Wi abi a gemeente fanowdoe
1 Wan ten den manpikin foe Korak ben taki fa den ben warderi a gemeente foe Jehovah, na tapoe a fasi disi: „Wan dei na ini joe fesisei djari, moro boen leki doesoen dei na wan tra presi” (Ps. 84:10). Gi den, a grontapoe no ben abi notinoti foe pristeri den, efoe den ben teki dati gersi nanga a gemeente foe Jehovah. Efoe joe e firi na a srefi fasi toe, dan joe moesoe meki a gemeente tron a prenspari sani na ini joe libi.
2 Foe sensi a bigin, a kresten gemeente sori taki a abi a blèsi foe Jehovah (Tori. 16:4, 5). No wan foe wi moesoe teki a gemeente leki wan soso sani noso feni taki a de foe tjari wi kon makandra nomo foe wi kan si makandra leki libisma. Ini ibri libimakandra pe Jehovah Kotoigi de, a gemeente na a presi pe den e kisi deki-ati nanga krakti. A e meki wi de makandra na ini wánfasi so taki wi kan kisi leri foe Jehovah èn so taki En kan orga wi gi Kownoekondre aktiviteit.—Jes. 2:2.
3 A kresten gemeente na wan fondamenti kanaal pe wi e leri waarheid (1 Tim. 3:15). Den bakaman foe Jesus „alamala moesoe de wán”—na ini wánfasi nanga Gado, nanga Krestes èn nanga trawan. (Joh. 17:20, 21; teki gersi Jesaja 54:13.) A no abi trobi pe wi e go na grontapoe, wi brada e bribi den bijbel leri nanga den bijbel gronprakseri èn den e tjari densrefi, akroederi den sani dati.
4 Wi e kisi leri èn wi de srekasreka foe klari a toewijzing foe wi foe meki disipel. Ibri moen, A Waktitoren, Ontwaakt! nanga Wi Kownoekondre Dienst e gi wi bodoi di kan jepi wi foe bigin bijbel takimakandra. Den konmakandra meki foe sori wi fa wi kan feni belangstelling èn fa wi kan kweki dati moro fara. A si di wi e si taki a wroko e gro na heri grontapoe, e sori taki wi e kisi jepi foe hemel na ini a wroko disi.—Mat. 28:18-20.
5 Nanga jepi foe a gemeente, wi e kisi deki-ati ala dei ’foe gi makandra tranga foe sori lobi èn foe doe toemoesi boen wroko’ (Hebr. 10:24, 25). Wi e kisi krakti foe horidoro na wan getrowfasi na ondro tesi. Owroeman di e sori lobi, e jepi wi foe kakafoetoe gi den druk nanga den broko-ede (Preik. 4:9-12). Wi e kisi rai di wi abi fanowdoe te wi e bigin lasi pasi. Sortoe tra organisâsi e sorgoe wi na so wan lobi fasi?—1 Tes. 5:14.
6 A de a wani foe Jehovah taki wi tan krosibei foe na organisâsi foe en so taki wi tan na ini wánfasi (Joh. 10:16). Wán fasi fa a gemeente e jepi wi foe tan hori kontakti nanga a getrow srafoe groepoe, na foe di na organisâsi e seni opziener di e rèis foe gi wi deki-ati. A handri di wi e handri tapoe so wan lobi tiri e tjari wi kon na wán foe de na ini wánfasi nanga makandra èn dati e jepi wi foe tan tranga na jejefasi.
7 A gemeente prenspari srefisrefi efoe wi wani tan na libi na jejefasi. A no ben sa kan, taki wan sma dini Jehovah boen sondro a gemeente. Foe dati ede, meki wi tan krosibei foe den sani di Jehovah gi wi. Meki a de so, taki wi e wroko na ini wánfasi nanga makandra, akroederi den marki foe en èn, na wan oprègti fasi, e fiti a rai di wi e kisi foe a gemeente. Soso tapoe a fasi disi wi kan sori o foeroe a gemeente wani taki gi wi.—Ps. 27:4.