Spesrutu kongres e gi grani na Yehovah
1 Den alayari kongres e sorgu taki Yehovah Kotoigi e kisi kowru-ati nanga deki-ati na yeye fasi, èn so srefi e abi prisiri kresten demakandra. Bigi konmakandra fu Yehovah pipri e dini so srefi tu leki wan tumusi bun yepi fu meki Yehovah nen bekenti èn fu meki na publiki na bun nyunsu fu na Kownukondre bekenti.
2 Fu a bun fu ala brada nanga sisa meki ibri yari Yehovah Kotoigi e orga distriktkongres na a heri grontapu. Boiti fu dati, dan sontron na ini bepaalde kontren spesrutu kongres e hori. Disi e gi wan okasi fu sori na internationaal karakter fu na organisâsi èn fu gi wan moro bigi kotoigi. Na ini 1989 dri spesrutu kongres ben hori na ini Polen. Fa den tori ben span di wi ben kisi fu den spesrutu kongres dati!
SANI DI SETI GI DEN SMA DI DEN PIKI PURU FU GO
3 Dusundusun brada nanga sisa abi na winsi fu go na wan fu den spesrutu kongres. Ini na ten di e kon kande a sa man, taki moro brada nanga sisa fisiti wan fu den kongres disi. Ma fu meki den spesrutu kongres doro a marki fu den èn fu ala sani waka na wan orde fasi, meki na sani seti taki ibriwan fu den bijkantoro di den piki puru e teki wan skotu nomru fu sma di den o seni go fu fisiti wan bepaalde kongres. Na so fasi den e sorgu gi wan balansi internationaal bradafasi leki wan deki-ati gi den brada nanga sisa fu a presi èn leki wan kotoigi gi ala sma di e luku. A no de fu taki, taki disi wani taki, taki a no ala sma di e seni aksi fu go èn di na dienstkomte fu na gemeente e rikomanderi, den sa teki fu seni go. Sonwan kande kan mandi taki den no e teki den, ma wi e bribi taki ala sma sa frustan den prenspari reide fu so wan seti.
4 Fu wan tumusi moi kotoigi sa gi, meki a Genootschap e aksi ibri sma fu wroko makandra nanga den seti di tyari kon a krin fu spesrutu kongres. A e gi bigi problema efu wantu brada nanga sisa e seti den eigi sani fu fisiti wan spesrutu kongres, ala di den no teki den leki sma di den piki puru spesrutu fu go. Na a Genootschap poti na nomru fu sma di den o seni komoto fu kondre di den piki puru fu go na wan spesrutu kongres. Disi de fanowdu fu luku a tapu taki den presi fu hori den kongres no furu psa marki. Efu den kongres presi ben sa furu psa marki, dan dati ben sa hendri fu a kongres waka na wan switi fasi èn a no ben o gi wan bun indruk tapu a lanti fu a presi.
5 Den sma di den piki puru fu go musu hori na prakseri taki den e go na a kongres fu meki den Kownukondre belang go na fesi. Na marki disi wi e doro moro esi te ala sma di den piki puru fu go e wroko makandra nanga den sani di na Genootschap seti gi na rèis èn tra afersi èn no go seti sani tapu den eigi fasi.
6 Na yari disi spesrutu kongres ben hori na ini Berlijn (Doisrikondre) nanga São Paulo (Brasyon). Ini december yu sa abi na ini Buenos Aires (Argentinië) wan spesrutu kongres. Ini yanuari 1991 yu sa abi tapu dri presi na ini na Fara Owstusei spesrutu kongres, namku na ini Manila (Filippijnen), Taipei (Taiwan) nanga Bangkok (Thailand). Gi den kongres disi den piki sma puru kba. Tra spesrutu kongres gi na dreiten fu 1991 den gemeente kisi fu yere kba, èn den dienstkomte fu na gemeente feni sma fu na gemeente di gi den srefi abra èn di teki dopu bun kba èn den seni aksi fu den mag go. Wi e fruwakti dati ala sma di den piki puru fu seni go sa du ala muiti makandra nanga den trawan fu tra kondre di go fisiti na kongres fu gi wan tumusi moi kotoigi.
7 Efu den piki wi puru leki sma di o go na spesrutu kongres ofu fu fisiti kongres na ini na presi pe wi de, meki den begi fu wi èn wi aladei waka nanga libi de a buweisi fu a gi di wi e gi wi srefi na ini na dini fu Gado nanga wi heri ati èn meki a opregti winsi fu wi de fu gi Yehovah grani na ini ala san wi e du!