Meki sma si a go-na-fesi foe joe
1 Prakseri baka foe a ten di joe ben jere a Kownoekondre boskopoe a fosi tron. Den soifri waarheid leri ben opo joe angri foe kisi sabi èn foe froestan sani. No langa baka dati, joe ben man foe si a fanowdoe foe tjari kenki kon na ini joe fasi foe libi bika den pasi foe Jehovah de so hei foeroetron moro leki den pasi foe joe (Jes. 55:8, 9). Joe ben go na fesi, ben gi joe libi abra èn ben teki dopoe.
2 Srefi baka di joe e go pikinso na fesi na jejefasi, swakifasi ben de di joe ben moesoe kakafoetoe gi (Rom. 12:2). Kande joe ben abi frede gi libisma èn dati ben meki joe ben degedege foe teki prati na ini a velddienst. Noso kande joe no ben sori den froktoe foe a jeje foe Gado nofo. Na presi foe poeroe joesrefi, joe ben abi a fasti bosroiti foe go na fesi foe di joe ben poti theokrasia marki gi joesrefi.
3 Kande wan toe jari pasa kaba sensi joe ben gi joesrefi abra. Te joe e prakseri baka, sortoe go-na-fesi joe e si na ini joesrefi? Joe doro wan toe foe den marki foe joe? Joe abi a srefi faja di joe „ben abi biginbigin”? (Hebr. 3:4) Timoteus ben de wan lepi kresten kaba nanga someni jari foe ondrofeni, di Paulus ben gi en tranga: „Denki dipi foe den sani disi; prakseri foe disi dorodoro, so taki ala sma kan si a go-na-fesi foe joe.”—1 Tim. 4:15.
4 Persoonlijk ondrosoekoe de fanowdoe: Te wi e denki dipi foe a libi nanga waka foe wi na ini a ten di pasa, wi e feni taki wi abi wan toe foe den swakifasi ete di wi ben abi na a bigin? Wi no man doro wan toe marki di wi poti? Efoe dati de so, foe san ede? Ala di wi ben abi boen sani di wi ben wani doe na prakseri, kande wi no bosroiti esi-esi foe doe den. Kande wi meki den sorgoe foe a libi noso den kwinsi foe a sistema disi hori wi na baka foe meki go na fesi.—Luk. 17:28-30.
5 Ala di wi no man kenki san pasa kaba, seiker wi kan doe wan sani na ini a ten di e kon. Wi kan doe wan eerlijk ondrosoekoe foe wisrefi, foe si pe wi no ben doe nofo èn baka dati, wi kan meki ala moeiti foe sani waka moro boen? Kande wi moesoe doe moro foe sori den froktoe foe a jeje foe Gado, soleki a dwengi di wi moesoe dwengi wisrefi, safri-atifasi noso langa pasensi (Gal. 5:22, 23). Efoe wi e feni en wan moeilek sani foe man feni en nanga trawan noso foe wroko makandra nanga den owroeman, a prenspari foe kweki sakafasi nanga wan sakafasi foe denki.—Fil. 2:2, 3.
6 Wi kan meki sma si a go-na-fesi foe wi foe di wi e soekoe foe kisi grani foe dini? Nanga pikinso moro moeiti, den brada kan kon bekwaam foe dini leki dinari na ini a diniwroko noso leki owroeman. Kande son wan foe wi, man gi wi nen foe dini leki gewoon pionier. Gi foeroe trawan, a jepi-pionierwroko kan de wan marki di den man doro. Trawan kande e doe tranga moeiti foe meki a gwenti foe studeri persoonlijk kon moro boen, kon de moro faja sma di e teki prati na ini den gemeente konmakandra, noso foe abi wan moro boen bakapisi leki preikiman foe a gemeente.
7 A de troe, taki a de a frantiwortoe foe ibri wan foe wi foe bosroiti san na den sani pe wi moesoe go na fesi. Wi kan de seiker taki den opregti moeiti foe wi foe „tan go doro foe gro kon lepi” sa meki a prisiri foe wi kon moro bigi, èn sa meki wi tron memre foe a gemeente di abi moro boen bakapisi.—Hebr. 6:1.