki:
„Mi no wani dede (no wani taki mi pikin dede). Efu mi ben wani dede (dati mi pikin ben dede), dan mi ben sa tan na oso. Ma mi kon dyaso fu kisi wan datra behandeling, so taki mi (mi pikin) e tan a libi. San mi wani fu mi srefi (mi pikin), de wan tra datra behandeling sondro brudu. Èn tra behandeling de di kan kobroiki.”
35 Difrenti tra aksi di nofotron datra ofu afkati e aksi:
„San sa psa nanga yu efu yu pikin, baka di na ofsiri fu Yustitie fu wan pisiten puru yu fu na makti leki papa nanga mama, e kisi wan brudu transfusie? Sma sa gi yu na frantiwortu fu dati?
„Efu yu (ofu yu pikin) nanga tranga e teki wan brudu transfusie ofu e kisi wan, dati sa meki dati den sa puru yu (èn/ofu yu pikin) fu yu fasi fu anbegi ofu no sa kisi na têgo libi? Fa yu gemeente e si yu (èn/ofu yu pikin)?”
36 Wan sisa (na ini Verenigde Staten) ben piki wan krutubakra taki ini so wan kofal en no ben sa de frantiwortu fu san na krutubakra ben teki na bosroiti. Ala di disi te yu luku en fu wan bepaalde uku de yoisti, toku na krutubakra frustan en so, taki, efu a sma no abi na frantiwortu, en ben sa kan teki na frantiwortu tapu en gi na sisa. A ben gi pasi fu wan brudu transfusie.
37 Yu musu frustan taki nanga den aksi disi nofotron den e pruberi fu feni wan fasi fu koti psa na weigri di yu e weigri fu teki brudu. No tyari dati kon ini na anu fu den! Fa wi ben sa kan tan farawe fu na fowtu denki disi? Yu ben kan piki:
„Efu wan sma tapu wan ofu tra fasi ben sa gi mi brudu nanga tranga, dan dati ben sa de gi mi na srefi leki wan man kon didon na mi nanga tranga. Mi heri libi moro fara mi ben sa go bukundu na ondro den bakapisi fu na sei fu mi firi èn na yeyefasi fu na rós disi tapu mi di mi no ben wani. Nanga ala mi krakti mi ben sa feti kontrari so wan sortu fowtu kobroiki fu mi skin sondro mi gi primisi. Mi ben sa du ala sani fu krutubakra strafu den sma di ben rós mi, net so leki mi ben sa du ini na kofal fu wan rós di wan man rós mi.”
38 Wi musu meki na wan krakti fasi den kan si taki wan brudu transfusie di o gi nanga tranga de gi wi wan tegu sani èn wan fowtu kobroiki fu wi skin. A no wan sani di wan sma kan waka psa sondro fu poti prakseri na tapu. Hori na yu bosroiti. Meki kon na krin taki yu wani wan tra datra behandeling sondro brudu.
SAN YU O DU FU DE SREKASREKA?
39 Wi gi wan overzicht fu wantu sani di yu musu du fu kibri yu srefi nanga yu osofamiri gi brudu transfusie di yu no wani. (Bakaten wi howpu fu gi moro finifini tori fu na behandel fu problema di e opo ede kon te beibi nanga pikin-nengre den e pruberi fu gi brudu transfusie.) Wi ben si tu san na Genootschap du na wan lobi fasi fu yepi wi na ini ten fu nowtu. Èn san yu musu du nanga den tori disi fu de seiker taki yu de srekasreka fu kakafutu gi wan situwâsi fu na sei fu datrawroko di e tyalensi yu bribi?
Na a fosi presi: Hori wan osofamiri takimakandra pe yu e luku den afersi disi ete wan leisi, èn e go luku finifini san yu sa taki èn du, spesrutu na ini wan nowtu situwâsi.
Dan: Luku taki yu abi ala fanowdu papira na yu.
Baka dati: Meki a de wan afersi fu begi — aksi Yehovah seryusu fu horibaka gi yu ini yu fasti bosroiti fu yu fu ’tan farawe fu brudu’. Na gi yesi na a wet fu en ini na tori fu brudu e dyaranti wi fu na bun-ati fu en, nanga têgo libi na wi fesi. — Tori. 15:29; Odo 27:11, 12.
[Faki na tapu bladzijde 7]
Efu na gosontu toestand fu wan sma kon so takru taki den wani nomonomo fu gi wan brudu transfusie, luku dan dyaso na ondro san yu musu du:
1. Aksi den owruman na ini yu gemeente fu yepi yu.
2. Meki den owruman efu a de fanowdu telefon na moro krosibei Ati-oso kontaktikomte.
3. Na Ati-oso kontaktikomte kan yepi yu ini takimakandra nanga datra èn trawan.
4. Na Ati-oso kontaktikomte kan yepi yu fu taki nanga tra datra di kan taki fu tra fasi fu behandeling nanga den datra di o oparasi yu.
5. Na Ati-oso kontaktikomte kan yepi yu tu fu yu go abra na wan tra ati-oso di e sori moro respeki gi wan fanowdu behandeling.