Den moro jongoesma abi wan boen eksempre fanowdoe
1 Wi e prisiri foe abi nanga wi wan nomroe foe jongoe sma di e tan gro, èn di e ’prèise a nen foe Jehovah’ (Ps. 148:12, 13). Foeroe foe den, jongoe srefisrefi ete. A go di den kan go na fesi, foeroe tron abi foe doe nanga a leri nanga na eksempre di den e kisi foe a papa nanga a mama foe den, nanga tra moro owroe sma ini a gemeente. Ma, wan sani di wi no moesoe frigiti, na a krakti di tra jongoe sma abi na tapoe den moro jongoe sma, spesroetoe moro owroe tini nanga jongoe bigisma. Efoe joe jari poti joe ini a groepoe disi, dan den komentaar disi kan de wan wini gi joe.
2 Jongoe sma di no de ini den tini jari ete, abi a gwenti foe doe san moro owroe tini e doe. Den abi a natuurlijk firi foe de neleki den krosibei kompe di den e respeki srefisrefi. Den lobi foe loekoe go na den tra jongoewan di de pikinso moro owroe, di e sori leki den na sma di sabi sani èn di e go na fesi moro. Leki wan bakapisi foe dati, den kan taki fa joe e taki, èn den kan tjari densrefi fa joe e tjari joesrefi, èn a srefi sani den kan doe nanga a warderi di joe abi gi warti sani na jejefasi èn a prati di joe abi ini gemeente aktiviteit.
3 Leki wan moro owroe tini, joe abi wan grani èn wan bigi frantiwortoe. Nojaso, na eksempre foe joe abi krakti kande tapoe den kompe foe joe, di moro jongoe. Aksi joesrefi: ’Osortoe krakti mi abi tapoe moro jongoewan? Mi de serjoesoe, e wai pasi gi dónfasi èn fowtoe „lostoe di e kon foe a jongoe di wan sma jongoe”? Mi e sori taki mi e arki èn e respeki mi papa nanga mama, den owroeman, nanga tra moro owroe sma?’ (2 Tim. 2:22; Kol. 3:20) San joe e taki èn san joe e doe, kan de wan prenspari sani ini a gro di tra jongoewan e gro na jejefasi, di e loekoe san joe e doe.
4 Preiki a boskopoe foe a Kownoekondre, na a moro prenspari wroko foe a gemeente. A prati di joe abi doronomo, foe di joe wani, kan gi den kompe foe joe deki-ati foe abi moro faja. Efoe joe man doe pionierwroko, dan a sa boeweigi den mati foe joe foe doe a srefi. A gi di joe e gi komentaar na den konmakandra, èn a friwani jepi foe joe te wroko moesoe foe doe na a Kownoekondrezaal, kan de wan boen eksempre toe.
5 Ala di Timoteus no ben de wan tini moro di Paulus ben gi en a rai di e kon now, tokoe joe leki tini kan gebroiki en: „Tron wan eksempre gi den getrow sma na ini a taki foe joe, ini a fasi fa joe e tjari joesrefi, ini lobi, ini bribi, ini krin libi” (1 Tim. 4:12). A teki di joe e teki prati ini a diniwroko foe Jehovah nanga faja èn nanga joe heri ati, kan boeweigi den kompe foe joe nanga den moro jongoe sma di e loekoe joe, na wan positief fasi, èn a sa jepi den foe gro kon tron bigisma na jejefasi (Ef. 4:13). Te den tini de foe den osofamiri di bigin foe studeri no so langa ete, dan a waarheid kan hari den tini foe san den e si ini joe.
6 Moro prenspari srefi, a faja foe joe ini a sori di joe e sori eigifasi foe Gado, e sori na wan boenfasi go tapoe Jehovah nanga en organisâsi (Odo 27:11). Opregti sma di e loekoe na trawan, sa froewondroe foe si a krin difrenti na mindri joe nanga den jongoe sma foe grontapoe. So boen, joe abi wan aparti okasi foe jepi den moro jongoe sma, ala di joe e jepi na wan wartifasi foe prèise Jehovah. — Ps. 71:17.