„Tan na ai”
1 Di Jesus ben taki den wortoe di skrifi na Mateus 26:38-41, a ben kon krosibei foe a moro moeilek pisi ten foe en libi leki libisma. A ten dati ben o sori foe de a moro prenspari ten na ini a historia foe libisma. A froeloesoe foe a heri libisma famiri ben de na ini kefar. De disipel foe Jesus ben abi foe „tan na ai”.
2 Tide wi e tanapoe na dromofo foe a ten di Jesus sa kon na ini a dobroe ròl foe froeloesoeman èn a wan di sa gi strafoe. Leki kresten di de na ai èn di e froestan o prenspari a ten de, wi no e sidon wakti froeloesoe sondro foe doe wan sani. Wi sabi taki wi moesoe de klariklari ala ten. A de fanowdoe foe wi „tan wroko tranga èn doe ala moeiti” na ini wi diniwroko gi Jehovah (1 Tim. 4:10). Fa a de nanga ibriwan foe wi persoonlijk? Wi e tan de na ai?
3 Ondrosoekoe wisrefi: Jesus ben warskow toe: „Poti prakseri na tapoe joesrefi” (Luk. 21:34, 35). Wi moesoe loekoe wisrefi boen èn sorgoe taki wi de „krin èn sondro fowtoe . . . na mindri wan kroektoe èn kron geslakti” (Fil. 2:15). Wi e libi leki kresten ibri dei, e waka baka Jesus èn e waka akroederi den gronprakseri di de na ini Gado Wortoe? Wi moesoe wai pasi gi no-kresten fasi foe tjari wisrefi di de a marki foe wan grontapoe di „de na ini a makti foe na ogriwan” (1 Joh. 5:19; Rom. 13:11-14). Te wi ondrosoekoe wisrefi leki fa den Boekoe foe bijbel e sori, dan wi de troetroe na ai leki fa Jesus ben leri?
4 Owroeman moesoe loekoe boen foe de fajafaja na ini a fasi fa den e doe den wroko na ini a gemeente, foe di den sabi taki den moesoe gi frantiwortoe foe a fasi fa den sorgoe gi na ipi (Hebr. 13:17). Den edeman foe osofamiri abi wan spesroetoe froeplekti foe tiri den osofamiri foe den na ini den pasi foe Jehovah (Gen. 18:19; Jos. 24:15; teki gersi 1 Timoteus 3:4, 5). So srefi, fa a de tranga fanowdoe taki wi alamala miti a bijbel-komando foe lobi makandra! A de a marki foe troe Krestendom.—Joh. 13:35.
5 De klariklari foe warskow trawan: A de di wi moesoe de na ai, wani taki moro leki foe poti prakseri na tapoe wisrefi. Wi kisi wan wroko foe meki disipel foe trawan (Mat. 28:19, 20). Lobi gi a sma na wi sei moesoe boeweigi wi foe warskow trawan so taki den sa man pasa libilibi, a pori di e wakti a grontapoe disi. Disi na wan frantiwortoe di ala kresten abi. A de wan prenspari pisi foe wi anbegi (Rom. 10:9, 10; 1 Kor. 9:16). Foeroe leisi wi e miti nanga mi-no-ke-fasi noso langalanga gens tapoe a wroko disi di e kibri libi. Wi abi a frantiwortoe foe horidoro, srefi te moro foeroe sma e tapoe den jesi gi a warskow di wi e gi (Esek. 33:8, 9). Troe lobi gi Jehovah èn gi a sma na wi sei, sa boeweigi wi foe tan horidoro.
6 Ten no de foe teki sani leki fa den kon, sondro foe wi broko-ede nanga den. Wi no moesoe gi den aladei sorgoe foe libi okasi foe poeroe wi prakseri, noso go so fara foe moksi wisrefi na ini den fasi foe meki prisiri foe a sistema disi so taki den kan de wan trapoe gi wi (Luk. 21:34, 35). Efoe oiti wan ten ben de di a ben sa de fanowdoe foe handri esi-esi, dan a ten dati na nownow. Esi-esi a ten e kon di Jesus sa tjari kroetoe kon na tapoe na ogri sistema disi. Soso den wan di wiki, di de klariklari, èn di de na ai, sa tan. Efoe wi arki san Jesus taki èn „man pasa ala den sani disi”, dan fa wi sa de grantangi!—Luk. 21:36.