Pristeri na bun nyunsu — Ini wan fasi fu begi
1 Na apostru Paulus ben skrifi gi den Filipi sma na wan fasi di e gi deki-ati: „Gi ala sani mi abi na tranga fu en di e gi mi krakti” (Fil. 4:13). Wi tu musu frutrow dorodoro tapu Yehovah fu kisi tranga fu pristeri na bun nyunsu fri èn sondro frede. Fa wi kan du disi?
2 Yeises ben poti krakti tapu na fanowdu di de gi wi fu „begi alaten èn fu no weri” (Luk. 18:1). Paulus ben gi na deki-ati: „Begi sondro fu stóp” (1 Tes. 5:17). Iya, begi e gi krakti. Wi musu pristeri na bun nyunsu ini wan fasi fu begi. Wi kan begi fu kisi okasi, so taki wi kan preiki gi tra sma, fu kisi koni nanga na koni fu si fa fu du ini na oso fu oso wroko, èn fu abi winimarki te wi e pruberi fu doro na ati fu wi beibristukaman. Fu di a de tranga fanowdu fu klari na preiki fu na bun nyunsu fu na kownukondre bifo na kba kon, meki wi musu begi tu fu den kownukondre belang go na fesi na a heri grontapu (Mat. 24:14). Wi musu ’tan na ai’ ini na tori fu begi fu no fadon go na ini sribi na yeye fasi èn fu kisi moro warderi gi na grani fu taki nanga tra sma fu den prakseri fu Yehovah. — Kol. 4:2; w62 bladzijde 666-667 (ini Bakratongo).
NA BEIBRISTUDI
3 Fu san-ede begi de so prenspari te wi e hori wan beibristudi? Te wi e bigin na beibristudi nanga begi, dan wi e kon na ini na yoisti yeyefasi, èn na stukaman e kisi yepi fu si na prensparifasi fu san wi e taki. A e leri fu luku go na Yehovah fu kisi tiri. So srefi na stukaman e kisi leri fu na eksenpre fu wi fa en musu begi. — Luk. 11:1.
4 San na wantu sani di fiti fu ben sa kan taki na ini den begi fu yu tapu beibristudi? Na modelbegi fu Yeises èn na begi fu Paulus fu na bun fu den Filipi sma de tumusi moi eksenpre (Mat. 6:9-13; Fil. 1:9-11). Den begi fu wi no abi fu de langa, ma den musu go fu spesrutu sani. A de prenspari taki wi poti prèise di fiti gi Yehovah na ini tu fu den bun furu moi wroko fu en. Wi kan fruteri taki wi de grantangi fu na granfasi, na mayesteiti nanga den volmaakti eigifasi fu en (Ps. 145:3-5). A ben sa de wan bun sani fu kari yu stukaman na en nen, kande fu fruteri fu den omstandigheden fu en èn fu begi efu a mag go na fesi na yeye fasi. Efu a e go na fesi, dan wi kan aksi Yehovah blesi tapu den muiti fu en fu fisiti konmakandra èn fu prati na waarheid di a e leri nanga trawan. No frigiti tu fu seni tranga begi go na Gado, pe yu e aksi Yehovah blesi tapu na preikiwroko na a heri grontapu.
GI WI BRADA NANGA SISA
5 Ala sma di de wan memre fu Yehovah pipri na wi konpe wrokoman (1 Kor. 3:9). Fu dati-ede, te grontapu tiriman e pruberi fu tapu na preiki fu na bun nyunsu, wi e kisi tranga fu begi „ini na tori fu kownu èn ala sma di e teki wan hei posisi”. Nanga sortu prakseri? „So taki wi mag tan libi wan bedari èn korostu libi nanga a gi di wi e gi wi srefi na ini na dini fu Gado dorodoro èn nanga seryusufasi” (1 Tim. 2:2). Te yu e luku en bun, dan den sortu begi disi de fu na bun fu wi brada nanga sisa na a heri grontapu. Wi e begi taki den tiriman kan sori bun wani gi na wroko fu wi.
6 Nanga yepi fu begi wi kan aksi krakti gi wi brada nanga sisa di e preiki ondro muilek omstandigheid èn gi den sma di kande siki na yeye fasi, so taki den kan abi wan moro bigi prati na a diniwroko (2 Tes. 3:1, 2). A bun tu fu begi gi gemeente owruman, opziener di e rèis èn na Tiri Skin — alamala brada „di e wroko tranga a wi mindri”. — 1 Tes. 5:12.
7 Alaten wi musu poti den broko-ede fu wi na tapu Yehovah (Ps. 55:22; 1 Pet. 5:7). Wi abi na dyaranti taki, awinsi san wi e aksi ini akruderi nanga en wani, a e yere wi (1 Yoh. 5:14). Fu dati-ede, efu wi e begi efu Yehovah wani yepi wi fu du wi preikiwroko dorodoro, dan wi musu abi na overtoigi taki a sa arki èn meki a pasi fu wi waka bun. — 2 Tim. 4:5.