Aksi fu Kisi Yepi
1 Den wortu „tranga fu pasa” di skrifi nanga yepi fu Gado en santa yeye e fiti den muilek ten fu wi trutru (2 Tim. 3:1). So bun, san yu kan du te onfruwakti yu e miti muilek tyalensi na yeye fasi èn yu e firi taki yu no bekwaam nofo fu kakafutu gi den?
2 ¿Yu de klariklari fu taki nanga wan memre fu a gemeente di lepi na yeye fasi? Sonwan e draidrai kande fu du dati fu di den e firi syen, noso fu di den no wani tyari sani kon na doro, noso fu di den e tweifri taki wan sma kan yepi den trutru. A tru taki wi musu du muiti fu sorgu gi wi eigi frantwortu so bun leki wisrefi man, ma ala ten wi musu firi fri fu aksi yepi na ini afersi di abi fu du nanga a tanbun fu wi na yeye fasi.—Gal. 6:2, 5.
3 Pe Wi Musu Bigin: Yu kan go na yu bukustudie leider èn aksi en efu yu kan wroko makandra nanga en na ini a diniwroko. Disi sa gi yu na okasi fu fruteri en taki yu wani gro na yeye fasi. Efu a de wan dinari ini a diniwroko, dan meki en kon sabi taki yu abi yepi na yeye fasi fanowdu èn a sa aksi den owruman fu yepi yu. Noso yu kan taki nanga wan fu den owruman fu afersi di yu e broko yu ede nanga den.
4 Sortu yepi yu abi fanowdu? ¿Wan sani de di meki a faya fu yu kon moro mendri? ¿Yu de wan mama noso papa sondro patna di e pruberi fu hori den pikin fu yu krosibei na a gemeente? ¿Yu na wan grani sma di abi yepi fanowdu? ¿Noso wan problema de di e meki yu lasi-ati? Fu pasa den tranga ten fu wi kan de wan muilek sani — ma a no de wan sani di no kan. Yepi de.
5 Fa den Owruman E Yepi: Den owruman e broko den ede trutru nanga yu. Den sa arki den afersi fu yu di yu e broko yu ede nanga den. Efu tra preikiman e miti den srefi sortu problema, dan den owruman sa hori disi na prakseri te den e wei a gemeente èn te den e gi leri. Leki „eksempre gi na ipi”, den e tan klariklari fu wroko makandra nanga yu nanga prisiri (1 Petr. 5:3). Efu yu e arki den brada disi, di abi ondrofeni, te den e rideneri fu Bijbel gronprakseri, dan dati kan yepi yu fu meki yu diniwroko kon moro bun èn fu yepi yu ini yu eigi libi.—2 Tim. 3:16, 17.
6 Yesus ben gi wi furu „presenti di de libisma” (Ef. 4:8, futuwortu). Disi wani taki dati yu kan aksi den owruman fu yepi yu. Den de drape fu yepi yu. Fu taki en leti, dan den „na fu unu” (1 Kor. 3:21-23). So bun, na presi taki yu e draidrai, yu musu taki èn tyari sani kon na doro. Aksi fu kisi a yepi di yu abi fanowdu.