Hori wisrefi na a serjoesoe pramisi foe wi ibri dei
1 Sani ben boeweigi a psalm singiman David foe taigi Jehovah: „Mi [sa] meki pokoe gi joe nen foe têgo, so taki mi kan hori misrefi na den serjoesoe pramisi foe mi ibri dei” (Ps. 61:8). David ben sabi taki a meki foe wan serjoesoe pramisi na wan sani di wan sma e doe krinkrin nanga en fri wani. Ma a ben froestan so srefi taki efoe a ben meki wan serjoesoe pramisi, a ben abi a froeplekti foe hori ensrefi na en. Tokoe, a ben préise Jehovah foe na okasi di a ben abi foe hori ensrefi na den serjoesoe pramisi foe en ibri dei.
2 Di wi ben gi wisrefi abra na Jehovah, wi ben meki a serjoesoe pramisi sondro dwengi foe doe en wani. Wi ben drai wi baka gi wisrefi èn ben meki a dini foe Jehovah a moro prenspari sani foe waka na baka na ini wi libi (Luk. 9:23). Foe dati ede, wi toe moesoe hori wisrefi na a serjoesoe pramisi foe wi ibri dei (Preik. 5:4-6). A sani di wi ben meki bekènti na poebliki, na a pisi ten di wi ben teki dopoe na watra, moesoe sori ensrefi na ini wi heri fasi foe libi, foe di wi sabi taki ’nanga a mofo wan sma e meki sani bekènti na poebliki foe kan kisi froeloesoe’ (Rom. 10:10). Disi abi na ini toe a preiki foe a boen njoensoe (Hebr. 13:15). Den persoonlijk situwâsi foe sma e difrenti foeroe, ma ibri dei wi alamala kan poti spesroetoe prakseri na a prenspari fasi foe preiki a boen njoensoe na trawan.
3 Meki okasi foe preiki ala dei: Foe prati a boen njoensoe nanga wan tra sma na wan prisiri sani. Foe man doe disi ala dei wi moesoe meki den okasi foe preiki, pe den situwâsi foe wi e gi pasi foe doe dati. Den wan di densrefi teki a bosroiti foe doe okasi-preiki na sma na wrokope noso na skoro èn na birtisma noso na tra sma di den e miti ala dei, kisi foeroe moi ondrofeni. Srefi a skrifi foe brifi noso a gebroiki foe a telefon kan de fasi foe gi kotoigi na trawan. Te wi e meki gebroiki foe ala den fasi disi, èn so srefi e poti ten na wan sei doronomo foe gi kotoigi oso foe oso èn foe tjari gobaka, dan dati kan meki wi abi a spesroetoe prisiri di e kon foe a hori foe wan oso-bijbelstudie. Ija, ibri dei wi sa man foe meki okasi foe preiki.
4 Wan sisa ben bigin leisi Ondrosoekoe den Boekoe foe bijbel ala dei na ini en rostoe joeroe na wroko. A ben gi wan kompe na wroko na kari foe leisi a deitekst nanga en, èn sjatoe baka dati, disi ben meki wan bijbelstudie opo nanga na oema. Den ben studeri wan afoe joeroe ibri dei, feifi dei na ini wan wiki. Wan tra kompe na wroko ben loekoe fa a ben go nanga na aladei studie foe den. Te foe kaba, a ben sori taki a de wan inaktief brada. Foe di a faja fasi foe a sisa ben gi en deki-ati, a ben meki kontakti nanga wan owroeman foe kon de aktief baka. A sisa disi ben abi boen krakti tapoe a libi foe toe sma foe di a ben hori ensrefi soifri na en serjoesoe pramisi ibri dei.
5 Te wan ati di foeroe nanga warderi foe ala den boen sani di Jehovah doe gi wi e poesoe wi, te wi e hori wisrefi na a serjoesoe pramisi di wi ben meki di wi ben gi wisrefi abra na Gado so boen leki wi kan ibri dei, dan dati sa tjari prisiri nanga satisfaksi gi wi. Neleki a psalm singiman, wi kan taki: „Mi e prèise joe, O Jehovah mi Gado, nanga mi heri ati, èn mi sa gi joe nen glori te ten di no abi kaba.” — Ps. 86:12.