Fisiti konmakandra èn „[doe] dati moro foeroe [now]”
1 Ala ten a kon di wi e kon makandra ben de prenspari gi a pipel foe Jehovah. Den Israèlsma ben abi a tempel nanga den snoga foe den leki centrum foe troe anbegi, foe kan kisi a leri foe Gado, èn foe abi prisiri demakandra. Na a srefi fasi den fosi kresten no ben libi a kon di den ben moesoe kon makandra. Ala di a druk nanga tesi na ini den moeilek lasti dei disi e kon moro foeroe, wi toe abi a jeje krakti fanowdoe di den gemeente-konmakandra foe wi e gi — èn wi abi ’dati [fanowdoe] moro foeroe [now]’ (Hebr. 10:25). Loekoe dri reide foe san ede wi e fisiti konmakandra.
2 Foe a demakandra ede: Den Boekoe foe bijbel e froemane wi foe „tan trowstoe makandra èn bow makandra” (1 Tes. 5:11). Demakandra nanga sma di e dini Gado e foeroe wi froestan nanga prakseri di e bow wi èn a e boeweigi wi foe doe boen wroko. Ma efoe wi e hori wisrefi aparti foe tra sma, dan a kan taki wi e kisi a firi foe denki don sani, foe prakseri wi eigi wini nomo, noso srefi foe abi immoreel denki. — Odo 18:1.
3 Foe a leri ede: Kresten konmakandra e gi wi wan doronomo programa foe bijbel-leri di meki na so wan fasi, taki wi kan hori a lobi foe Gado libilibi na ini wi ati. Den e gi praktis tiri fa foe gebroiki „ala [a] rai foe Gado” (Tori. 20:27). Den konmakandra e leri wi a koni fa foe preiki èn fa foe leri sma a boen njoensoe, konifasi di de fanowdoe srefi moro foeroe now, so taki wi kan abi a bigi prisiri foe feni èn foe jepi den wan di wani teki bijbel waarheid.
4 Foe a kibri ede: Na ini a takroe grontapoe disi, a gemeente de wan kibripresi na jejefasi troetroe — wan lanpe foe vrede nanga lobi. Te wi de na den gemeente-konmakandra, dan a santa jeje foe Gado abi wan tranga krakti na wi tapoe, èn a e meki a froktoe leki „lobi, prisiri, vrede, langa pasensi, switifasi, boen-ati, bribi, safri-atifasi, a dwengi di wan sma e dwengi ensrefi” (Gal. 5:22, 23). Den konmakandra e tranga wi foe tanapoe kánkan èn foe de tranga na ini a bribi. Den e sreka wi foe de srekasreka gi den tesi di de na wi fesi.
5 Te wi e kon makandra doronomo, dan wi e ondrofeni san a psalm singiman ben taki, soleki dati skrifi na Psalm 133:1, 3: „Loekoe! O boen èn o switi a de te brada e libi makandra na ini wánfasi!” Awansi pe a pipel foe Jehovah e dini èn e kon makandra na ini a ten disi, na „drape Jehovah ben gi a komando taki a blesi moesoe de, [ija], libi te ten di no skotoe”.